عارف وقار بی بی سی اردو ڈاٹ کام، لاہور

	فلم کی شوٹنگ لاہور اور اُس کے گرد و نواح میں ہوئی ہے

اِن تینوں باتوں میں بظاہر کوئی قدر مشترک نہیں ہے لیکن تھیٹر ڈائریکٹر اور اداکار سلمان پیر نے ان مختلف اشیاء میں نہ صرف ایک ربط ڈھونڈ لیا بلکہ اِس تعلق کو ایک سکرپٹ کی شکل میں ڈھال کر پہلے سٹیج ڈرامے کی صورت میں پیش کیا اور اب اس کی فلم بندی بھی شروع کردی ہے۔ لیکن آئیے پہلے اس قصّے کے اجزائے ترکیبی کو الگ الگ دیکھ لیا جائے۔

ایڈگر ایلن پو(1849-1809) ایک امریکی شاعر اور کہانی کار تھا اسے جرم و سزا اور جاسوسی کہانیوں کی صنف کا بانی قرار دیا جاتا ہےاور سائنس فکشن میں پہل کرنے کا اعزاز بھی اسی کے نام ہے۔ ’ٹل ٹیل ہارٹ‘ کے عنوان سے اس نے ایک کہانی 1843 میں لکھی تھی جو ایک نیم دیوانے شخص کی خود کلامی پر مبنی ہے۔ یہ شخص بار بار خود کو اور اپنے مخاطب کو یقین دلاتا ہے کہ میں پاگل نہیں ہوں لیکن ساتھ ساتھ وہ ایک قصّہ بھی بیان کرتا ہے کہ کیسے اس نے ایک آدمی کو رات کے اندھیرے میں موت کے گھاٹ اتارا تھا۔ مقتول کی آنکھیں گِدھ جیسی گدلی اور پژمردہ تھیں اور وہ قاتل کو گھورتی رہتی تھیں۔۔۔ پھر ایک رات قاتل نے، جوکہ اس کہانی کا راوی بھی ہے، اس گدلی آنکھوں والے شخص کو ہمیشہ کی نیند سلا دیا۔ یہ الگ بات ہے کہ اِس عمل کے بعد وہ اپنا ذہنی توازن کھو بیٹھا۔

	امریکی مصنّف اور شاعر ایڈگر ایلن پو ڈراؤنی کہانیاں لکھنے کے ماہر تھے

پاکستان میں شُوٹ ہونے والی زیرِ تذکرہ فلم بھی اس ذیل میں ایک نیا اضافہ ہے لیکن اس قصّے پر مزید بات کرنے سے پہلے آئیے اُس کے دوسرے جزو ترکیبی یعنی اورسن ویلز پر کچھ روشنی ڈالی جائے۔

جارج اورسن ویلز (1985-1915) کو اس صدی کی معروف ترین شخصیتوں میں شمار کیا جاتا ہے۔ اس کی بنائی ہوئی فلم ’سِٹی زن کین‘ کو عرصہ دراز تک فلمی تاریخ کا عظیم ترین اثاثہ قرار دیا جاتا رہا ہے اور آج بھی یہ دنیائے فلم کے اہم ترین کارناموں میں شمار ہوتی ہے۔

اورسن ویلز کو یہ اعزاز حاصل ہے کہ صرف 24 برس کی عمر میں اس کی تصویر ٹائم میگزین کے سرورق پر شائع ہوگئی تھی۔ کیونکہ 23 برس کی عمر میں اس نے وہ حیرت انگیز کارنامہ سر انجام دیا تھا جو اسے گمنامی کے دھندلکے سے نکال کر شہرت کی چکاچوند میں لے آیا تھا۔

تاریخ تھی 30 اکتوبر 1938 ۔ اورسن ویلز اُس وقت ریڈیو کا پروڈیوسر تھا۔ اس نے ایچ جی ویلز کے ناول ’وار آف دی ورلڈز ‘ کی ڈرامائی تشکیل ریڈیو پر پیش کی لیکن اس انداز میں کہ جیسے سچ مچ مریخ کی مخلوق نے زمین پر حملہ کردیا ہو اور ایک رپورٹر اس کا آنکھوں دیکھا حال براہِ راست نشر کر رہا ہو۔ اس نشریے کے دوران ہی لوگوں میں بھگدڑ مچ گئی اور وہ پروگرام ادھورا چھوڑ کر پناہ کی تلاش میں گھروں سے بھاگ نکلے۔

