مبشر زیدی بی بی سی اردو ڈاٹ کام، اسلام آباد

جنوبی وزیرستان میں گزشتہ دو سالوں میں سو سے زائد پاکستانی فوجی ہلاک ہوئے

جنوبی وزیرستان میں گزشتہ دو سالوں میں سو سے زائد پاکستانی فوجی ہلاک ہوئے ہیں جبکہ حکام کے مطابق ڈھائی سو سے زائد مبینہ دہشت گردوں کو اس علاقے میں ہلاک کیا جا چکا ہے۔

اتحادی فوج کے سربراہ نے اسلام آباد میں امریکی سفارتخانے میں پاکستانی صحافیوں کے ایک گروپ سے بات کرتے ہوئے کہا کہ پیر کو پاکستان، افغانستان اورامریکہ کے سہ فریقی کمیشن کا اجلاس ہوا جس میں جنرل بارنو کے مطابق اس بات پر اتفاق کیا گیا کہ دہشت گردوں کے خلاف شمالی وزیرستان میں بھی آپریشن کیا جانا چاہیے۔

انہوں نے کہا کہ پاکستان نے اپنی سیکیورٹی فورسز کو شمالی وزیرستان کی طرف اکٹھا کرنا شروع کر دیا ہے تاکہ دہشت گردوں کے نیٹ ورک پر دباؤ بڑھایا جائے۔انہوں نے کہا کہ اتحادی افواج اس آپریشن کے ساتھ ہی افغانستان میں بھی آپریشن کریں گی۔

جب اس سلسلے میں پاکستانی فوج کے ترجمان میجر جنرل شوکت سلطان سے رابطہ کیا گیا تو انھوں نے اس کہا کہ وہ پیر کی شب پاکستان واپس پہنچے ہیں اور وہ اس بارے میں منگل کو ہی اپنا رد عمل دے سکیں گے۔

ادھر جنرل بارنو کا کہنا ہے کہ اگلے چھ سے نو ماہ کے دوران طالبان اور القائدہ کوئی بڑا حملہ کر سکتے ہیں۔انھوں نے دعوی کیا کہ طالبان اور القائدہ کا گزشتہ چند سالوں سے سردیوں میں اپنے حملوں کی شدت میں کمی کرتے ہیں مگر بہار آتے ہی ان کے حملوں میں تیزی آ جاتی ہے۔

جنرل بارنو نے یہ بھی بتایا کہ افغانستان میں نیٹو کی موجودہ فوجی قوت میں بھی یکم جون سے اضافہ کیا جا رہا ہے جس کے بعد شمالی افغانستان اور مغربی افغانستان میں بھی نیٹو کے دستے تعینات کئے جائیں گے۔

اسامہ بن لادن کے حوالے سے انھوں نے کہا کہ وہ بدستور ایک انٹیلیجنس چیلنج ہیں مگر ان کی تلاش مؤخر نہیں کی جائے گی۔

افغانستان میں پوست کی کاشت کے بارے میں جنرل بارنو کا کہنا تھا کہ گزشتہ تین ماہ میں پوست کی کاشت میں کمی دیکھنے میں آئی ہے جس کا اعتراف اقوام متحدہ نے بھی کیا ہے۔

جنرل بارنو کے مطابق افغانستان کے صدر حامد کرزئی اور حکومت نے اس مسئلے کے حل کے لئے اقدامات کئے ہیں۔