علی سلمان بی بی سی اردو ڈاٹ کام، لاہور

	نواز شریف نے کہا کہ اب قوم نے اپنا فیصلہ دیا ہے

قومی انتخابات کے نتائج مسلم لیگ (ن) کے حق میں آنے کے بعد وہ ماڈل ٹاؤن میں میڈیا کے نمائندوں سے گفتگو کر رہے تھے۔

میاں نواز شریف نے کہا کہ عدلیہ بحال ہوگی اور صدر مشرف کا معاملہ اسی عدلیہ کے پاس جائے گا جس کے زیر سماعت ان کے امیدوار ہونے کی اہلیت کا کیس تھا۔

صدر مشرف نے تین نومبر کو ایک’ پی سی او‘ کے تحت عدلیہ کو معزول کردیا تھا۔معزول ہونے والی عدلیہ میں اس بنچ کے اراکین بھی شامل تھے جو صدر مشرف کی اہلیت کا مقدمہ سن رہے تھے۔

نواز شریف نے کہا کہ وہ اپنے اس ایجنڈے پر کاربند ہیں جس کا وہ الیکشن سے پہلے اعلان کرتے رہے ہیں۔ان کا کہنا تھا کہ ان کا ایجنڈا عدلیہ اور جمہوریت کی بحالی، اور ہمیشہ کے لیے سیاست سے فوج کے کردار کے خاتمے کا ہے اور وہ اس ایجنڈے پر آج بھی اسی طرح سے کاربند ہیں۔

ہم کل( بدھ کو) اسلام آباد جا رہے ہیں جہاں ان کی آصف زرداری سے ملاقات متوقع ہے، سب مل بیٹھیں گے اور مستقبل کے بارے میں بات کریں گے نواز شریف

اب تک کے انتخابی نتائج سے لگتا ہے کہ نواز شریف اب دوبارہ حکومت سازی کے عمل میں شامل ہونے جا رہے ہیں۔ جب ان سے پوچھا گیا کہ کیا وہ کوئی مخلوط حکومت بنانے کا سوچ رہے ہیں تو انہوں نے کہا کہ وہ کل یعنی بدھ کو اسلام آباد جارہے ہیں جہاں ان کی آصف زرداری سے ملاقات متوقع ہے جبکہ انہوں نے عوامی نیشنل پارٹی کے اسفند یار ولی کو بھی اسلام آباد بلایا ہے۔

نواز شریف نے کہا کہ سب مل بیٹھیں گے اور مستقبل کے بارے میں بات کریں گے۔نواز شریف نے مسلم لیگ نون کی سینٹرل ورکنگ کمیٹی کا اجلاس بھی اسلام آباد میں طلب کرلیا ہے جہاں وہ اپنے ساتھیوں سے مستقبل کے لائحہ عمل پر صلاح ومشورہ کریں گے۔

میاں نواز شریف نے کہا کہ انتخابات کے دوران ان پر کئی وار کیے گئے۔انہوں نے کہا کہ ’ہم نے الیکشن ایسے لڑے کہ جیسے ہم چاروں طرف سے دشمنوں میں گھرے ہوں۔

انہوں نے کہا کہ وہ ابھی بھی دھاندلی کے خلاف لڑ رہے ہیں کیونکہ آج بھی این اے ایک سو پچاس سے ان کے جیتے ہوئے امیدوارکو نتائج میں گڑ بڑ کرکے ہارا ہوا قرار دے دیا گیا ہے۔

نواز شریف نے کہا کہ وہ نہیں بلکہ میڈیا کہہ رہا کہ قوم نے بڑے بڑے برج الٹ دیے ہیں۔ان کے کہنا تھا کہ ’قاف لیگ والوں کو اللہ نے فارغ کیا ہے۔‘

دہشت گردی کے خلاف جنگ کے بارے میں انہوں نے مزید کوئی بات کرنے سے انکار کردیا اور کہا کہ اس بارے میں وہ اپنا موقف پہلے ہی واضح کرچکے ہیں اور اس پر قائم ہیں۔

ایک سوال کے جواب میں انہوں نےکہا کہ اگر تمام سیاسی جماعتیں واقعی انتخابات کا بائیکاٹ کرتیں تو وہ بھی بائیکاٹ کردیتے۔