	اورسن ویلز نے 23 برس کی عمر میں ایک ریڈیو پروڈیوسر کے طور پہ امریکہ بھر میں شہرت حاصل کی

اس نشری معرکے کے تین سال بعد اورسن ویلز نے فلم ’ سٹی زن کین‘ بنائی جسے کچھ فلمی ناقدین دنیا میں اب تک بننے والی عظیم ترین فلم قرار دیتے ہیں۔ اس فلم کے بعد اورسن ویلز بھی ایک داستانی شخصیت میں تبدیل ہوگیا۔ ایڈگر ایلن پو کی طرح اس کی زندگی بھی آخری دِنوں میں مشکلات کا شکار رہی اور اسے ٹی وی کے اشتہارات میں کام کر کے روزی کمانی پڑی۔

جیک اینڈرسن بھی پاکستان میں عالمی میلے میں ڈرامے کی نمائش کے ساتھ ساتھ اسی کہانی پر مبنی فلم کی شوٹنگ بھی جاری رہی۔ جس کے لیے ہالی وُڈ کے معروف سنیما ٹوگرافر جیک اینڈرسن اپنی ٹکنیکل ٹیم کے ہمراہ پاکستان میں موجود تھے

کہانی کے مطابق 1940 کے عشرے میں ایک نئی امریکی فلم ساز خاتون نورا رچرڈسن فیصلہ کرتی ہے کہ وہ ایڈگر ایلن پو کی زندگی پر ایک زبردست فلم بنائے گی۔ خاتون اس مقصد کےلئے نوجوان ڈائریکٹر اور اداکار اورسن ویلز کا انتخاب کرتی ہے لیکن جب فلم کی شوٹنگ شروع ہوتی ہے تو عجیب و غریب بلکہ محیرالعقول واقعات پیش آنے لگتے ہیں ۔ ایسے مافوق الفطرت واقعات جن کی عقلی سطح پر کوئی توجیح پییش نہیں کی جاسکتی۔

اور یوں فلم بندی کے یہ واقعات بذاتِ خود ایک کہانی بن جاتے ہیں۔ سلمان پیر نے پہلے اسے ایک تھیٹر ڈرامے کے طور پر لکھا اور اداکاروں کی ٹیم کے ہمراہ اسے لاہور کے عالمی فیسٹیول میں لے کر آئے۔

عالمی میلے میں ڈرامے کی نمائش کے ساتھ ساتھ اسی کہانی پر مبنی فلم کی شوٹنگ بھی جاری رہی۔ جس کے لئے ہالی وُڈ کے معروف سنیما ٹوگرافر جیک اینڈرسن اپنی ٹکنیکل ٹیم کے ہمراہ پاکستان میں موجود تھے ۔

	عمران اور فریال، سلمان پیر کی فلم ٰ زرگُل ٰ کے ایک منظر میں

فلم کی مافوق الفطری فضا کو دیکھتے ہوئے اندازہ کیا جاسکتا ہے کہ کہانی زمان و مکان کی قیود سے ماوراء کسی بھی وقت کسی بھی دور میں داخل ہوسکتی ہے۔ خدشہ صرف اس بات کا ہے کہ سلمان پیر کے اعلان کردہ، عالمی سطح کے بہت سے دیگر بلند بانگ منصوبوں کی طرح Raven and Lenore
نامی یہ فلمی منصوبہ بھی شوٹنگ کے مراحل ہی میں ٹھپ نہ ہوجائے۔

یاد رہے کہ اس سے قبل سلمان پیر نے ایک امریکی سٹوڈیو کے تعاون سے بہت بڑے بجٹ کی کاسٹیوم فلم ’شہر زاد‘ بنانے کا اعلان کیا تھا اور فلم بندی کے لیے پاکستان اور وسط ایشیا کی کچھ ریاستوں میں مقامی پارٹنر بھی تلاش کر لئے گئے تھے۔ شہر زاد ایک فینٹسی تھی اور بلآخر ’فینٹسی‘ ہی ثابت ہوئی کیونکہ اب اُس منصوبے کی صفیں لپیٹی جا چُکی ہیں۔