హారీపోటర్ నటి ఎమ్మా వాట్సన్: ‘నాకు నేనే భాగస్వామి’గా ఎంతో సంతోషంగా ఉన్నా

ముప్ఫయ్యేళ్ల వయసులోకి రావడంతో వ్యక్తిగత జీవితం విషయంలో తాను ఒత్తిడికి లోనవుతున్నానని హాలీవుడ్ నటి ఎమ్మా వాట్సన్ అన్నారు.

ఆ వయసుకి ఏం సాధించాలనే దానిపై అంతర్లీన సందేశాల ప్రవాహం ఒత్తిడికి గురిచేస్తోందని అన్నారు.

''భర్త, పిల్లలు లేకపోతే ఒక వయసు వచ్చాక నమ్మశక్యం కానంత ఆందోళన ఉంటుంది'' అని బ్రిటిష్ వోగ్‌తో ఆమె చెప్పారు.

అయితే, తాను 'నాకు నేనే భాగస్వామి'గా సంతోషంగానే ఉన్నానని చెప్పారు.

ఒంటరిగా ఉంటూనే సంతోషంగా ఉండొచ్చని తాను గతంలో అనుకోలేదని ఈ హ్యారీ పోటర్ సినిమాల నటి చెప్పుకొచ్చారు.

మహిళా హక్కుల కోసం కూడా పనిచేసే ఎమ్మా ఏప్రిల్‌లో 30ల్లోకి అడుగుపెట్టారు. ''నాకు 30 ఏళ్లొస్తే ఎందుకంత పెద్ద విషయం చేస్తారు దాన్ని? అదేమైనా పెద్ద విషయమా? ఓరి దేవుడో.. చాలా ఒత్తిడి అనుభవిస్తున్నాను'' అన్నారామె.

''30ల్లోకి రాగానే హఠాత్తుగా చుట్టూ వినిపించే అంతర్లీన సందేశాల ఫలితంగానే ఒత్తిడికి గురవుతున్నట్లు అర్థం చేసుకున్నాను.. ముఫ్పయ్యేళ్లొచ్చినా పెళ్లి చేసుకుని పిల్లలను కనకపోతే, ఇల్లు కట్టుకోకపోతే, కెరీర్‌లో స్థిరత్వం రాకపోతే.. ఆందోళన, ఒత్తిడి మొదలైపోతుంది'' అన్నారామె.

ఎమ్మా రాబోయే చిత్రం లిటిల్ ఉమెన్ అనుసరణలో, తిమోతీ చలమెట్, సావోయిర్స్ రోనన్, ఫ్లోరెన్స్ పగ్‌లతో కలిసి నటించింది.

సహ-నటులు లారా డెర్న్, మెరిల్ స్ట్రీప్‌తో కలిసి పనిచేశారు. ఇందులో ఆమె నిజంగా ఆనందించినట్లు చెప్పారు.

"మేం లిటిల్ ఉమెన్ చేసే ముందు మా ముగ్గురం ఒకరికొకరు తెలుసు" అని ఆమె డిసెంబర్ సంచిక కోసం బ్రిటిష్ వోగ్‌తో అన్నారు.

"మేం ఉద్యమ ప్రదేశాల్లో కలుసుకున్నాం, కాబట్టి మేం ఎప్పుడైనా కలిసి పనిచేయడానికి ముందు ఒక నిర్దిష్ట ఉద్యమంలో భాగమైన కార్యకర్తలుగా ఈ మిత్రత్వం, సంఘీభావం మా మధ్య ఎప్పుడూ ఉంటుంది."

ఈ ఏడాది రానున్న 'లిటిల్ ఉమెన్' చిత్రంలో ఎమ్మా నటిస్తున్నారు. ఈ చిత్రంలోని సహనటులు లారా డెర్న్, మెరిల్ స్ట్రీప్‌లతో కలిసి పనిచేయడం చాలా సంతోషంగా ఉందని ఆమె చెప్పారు.

ఎమ్మా వాట్సన్ యూఎన్ ఉమెన్ గుడ్‌విల్ అంబాసిడర్‌గా ఉన్నారు. ప్రపంచవ్యాప్తంగా లింగ సమానత్వం కోసం పోరాడుతున్న 'హి ఫర్ షీ' ప్రచార కార్యక్రమంలోనూ ఆమె భాగస్వామి.

ఆ ప్రచార కార్యక్రమంలో భాగంగానే ఆమె నోబెల్ శాంతి బహుమతి విజేత మలాలాను ఇంటర్వ్యూ చేశారు.

స్త్రీవాదిగా తనను ప్రపంచమంతా గుర్తించడానికి కారణం ఎమ్మాయేనని.. ఇకపై ఆ గుర్తింపును వాడుకోవడానికి మొహమాటపడనని మలాలా అన్నారు.

ఇవి కూడా చదవండి:

(బీబీసీ తెలుగును ఫేస్‌బుక్, ఇన్‌స్టాగ్రామ్‌, ట్విటర్‌లో ఫాలో అవ్వండి. యూట్యూబ్‌లో సబ్‌స్క్రైబ్ చేయండి.)