వ్యాధి నిరోధక టీకాలు పాశ్చాత్య దేశాల కుట్రా?... టీకాలపై ప్రపంచవ్యాప్తంగా ఉన్న అపోహలు-వాస్తవాలు

తమ దేశంలో మళ్లీ తట్టు వ్యాధి వ్యాపించిందని ఫిబ్రవరి 7న ఫిలిప్పీన్స్ ప్రకటించింది. 2018తో పోల్చితే 74 శాతం కేసులు పెరిగాయని అక్కడి ఆరోగ్య అధికారులు తెలిపారు.

అత్యంత తీవ్రమైన ఈ అంటువ్యాధి ప్రబలి 2017లో ప్రపంచవ్యాప్తంగా లక్ష మందికి పైగా మరణించినట్లు ప్రపంచ ఆరోగ్య సంస్థ వెల్లడిచింది.

ఈ వ్యాధిని తగ్గించే టీకాపై ఫేక్ న్యూస్ వ్యాపించడంతో పాటు ఆరోగ్య వ్యవస్థలు కుప్పకూలడం కారణంగా తట్టు వ్యాధి ప్రపంచవ్యాప్తంగా 30 శాతం పెరిగిందని గత నవంబర్‌లో విడుదల చేసిన నివేదికలో ప్రపంచ ఆరోగ్య సంస్థ వెల్లడించింది.

అమెరికా, యూరప్ ప్రాంతాల్లో ఈ వ్యాధి ఎక్కువగా ప్రబలిందని డబ్ల్యూహెచ్‌వో తెలిపింది.

‘‘టీకాల వల్ల ప్రయోజనాలన్నాయని శాస్త్రీయంగా ఆధారాలున్నాయి. అయితే వాటిని నమ్మకుండా చాలా మంది అపోహలతో టీకాలు వేయించడానికి నిరాకరిస్తున్నారు. దీని వల్ల ప్రపంచ వ్యాప్తంగా ఈ వ్యాధి ప్రబలుతోంది’’ అని ఆ సంస్థ వెల్లడించింది.

టీకాలు వేయించడానికి నిరాకరిస్తున్న వారి అపోహలేంటి? వాటి వెనుకున్న నిజాలేంటి?

1. టీకాలు వేస్తే ఆటిజం వస్తుంది

బ్రిటన్‌కు చెందిన సర్జన్ అండ్రెవ్ వేక్‌ఫీల్డ్ తెచ్చిన ఉద్యమం మూలంగా గత దశాబ్దంలో టీకాల కార్యక్రమం కొన్ని దేశాల్లో తగ్గుముఖం పట్టింది.

1997లో ప్రతిష్టాత్మక మెడికల్ జర్నల్ ది లాన్‌సెట్‌లో వేక్‌ఫీల్డ్ రాసిన వ్యాసం వైద్యరంగంలో కలకలం రేపింది. తట్టు, గవద బిల్లలు, పొంగు (ఎంఎంఆర్) వ్యాధుల నివారణకు వేసే టీకాలకు ఆటిజంకు సంబంధం ఉందని ఆయన తన వ్యాసంలో పేర్కొన్నారు.

అయితే, ఎంఎంఆర్‌కు ఆటిజంకు సంబంధం లేదని అనేక అధ్యయనాలు నిరూపించాయి. ది లాన్‌సెట్ జర్నల్ కూడా వేక్‌ఫీల్డ్ వ్యాసాన్ని ఉపసంహరించుకుంది.

కానీ, అప్పటికే జరగాల్సిన నష్టం జరిగిపోయింది. అతని ఆరోపణల కారణంగా యూకేలో ఎంఎంఆర్ టీకాల రేటు 1996లో 92 శాతం ఉంటే 2002 నాటికి 84 శాతానికి పడిపోయింది. తర్వాత అది 91 శాతానికి పెరిగింది. కానీ, ఇది ప్రపంచ ఆరోగ్య సంస్థ సూచించిన 95 శాతాని కంటే తక్కువే.

2. పిల్లల వ్యాధి నిరోధక వ్యవస్థ అనేక టీకాలను ఎదుర్కోలేదు

రెండేళ్ల చిన్నారులకు కచ్చితంగా వేయాల్సిన టీకాలు 11 వరకు ఉన్నాయి. దీంతో కొంతమంది తల్లిదండ్రులు తమ చిన్నారులకు ఇన్ని టీకాలు వేయిస్తే వారి వ్యాధి నిరోధక శక్తి దీన్ని అదుపు చేయలేదని ఆందోళన చెందుతున్నారు.

