ریحانہ بستی والا بی بی سی اردو ڈاٹ کام، ممبئی

	انیس سو ترانوے بم دھماکہ کیس میں اب تک چوراسی مجرموں کو سزا سنائی گئی ہے

عدالت کے جج پرمود دتاتریہ کوڈے نے مجرم اصغر مقادم، شاہنواز قریشی اور شعیب گھنسار کو سازش، دہشت گرد کارروائی، گاڑیوں میں آر ڈی ایکس بھر کر مختلف مقامات پر کھڑا کرنے، اس سے ہونے والی اموات، عوامی املاک کو نقصان پہنچانے اور دھماکہ خیز اشیاء کے قانون کے تحت مجرم قرار دیتے ہوئے تینوں کو موت کی سزا سنائی۔

ممبئی دھماکے: تین ملزمان کو سزائے موت

اصغر مقادم مقدمے کے اہم مفرور ملزم ٹائیگر میمن کے منیجر کے طور پر کام کرتے تھے۔ ان پر دھماکوں کی سازش میں ملوث ہونے کا جرم ثابت ہو چکا ہے۔ مقادم پر مجرم شعیب گھنسار اور شاہنواز قریشی کے ساتھ آر ڈی ایکس اور ٹائم ڈیٹونیٹر کے ساتھ ماروتی وین کو دادر میں واقع پلازہ تھیٹر کے کمپاؤنڈ میں رکھنے کا جرم بھی ثابت ہوا تھا۔ تین بج کر تیرہ منٹ پر بم پھٹنے کی وجہ سے وہاں دس افراد کی موت اور چھتیس افراد زخمی ہوئے تھے اور ستاسی لاکھ روپے کی املاک تباہ ہوئی تھیں۔ عدالت نے مقادم کو تین سوٹ کیس میں آر ڈی ایکس بھر کر انہیں شہر کے مختلف ہوٹلوں میں بھیجنے اور لوگوں میں اس کام کے بعد پیسے تقسیم کرنے کا بھی مجرم پایا گیا۔

تین مرتبہ سزائے موت اور جرمانہ  عدالت نے بم دھماکہ کی سازش، دہشت گرد کارروائی اور قتل کے لیے مجرم شاہنواز قریشی کو تین مرتبہ موت کی سزا اور تین لاکھ پچھتر ہزار روپیہ جرمانہ ادا کرنے کا حکم دیا

عدالت نے بم دھماکہ کی سازش، دہشت گرد کارروائی اور قتل کے لیے مجرم شاہنواز قریشی کو تین مرتبہ موت کی سزا اور تین لاکھ پچھتر ہزار روپیہ جرمانہ ادا کرنے کا حکم دیا۔

قریشی کو سزا سناتے ہوئے جج نے کہا کہ مجرم شروع سے آخر تک بم دھماکہ کی سازش میں ملوث تھے۔ انہوں نے پاکستان جا کر اسلحہ کی تربیت حاصل کی تھی اور اسلحہ کی لینڈنگ سے بم دھماکہ کے آخری دن تک دہشت گردی کے کام میں حصہ لیا تھا۔ عدالت کا کہنا تھا کہ مجرم نے اس کام کے لیے اصغر مقادم کی ہمت بڑھائی تھی۔ وہ اس ماروتی وین کو پلازہ تک لے جانے میں شریک تھے جس کی وجہ سے دس لوگ ہلاک ہوئے۔

ممبئی کے فسادات میں شرپسندوں نے شاہنواز قریشی کا گھر جلا دیا تھا اور وہ براہ راست متاثر ہوئے تھے۔

جج کوڈے نے محمد شعیب گھنسار کو دہشت گرد کارروائی کے لیے موت کی سزا اور دیگر معاملات میں مختلف سزاؤں کے ساتھ دو لاکھ پچاس ہزار روپے جرمانہ کی سزا سنائی۔

عدالت کے ریکارڈ کے مطابق شعیب مقادم کے رشتہ دار ہیں اور بم دھماکہ کی اس سازش میں وہ دھماکے سے صرف ایک روز قبل شامل ہوئے۔ انہیں مقادم اپنے ساتھ اس ماروتی وین میں لے کر گئے جس میں وہ شہر کی مختلف ہوٹلوں میں آر ڈی ایکس سے بھرا ہوا سوٹ کیس رکھنے کے لیے لے جا رہے تھے۔ شعیب ماہم کی الحسینی عمارت میں آر ڈی ایکس بھرنے کے لیے موجود تھے۔ شعیب پر جامع مسجد سے کچھ دور شیخ میمن اور مرزا سٹریٹ پر آر ڈی ایکس اور ٹائم ڈیٹونیٹر سے لدا سکوٹر کھڑا کرنے کا جرم ثابت ہوا۔ جس کے پھٹنے سے سترہ لوگ مرے تھے اور 57 افراد زخمی ہوئے تھے۔

عدالت میں شعیب کا بیان  شعیب کے اقبالیہ بیان کو عدالت میں پڑھ کو سناتے ہوئے کہا ’سکوٹر کھڑی کرنے کے بعد میں ناخدا محلہ کی مسجد میں گیا اور دو رکعت پڑھ کر اپنے گناہوں کی معافی مانگی‘

اب محض سولہ مجرموں کو سزا سنانا باقی ہے جن میں سنجے دت ان کے تین ساتھی اور ٹائیگر میمن خاندان کے چار افراد شامل ہیں۔