دلاور خان وزیر بی بی سی اردو ڈاٹ کام، وانا

اس آپریشن میں گن شپ ہیلی کاپٹر بھی استعمال کیے گئے

پاکستانی فوج کے ترجمان میجر جنرل شوکت سلطان نے بتایا کہ جمعہ سے شروع ہونے والا یہ آپریشن شمالی وزیرستان کے دوردراز علاقے شاوال مانہ میں کیا گیا۔

شاوال کا علاقہ دشوار گزار پہاڑی سلسلوں پر مشتمل ہے جو افغانستان کے صوبے پکتیا تک پھیلا ہوا ہے۔

اطلاعات کے مطابق اس آپریشن میں بھاری اسلحہ اور دس گن شپ ہیلی کاپٹر بھی استعمال کیے گئے جنہوں نےوانا ائیرپورٹ کو بیس بنا کر غیر ملکیوں کے ٹھکانوں پر حملے کیے۔

اس آپریشن میں سپیشل سروسز گروپ کے دو سپاہیوں کے زخمی ہونے کی اطلاع ہے۔ زخمیوں کو وانا آرمی ہسپتال میں داخل کرا دیا گیا ہے۔

اس آپریشن کے بعد ایک سینیئر فوجی کمانڈر کی جانب سے قبائلی سرداروں کو متنبہ کیا گیا ہے کہ وہ یا تو اپنے علاقے سے غیر ملکی جنگجؤوں کو نکال دیں یا پھر آپریشن کے لیے تیار رہیں۔