احمدرضا بی بی سی اردو ڈاٹ کام، کراچی

	’جمہوری استحکام کے لیے پی پی پی سے غیرمشروط تعاون کریں گے‘

پاکستان پیپلز پارٹی کے شریک چئرپرسن آصف علی زرداری کی ہدایت پر جماعت کے ایک وفد نے جمعرات کو متحدہ قومی موومنٹ کے مرکز نائن زیرو جا کر ایم کیو ایم کے رہنماؤں سے ملاقات کی۔

یہ ملاقات لگ بھگ ایک گھنٹے تک جاری رہی جس میں پیپلز پارٹی کی جانب سے پروفیسر این ڈی خان، سید قائم علی شاہ اور مصباح الرحمن اور ایم کیو ایم کی طرف سے شعیب بخاری، سید حیدر عباس رضوی، فیصل سبزواری اور نثار پنہور نے حصہ لیا۔

ملاقات کے بعد صحافیوں سے بات کرتے ہوئے پروفیسر این ڈی خان اور حیدر عباس رضوی نے کہا کہ ملاقات خوشگوار ماحول میں ہوئی جس میں سندھ اور ملک کے اہم ایشوز مثلاً صوبائی خودمختاری، این ایف سی ایوارڈ، کالا باغ ڈیم کے علاوہ صوبے میں دیہی شہری تفریق پر بات ہوئی اور اس بات پر اتفاق کیا گیا کہ ان مسائل کو مل کر حل کرنے کی ضرورت ہے۔

این ڈی خان نے ملاقات کے بارے میں کہا کہ یہ منزل کی طرف پہلا قدم ہے۔ ان کا کہنا تھا کہ پارٹی کے سربراہ آصف علی زرداری چاہتے ہیں کہ قوم کے درمیان مفاہمت ہو اور مرکز کے علاوہ پنجاب، صوبہ سرحد اور سندھ میں بھی اتفاق رائے سے حکومت بنائی جائے تاکہ ملک کو مسائل کے بھنور سے نکال کر آگے لے جایا جاسکے۔ انہوں نے کہا کہ’پہلی ملاقات میں ہمیں اچھا تاثر ملا ہے جو سندھ کے عوام کے لیے بھی نیک شگون ہے‘۔

ایم کیو ایم کے رہنما حیدر عباس رضوی نے کہا کہ ایم کیو ایم پورے ملک کو یہ پیغام دینا چاہتی ہے کہ وہ امن، رواداری اور برداشت کو فروغ دینے کے لیے جمہوری قوتوں سے قدم سے قدم ملا کر چلنا چاہتے ہیں۔انہوں نے کہا کہ ایم کیو ایم ملک کے وسیع تر مفاد میں پیپلز پارٹی سے ملک کی ترقی اور جمہوریت کے استحکام کے لیے تمام اقدامات میں غیرمشروط تعاون کرے گی۔