పిడుగుపాటుతో చనిపోయిన నాలుగు అరుదైన గొరిల్లాలు

అరుదైన మౌంటెయిన్ గొరిల్లాలు నాలుగు పిడుగుపాటుతో చనిపోయాయని వాటి సంరక్షణకు కృషి చేసే సంస్థ ఒకటి తెలిపింది.

ఆఫ్రికాలో యుగాండాలోని ఎంగహింగా నేషనల్ పార్క్‌లో ఈ జంతువులు చనిపోయాయి. వీటిలో మూడు ఆడవి, మరొకటి చిన్న మగ గొరిల్లా. వీటిలో ఒకటి గర్భంతో ఉంది.

పిడుగుపాటు వల్ల పెద్ద పెద్ద గాయాలైన ఆనవాళ్లు ఈ గొరిల్లాల కళేబరాలపై ఉన్నాయి.

వీటి మరణం మౌంటెయిన్ గొరిల్లా జాతికి అపారమైన నష్టమని 'గ్రేటర్ విరుంగా ట్రాన్స్‌బౌండరీ కొలాబరేషన్ (జీవీటీసీ)' విచారం వ్యక్తం చేసింది.

వీటి మృతి చాలా బాధాకరమని జీవీటీసీ కార్యనిర్వాహక కార్యదర్శి ఆండ్రూ సెగుయా బీబీసీతో చెప్పారు. చనిపోయిన మూడు ఆడ గొరిల్లాలు బతికి ఉంటే వీటి సంతతి పెరగడానికి ఎంతో దోహదపడేవన్నారు.

ఈ నాలుగు గొరిల్లాల కళేబరాల నుంచి సేకరించిన నమూనాలతో పోస్టుమార్టం నిర్వహించారని, వీటి మరణానికి కారణం మూడు వారాల్లో నిర్ధరణ అవుతుందని జీవీటీసీ వివరించింది.

ఉన్నవి వెయ్యే

ప్రపంచంలో మౌంటెయిన్ గొరిల్లాలు దాదాపు వెయ్యి మాత్రమే ఉన్నాయి. డెమొక్రటిక్ రిపబ్లిక్ ఆఫ్ కాంగో, రువాండా, యుగాండా దేశాల్లోని నిర్ణీత సురక్షిత ప్రాంతాలకే ఇవి పరిమితమయ్యాయి.

అధికారులు హిర్వా కుటుంబం అని పిలిచే 17 గొరిల్లాల సమూహంలో ఈ నాలుగూ భాగంగా ఉండేవి. ఇవన్నీ నిరుడు రువాండా నుంచి యుగాండాలోకి ప్రవేశించాయి. అన్నీ ఎంగహింగా నేషనల్ పార్క్‌లోనే ఉంటున్నాయి.

యుగాండా, రువాండా, కాంగో సరిహద్దుల్లోని విరుంగా మాసిఫ్ పర్వత ప్రాంతంలో ఈ పార్క్ ఉంది.

2008లో ప్రపంచంలో మౌంటెయన్ గొరిల్లాలు ఇంచుమించు ఆరు వందలే ఉండేవి.

సంరక్షణ చర్యలతో వీటి సంఖ్య గణనీయంగా పెరిగింది.

'అంతరించిపోయే ముప్పు అత్యంత తీవ్రంగాగల జంతువుల జాబితా' నుంచి 2018లో మౌంటెయిన్ గొరిల్లాలను తొలగించారు.

వీటిని వేటాడటాన్ని అడ్డుకోవడంతోపాటు ఇతర సంరక్షణ చర్యలను పెద్దయెత్తున చేపట్టడంతో సానుకూల ఫలితాలు వచ్చాయి. దీంతో వీటిని ఈ జాబితా నుంచి 'అంతరించిపోయే ముప్పు గల జంతువుల జాబితా'లోకి మార్చారు.

ఇవి కూడా చదవండి:

(బీబీసీ తెలుగును ఫేస్‌బుక్, ఇన్‌స్టాగ్రామ్‌, ట్విటర్‌లో ఫాలో అవ్వండి. యూట్యూబ్‌లో సబ్‌స్క్రైబ్ చేయండి.)