مائیکل کے ترجمان کا کہنا تھا کہ وہ نیلامی کی خبر سے بہت زیادہ پریشان ہوگئے ہیں

نیلامی میں تقریبًا دو ہزار ایسی اشیاء رکھی گئی ہیں جن کا تعلق 1960 سے 1990 کے درمیان مائیکل کے کریئر اور ان کے خاندان سے ہے۔

تاہم مائیکل کے ایک ترجمان نے خبر رساں ادارے ایسوسی ایٹڈ پریس کو بتایا کہ مائیکل اس نیلامی کو روکنے کے لیے قانونی چارہ جوئی پر غور کر رہے ہیں۔

ترجمان کا دعویٰ تھا کہ مائیکل نیلامی کی خبر سے بہت زیادہ پریشان ہوگئے ہیں۔

نیلامی میں پیش کی جانے والی اشیاء اس وقت نیویارک کے گیوآرنیز نیلامی گھر میں رکھی گئی ہیں تاہم ابھی تک کسی بھی چیز کی قیمت مقرر نہیں کی گئی۔ نیلامی گھر کے صدر آرلین ایٹئنگر کا کہنا ہے کہ کچھ چیزیں ایسی ہیں کہ جن کو خریدنے میں لوگ شوق ظاہر کریں گے۔

	نیلامی میں مائیکل سے تعلق رکھنے والی دو ہزار اشیاء رکھی گئی ہیں

مائیکل کی اس کلیکشن کا ذکر اس وقت منظر عام پر آیا جب ایک بچے سے جنسی زیادتی کے کیس میں مائیکل کا نام لیا گیا۔ اس کے بعد اس کلیکشن میں رکھی مائیکل کی انڈر وئیر سمیت کئی اشیاء کو شاملِ تفتیش کر لیا گیا۔

تیرہ سال کے ایک بچے کو جنسی زیادتی کا نشانہ بنانے کے الزام سے 2005 میں مائیکل کو بری کردیا گیا۔ اس مقدمہ کی ابتداء اس وقت ہوئی جب ایک برطانوی صحافی کی بنائی ایک دستاویزی فلم کے دوارن مائیکل نے بچے کے ساتھ ایک بستر پر لیٹنے کا اعتراف کیا۔

ان اشیاء کی براہ راست نیلامی کے علاوہ شائقین ’ای بے‘ ویب سائٹ پر بھی ان اشیاء کی بولی لگا سکتے ہیں جبکہ مذکورہ اشیاء کی باقاعدہ نیلامی تیس سے اکتیس مئی کے دوران لاس ایجنلس میں ہو گی۔