عزیزاللہ خان بی بی سی اردو ڈاٹ کام، کوئٹہ

	چمن اور سپین بولدک کے مابین روزانہ پندرہ سو سے دو ہزار افراد سرحد عبور کرتے ہیں۔

یہ سرحد دونوں جانب کے اہلکاروں کے درمیان تلخ کلامی اور پاکستانی اہلکار کی گرفتاری کے بعد ہر قسم کی آمدو رفت کے لیے بند کر دی گئی تھی۔

سنیچر کی صبح دس بجے سرحد سے آمدو رفت کا سلسلہ شروع ہوا اور صرف ان لوگوں کو آنے جانے کی اجازت دی گئی جن کے پاس سفری کاغدات تھے۔ سرحد کی بندش کے بعد دونوں جانب بڑی تعداد میں ٹرک اورگاڑیاں کھڑی تھیں ۔جب سرحد کھولی گئی تو اس وقت بڑی تعداد میں فرنٹیئر کور کے اہلکار علاقے میں گشت کر رہے تھے۔

کوئٹہ میں فرنٹیئر کور کے ترجمان کرنل حسن نے کہا ہے کہ افغان حکام کی اس یقین دہانی پر کہ آئندہ اس طرح کے واقعات پیش نہیں آئیں گے سرحد کھول دی گئی ہے۔

ادھر افغان کمانڈر رازق نے ٹیلیفون پر بتایا ہے کہ دونوں جانب سے یقین دہانی کرائی گئی ہے کہ سرحد پر حالات کو قابو میں رکھا جائے گا۔ انھوں نے کہا ہے کہ پاکستانی اہلکاروں نے سرحد بند بھی خود کی تھی اور خود ہی کھول دی ہے۔

کمانڈر رازق نے کہا ہے کہ دو روز پہلے سرحد پر ان کے ایک اہلکار کو پاکستانی اہلکاروں نے پکڑا تھا جواب میں ایف سی کے ایک صوبیدار کو افغان فوجی گرفتار کرکے لے آئے تھے جسے کوئی تین گھنٹے کے بعد رہا کر دیا گیا تھا۔

ایف سی کے ترجمان کرنل حسن نے کہا ہے کہ افغان فوجی غیر قانونی طور پر پاکستان داخل ہونا چاہتا تھا جسے پاکستانی اہلکاروں نے روکا تو دونوں طرف تلخ کلامی شروع ہو گئی بعد میں افغان فوجی پاکستانی اہلکار کو پکڑ کر ساتھ لے گئے کیونکہ پاکستانی اہلکار غلطی سے افغانستان کی سرحد میں داخل ہو گیا تھا۔

سرحد پر دونوں جانب اہلکاروں کے مابین کشیدگی کے واقعات پیش آتے رہتے ہیں جس سے علاقے میں تناؤ پایا جاتا ہے۔