عزیزاللہ خان
بی بی سی اردو ڈاٹ کام کوئٹہ |  |
|  سوئی میں اس واقعہ کے بعد سے حالات انتہائی کشیدہ رہے |
لیڈی ڈاکٹر شازیہ خالد سے زیادتی کے حوالے سے ٹریبیونل کی رپورٹ میں کہا گیا ہے کہ لیڈی ڈاکٹر سے صرف ایک شخص نے ایک رات میں دو مرتبہ زیادتی کی ہے اور اس کے شواہد ملے ہیں۔ بلوچستان ہائی کورٹ کے جسٹس احمد خان لاشاری پر مشتمل ٹریبیونل نے اپنی رپورٹ گزشتہ روز حکومت کو پیش کردی تھی جس کے اہم نکات آج حکومت نے اخبارات کو جاری کیے ہیں۔ رپورٹ کے مطابق لیڈی ڈاکٹر سے صرف ایک شخص نے ایک رات میں دو مرتبہ زیادتی کی ہے اور زیادتی کے وقت ایک شخص کمرے کے باہر کھڑا تھا اور یہ اجتماعی زیادتی کا واقعہ نہیں ہے۔ رپورٹ میں کہا گیا ہے گواہوں کی جانب سے دیے گئے بیانات سے ڈیفنس سروسز گارڈز کے اہلکار کا واقعہ سے تعلق ثابت نہیں ہوا ہے۔ ڈیرہ بگٹی کے ناظم نے ٹریبونل کو بتایا ہے کہ انھیں نا معلوم شخص نے ٹیلیفون پر آگاہ کیا جبکہ اس وقت تک علاقے کے لوگوں میں یہ افواہ پھیل چکی تھی کہ واقعہ میں ڈی ایس جی کا اہلکار ملوث ہے۔ لیڈی ڈاکٹر نے اپنے بیان میں کہا ہے کہ ان کے گھر کی راہداری کا تالا اس طرح بنایا گیا ہے کہ اگر اسے اندر کی طرف سے بند کیا جائے تو یہ کنڈی کو توڑے بغیر کھولا نہیں جا سکتا۔مکان کے باہر کا گیٹ راہداری کا گرل گیٹ اور خواب گاہ کا دروازہ لیڈی ڈاکٹر نے خود بند کیے تھے اور تالے لگائے تھے۔ رپورٹ میں کہا گیا ہے کہ کہ یہ تالے کھولنا اور خواب گاہ تک پہنچنے کے لیے ملزم نے باقاعدہ منصوبہ بندی کی تھی۔ ٹریبیونل نے واقعہ میں ملوث کسی فرد یا افراد کی نشاندہی نہیں کی ہے اور نہ ہی حکومت یا پولیس کو کسی فرد کے خلاف تحقیقات کی ہدایت کی ہے۔ رپورٹ میں کہا گیا ہے کہ لیڈی ڈاکٹر کے کمرے سے ملنے والے تازہ استعمال شدہ کنڈوم اور اس سے پہلے استعمال شدہ خشک کنڈوم ڈی این اے ٹیسٹ کے لیے قابل اعتماد شہادت کے طور پر مو جود ہیں پولیس کو ہدایت کی گئی ہے کہ اصل مجرم کی گرفتاری تک ڈی این اے ٹیسٹ کے حوالے سے تحقیقات کے دائرے کو وسیع کرتے ہوئے اسے نہ صرف پاکستان پیٹرولیم لمیٹیڈ کی حدود میں موجود تمام افراد اور ضرورت پڑنے پر حدود سے باہر بھی توسیع دی جائے۔ | 
یہ صفحہ دوست کو ای میل کیجیئے
پرِنٹ کریں