టీకాల వల్ల చిన్నారుల శరీరంలోకి ప్రవేశించే వైరస్, బ్యాక్టీరియాల వల్ల వ్యాధులు వస్తాయని వారు ఆందోళన చెందుతున్నారు. అయితే, శాస్త్రవేత్తలు మాత్రం దీనిపై మరో వాదన వినిపిస్తున్నారు.

ఏదైనా వ్యాధి ప్రబలినప్పుడే టీకాల ద్వారా ఇచ్చిన వైరస్‌లు వాటిపై ప్రతిదాడి చేస్తాయని, చిన్నారులను ఆ విధంగా జబ్బులకు దూరంగా ఉంచుతాయని అంటున్నారు. పలు రకాల టీకాలకు, నవజాత శిశువుల్లో వ్యాధి నిరోధక వ్యవస్థకు ఉన్న సంబంధంపై అమెరికాకు చెందిన డాక్టర్ పౌల్ ఏ. ఆఫిట్ ఆధారాలతో సహా ఒక వ్యాసం ప్రచురించారు.

ఇందులో ‘‘పుట్టిన కొద్ది గంటల్లోనే నవజాత శిశువులకు టీకాలను తట్టుకునే వ్యాధి నిరోధక సామర్థ్యం వస్తుంది’’ అని ఆయన తెలిపారు.

3. టీకా మందులు పుట్టకముందే ఈ వ్యాధులు అంతరించాయి

సామాజిక ఆర్థిక పరిస్థితులు బాగుంటే, పౌష్టికాహారం అందించగలిగితే అలాగే పరిసరాలు పరిశుభ్రంగా ఉంటే పిల్లలకు టీకాలు వేయించాల్సిన అవసరం ఉండదని కొందరి భావన.

ఇది కొంతమేర నిజమే కావొచ్చు. జీవించే పరిస్థితులు మెరుగ్గా ఉన్న చోట మరణాల రేటు తక్కువగానే ఉంటుంది. కొన్ని వ్యాధులు అంతరించిపోవచ్చు. కానీ, ఇతర చోట్ల నుంచి ఈ వ్యాధులు ప్రబలే అవకాశం ఉంది.

4. టీకాలు వేయించుకున్నవారే ఎక్కువ జబ్బుపడుతున్నారు

టీకాలు వేయించుకున్నవారే ఎక్కువ జబ్బుపడుతున్నారని టీకా మందుల వ్యతిరేక ఉద్యమకారులు వాదిస్తున్నారు.

ఏ టీకా కూడా 100 శాతం ప్రభావం చూపదని అంటున్నారు. ప్రపంచ ఆరోగ్య సంస్థ కూడా వ్యాధి నిరోధక టీకాల వల్ల 85 శాతం నుంచి 95 శాతం వరకే ప్రభావం ఉంటుందని చెబుతోంది.

కానీ, టీకాలు వేయించుకున్న వారే ఎక్కువ జబ్బు పడుతున్నారడానికి ఎలాంటి శాస్త్రీయ ఆధారాలు లేవు.

5. టీకాల వెనుక ఫార్మా కంపెనీల వ్యాపార ఆకాంక్షలున్నాయి

డబ్ల్యూహెచ్‌వో ఆరోగ్య ఆర్థిక వేత్త మిలౌడ్ ప్రకారం 2013లో ప్రపంచవ్యాప్తంగా టీకా మందుల మార్కెట్ విలువ రూ. 17 లక్షల కోట్ల వరకు ఉంటుందని అంచనా.

ఇటీవల ఈ మార్కెట్ మరింత పెరిగింది. చైనా లాంటి దేశాల్లో కూడా రోగ నిరోధక కార్యక్రమాలు వేగంగా పెరగడం, మైక్రోసాఫ్ట్ర్ అధినేత బిల్ గేట్స్ ఇలాంటి కార్యక్రమాలు భారీస్థాయిలో చేపట్టడం ఇందుకు కారణంగా చెప్పొచ్చు.

