996 విధానం అంటే ఏంటి? ‘ఆలీబాబా’ జాక్ మా దీన్ని ఎందుకు సమర్థిస్తున్నారు?

16 ఏప్రిల్ 2019

చైనా బిలియనీర్, ఆన్ లైన్ షాపింగ్ దిగ్గజం ఆలీబాబా సహ వ్యవస్థాపకుడు జాక్ మా "ఉదయం 9 నుంచి రాత్రి 9 వరకూ ఆరు రోజులూ" పనిచేసే విధానం ఉండాలనే వాదనను కొనసాగిస్తున్నారు.

'996'గా పిలుస్తున్న ఈ విధానం గురించి ప్రస్తుతం చైనీస్ మీడియాలో జోరుగా చర్చలు సాగుతున్నాయి.

ఈ విధానాన్ని జాక్ మా గట్టిగా సమర్థిస్తున్నారు. చైనాలో దీన్ని ప్రవేశపెట్టాలని ఆయన అంటున్నారు.

లేకపోతే చైనా ఆర్థిక వ్యవస్థ సత్తువ కోల్పోయి, వృద్ధి వేగం కుంటుపడే అవకాశాలు ఎక్కువగా ఉన్నాయని వాదిస్తున్నారు.

జాక్ మా నెలకొల్పిన ఇ-కామర్స్ సంస్థ అలీబాబా.. అమెజాన్, గూగుల్ వంటి వాటికి పోటీగా అతిపెద్ద ఆన్ లైన్ షాపింగ్ సంస్థల్లో ఒకటిగా అవతరించింది.

ఆ సంస్థ మార్కెట్ విలువ సుమారు రూ.34 లక్షల కోట్లు. జాక్ మా వ్యక్తిగత సంపద రూ.2.7 లక్షల కోట్లని అంచనా.

996 విధానం అంటే ఏంటి?

ఉదయం తొమ్మిది గంటల నుంచి రాత్రి తొమ్మిది గంటల వరకు... వారానికి ఆరు రోజులు పనిచేయడాన్ని ‘996 విధానం’ అని చైనాలో పిలుస్తున్నారు.

అంటే రోజుకు పన్నెండు గంటలు పని చేయాలన్నమాట.

Skip ఎక్కువమంది చదివినవి and continue reading

ఎక్కువమంది చదివినవి

End of ఎక్కువమంది చదివినవి

దీనిపై చైనాలో కొందరు తీవ్రంగా విమర్శలు చేస్తున్నారు.

బీజింగ్ కేంద్రంగా పనిచేసే న్యాయ సలహాల కంపెనీ వుసాంగ్ నెట్‌వర్క్ టెక్నాలజీకి చెందిన సీనియర్ లీగల్ కౌన్సెల్ జంగ్ షియొలిన్ బీబీసీతో మాట్లాడుతూ.. ‘‘996 పని విధానం చట్టానికి వ్యతిరేకం’’ అని చెప్పారు.

చైనాకే చెందిన మరో టెక్ ఎంట్రప్రెన్యూర్, జేడీ.కామ్ ఇ-కామర్స్ సంస్థ అధినేత రిచర్డ్ లియూ కూడా '996 విధానం'పై జాక్ మాతో గొంతు కలుపుతున్నారు.

ఆర్థిక వృద్ధి వేగం ఏళ్లపాటు కొనసాగడంతో చైనాలో 'పని ఎగ్గొట్టేవారు' ఎక్కువయ్యారని లియూ అంటున్నారు.

1970ల చివరి నుంచి 2000ల మధ్య కాలం వరకూ 25 ఏళ్లకు పైగా చైనా సగటు ఆర్థిక వృద్ధి 10 శాతం మించి నమోదైంది. ఆ తర్వాత కాలంలో మందగించి 6 శాతం దగ్గరికి వచ్చింది.

జేడీ.కామ్ ఉద్యోగులను తొలగిస్తోందని వార్తలు వస్తున్న తరుణంలో లియూ తాజా వ్యాఖ్యలు చేశారు.

''గత నాలుగేళ్లలో మేం ఎవర్నీ తీసివేయలేదు. ఫలితంగా సిబ్బంది సంఖ్య బాగా పెరిగింది. ఆదేశాలు ఇచ్చేవారు ఎక్కువయ్యారు. పనిచేసేవారు తగ్గిపోయారు. పరిస్థితి ఇలాగే కొనసాగితే సంస్థ మార్కెట్‌లో స్థానం కోల్పోవాల్సి వస్తుంది'' అని లియూ అన్నారు.