ریحانہ بستی والا بی بی سی اردو ڈاٹ کام، ممبئی

	1993 میں ممبئی میں ہونے والے دھماکوں میں سینکڑوں افراد مارے گئے تھے

اس معاملے میں اب تک نو مجرمان کو عمر قید کی سزا سنائی جا چکی ہے اور سو میں سے اب صرف بتیس مجرموں کی قسمت کا فیصلہ ہونا باقی ہے۔

خصوصی جج پرمود دتاتریہ کوڈے نے منگل کو جن پانچ مجرمان کو سزا سنائی ان میں پرویز ذوالفقار قریشی اور سلیم میرا شیخ عرف سلیم کتا کو عمر قید کی سزا دی گئی ہے۔ ان پر بالترتیب پچاس ہزار اور ایک لاکھ روپے جرمانہ بھی عائد کیا گيا ہے۔

پرویز اور سلیم کے لیے استغاثہ نے موت کی سزا کا مطالبہ کیا تھا۔ تفتیشی ایجنسی سی بی آئی کے مطابق مجرم پرویز نے رائے گڑھ کے ساحل شیکھاڑی میں اسلحہ اور آر ڈی ایکس کی لینڈنگ میں حصہ لیا تھا اور اس کے علاوہ انہوں نے پاکستان جا کر تربیت بھی حاصل کی تھی۔ مجرم سلیم پر بھی پاکستان جا کر تربیت حاصل کرنے، دیگھی کے ساحل پر آرڈی ایکس اتروانے، ممبئی کے ایک ہوٹل میں دھماکہ کی سازش کے لیے میٹنگ میں حصہ لینے اور پولیس افسران کو رشوت دینے جیسے جرم ثابت ہوئے تھے۔

عدالت نے حاجی نور محمد خان کو پانچ سال قید اور ڈیڑھ لاکھ روپیہ جرمانہ ادا کرنے کی سزا سنائی ہے۔ کاشی میرا علاقے میں ان کےگودام میں آر ڈی ایکس کو چھپایا گیا تھا جسے بعد میں انہوں نے ضائع کر دیا تھا۔ پانچویں مجرم الطاف علی مشتاق علی کو ہینڈ گرینیڈ اور ڈیٹونیٹر رکھنے کے جرم میں عدالت نے دس سال قید بامشقت اور ڈھائی لاکھ روپیہ جرمانہ کی سزا دی ہے۔

ذرائع کے مطابق فلم سٹار سنجے دت کی قسمت کا فیصلہ جمعہ کے روز ہو گا۔ پروبیشن آف اوفینڈرز ایکٹ افسر نے عدالت کو سنجے اور ان کے تین ساتھیوں کے بارے میں رپورٹ پیش کر دی ہے۔

واضح رہے کہ سنجے نے مذکورہ قانون کے تحت رہائی کا مطالبہ کیا تھا اور عدالت نے ان کی اس اپیل کو منظور کرتے ہوئے ایک افسر کو مقرر کیا تھا اور انہیں سنجے اور ان کے ساتھیوں کے جیل کی قید کے دوران اور اس کے بعد ان کے اخلاق کی رپورٹ عدالت میں پیش کرنے کے لیے کہا تھا۔