అయితే, జాన్ హాప్కిన్స్ యూనివర్సిటీ 2016లో చేసిన అధ్యయనం ప్రకారం టీకా కార్యక్రమాలపై 94 దేశాలలో ఒక్క డాలరు ఖర్చు పెడితే ఆరోగ్యంపై భవిష్యత్తులో పెట్టే 16 డాలర్ల ఖర్చును తగ్గించినట్లు అవుతుందని పేర్కొంది.

6. మా దేశంలో ఈ వ్యాధి ఎప్పుడో అంతమైంది ఇక టీకాల అవసరమే లేదు

అనేక దేశాల్లో టీకా మందులతో నివారించగలిగే వ్యాధులు తగ్గినా, అవి ప్రపంచవ్యాప్తంగా నియంత్రణలో ఉన్నాయని చెప్పలేం.

కొన్ని దేశాల్లో కొన్ని రకాల వ్యాధులు పూర్తిగా అంతరించాయి. కానీ, ప్రపంచవ్యాప్తంగా అవి ప్రబలంగానే ఉన్నాయి.

ప్రపంచీకరణ మూలంగా ఒక దేశంలో ప్రబలిన వ్యాధులు మరో దేశంలోకి చాలా తేలిగ్గా వ్యాపించే అవకాశం ఉంది.

7. టీకాలలో విషరసాయనాలుంటాయి

పిల్లలకు ఇచ్చే టీకాలలో ఫార్మాల్డిహైడ్, పాదరసం, అల్యూమినియం అవశేషాలుంటాయని కొందరు తల్లిదండ్రులు ఆందోళన చెందుతున్నారు. ఈ మూలకాలు, రసాయనాలు ఒక స్థాయికి మించి తీసుకుంటే ప్రాణానికే ప్రమాదం.

అయితే, తల్లిదండ్రులు ఆందోళన చెందే స్థాయిలో ఇలాంటి మూలకాలు టీకాలలో ఉండవని యూఎస్ ఫుడ్ అండ్ డ్రగ్ అడ్మినిస్ట్రేషన్ తెలిపింది. 0.5 మిల్లీలీటర్ల మోతాదులో కేవలం 25 మైక్రోగ్రాముల పాదరసం మాత్రమే ఉంటుందని పేర్కొంది. 85 గ్రాములుండే టూనా చేపలోనూ ఇదే పరిమాణంలో పాదరసం ఉంటుందని చెప్పింది.

8. టీకాలు పాశ్చాత్య దేశాల కుట్ర

పోలియో టీకాల వల్ల బాలికల్లో గర్భస్త్రావానికి బీజాలు వేసినట్లు అవుతుందని, హెచ్‌ఐవీ వ్యాపిస్తుందని ఉత్తర నైజీరియాలో నమ్మకాలు ప్రబలడంతో అక్కడ పల్స్ పోలియో కార్యక్రమం బెడిసికొట్టింది. ఆరోగ్య కార్యకర్తలపై స్థానిక ప్రజలు దాడులకు దిగారు. అఫ్ఘానిస్థాన్, పాకిస్తాన్‌లలో కూడా ఇదే పరిస్థితి ఉంది.

అపోహల కారణంగా ఈ దేశాలలో పోలియో మహమ్మారి ఇంకా ప్రబలుతోంది. అయితే కొన్ని దేశాల్లో వ్యాధి నిరోధక టీకా కార్యక్రమాల వెనక వేరే ఉద్దేశాలు ఉండటం కనిపిస్తోంది.

2011 మార్చిలో అమెరికా ఇంటెలిజెన్స్ వ్యవస్థ హెపటైటిస్- బీ టీకాల పేరుతో పాకిస్తాన్‌లో ఒక కార్యక్రమం నిర్వహించింది. ఆల్ ఖైదా అధినేత ఒసామా బిన్ లాడెన్ డీఎన్‌ఏను, అతని ఆచూకీని కనిపెట్టేందుకు ఈ పని చేసింది.

తర్వాత కాలంలో ఈ విషయం బయట పడటంతో అక్కడ టీకా కార్యక్రమంపై మరింత వ్యతిరేకత వ్యక్తమవుతోంది.

ఇవి కూడా చదవండి:

(బీబీసీ తెలుగును ఫేస్‌బుక్, ఇన్‌స్టాగ్రామ్‌, ట్విటర్‌లో ఫాలో అవ్వండి. యూట్యూబ్‌లో సబ్‌స్క్రైబ్ చేయండి.)