ఫొటోల్లో ప్రపంచ మెట్రో రైలు చరిత్ర

బ్రిటన్: ప్రపంచంలో తొలి మెట్రోపాలిటన్ రైలు వ్యవస్థను లండన్‌లో 1863లో ప్రారంభించారు. భూగర్భం ద్వారా రైల్వే లైన్లు వేశారు. తొలిరోజు దాదాపు 30,000 మంది ప్రయాణించారు. విద్యుత్‌తో నడిచే తొలి రైలు 1890లో ప్రారంభమైంది. ఈ చిత్రంలో ఉన్నది లండన్‌లోని ప్రయిడ్ స్ట్రీట్‌లో ప్రయాణిస్తున్న తొలి మెట్రో రైలు.

బ్రిటన్: 1863లో మెట్రో ట్రైల్ రన్ సందర్భంగా పోర్ట్‌ల్యాండ్ రోడ్ స్టేషన్ వద్ద గాలిలో టోపీలు ఊపుతూ ఆనందం వ్యక్తం చేస్తున్న ప్రయాణికులు. తొలుత మెట్రో లైన్లు ప్రైవేటు కంపెనీల అధీనంలో ఉండేవి.

బ్రిటన్: ప్రభుత్వ అధీనంలోని లండన్ అండర్‌గ్రౌండ్ లిమిటెడ్ ప్రస్తుతం మెట్రోను నిర్వహిస్తోంది. ప్రస్తుతం 270 స్టేషన్లు, 400 కిలోమీటర్ల నెటవర్క్ ఉంది. రోజుకు సుమారు 50 లక్షల మంది ఈ రైళ్ల ద్వారా ప్రయాణిస్తారు. 1983లో తొలిసారి ట్రావెల్ కార్డు‌, 2003లో కాంటాక్ట్‌లెస్ కార్డ్‌ను తీసుకొచ్చింది. లండన్‌లో పార్సన్స్ గ్రీన్ స్టేషన్ వద్ద ఉన్న భూగర్భంలో ప్రయాణించే మెట్రో రైలును ఈ చిత్రంలో చూడొచ్చు.

బ్రిటన్: లండన్ మెట్రో రైలు వ్యవస్థలో మొత్తం 11 లైన్లు ఉంటాయి. దాదాపు 12 మెట్రో డిపోలు ఉన్నాయి. బ్యాంకర్ స్ట్రీట్ స్టేషన్‌ వద్ద మెట్రో‌లో బ్రిటన్ రాణి ఎలిజబెత్-2.

అమెరికా: న్యూయార్క్ సిటీ సబ్‌వే మెట్రో రైలు వ్యవస్థను 1904లో ప్రారంభించారు. 2014 నాటికి ఇది 110 సంవత్సరాలు పూర్తి చేసుకుంది. రోజులో 24 గంటలూ ఇది సేవలు అందిస్తూ ఉండటం విశేషం. ఈ చిత్రంలో ఉన్నది 34 స్ట్రీట్, హడ్సన్ యార్డ్స్ స్టేషన్‌లోని మెట్రో రైలు.

అమెరికా: ప్రపంచంలో అతి ఎక్కువ స్టేషన్లు ఉన్నది న్యూయార్క్ సిటీ సబ్‌వే మెట్రోలోనే. దాదాపు 472 స్టేషన్లు ఉన్నాయి. రోజుకు సుమారు 60 లక్షల మంది ఈ మెట్రో ద్వారా ప్రయాణిస్తారు.

అర్జెంటీనా: లాటిన్ అమెరికాలో తొలి మెట్రో బ్యూనోస్ ఎయిరీస్ అండర్‌గ్రౌండ్. దీన్ని 1913లో ప్రారంభించారు. 100 ఏళ్లపాటు చెక్కతో తయారు చేసిన బోగీలను వినియోగించారు. 2013లో వీటి స్థానంలో అధునాతన బోగీలు ప్రవేశపెట్టారు. ఆధునిక, పాత బోగీలను చిత్రంలో చూడొచ్చు.

జపాన్‌: టోక్యో సబ్‌వే మెట్రోను 1927లో ప్రారంభించారు. ప్రపంచంలో ఎక్కువ ప్రవేశ ద్వారాలు గింజా మెట్రో స్టేషన్‌కు ఉన్నాయి. ఈ ద్వారాల సంఖ్య దాదాపు 48. ప్రపంచవ్యాప్తంగా భూగర్భ స్టేషన్లలో ఇది అతిపెద్దది.

రష్యా: మాస్కో మెట్రో 1935లో ప్రారంభమైంది. నాటి సోవియట్ యూనియన్‌లో ఇది మొదటి భూగర్భ రైలు వ్యవస్థ. తొలి రైలులో స్టాలిన్ ప్రయాణించినట్లు నాటి కమ్యూనిస్ట్ పార్టీ అధికార పత్రిక ప్రవ్దా వెల్లడించింది.

రష్యా: ప్రపంచంలో అందమైన మెట్రోలలో మాస్కో ఒకటిగా ఉంది. ఇక్కడి స్టేషన్లను ఆకట్టుకునేలా రూపొందించారు. పార్క్ పొబెడీ ప్రపంచంలో అతి లోతైన భూగర్భ మెట్రో స్టేషన్‌గా గుర్తింపు పొందింది.

చైనా: బీజింగ్ సబ్‌వే ప్రపంచంలో రెండో అతి పెద్ద మెట్రో రైలు వ్యవస్థగా ఉంది. 1969లో దీన్ని ప్రారంభించారు. రోజుకు సగటున 90 లక్షల మంది ఇందులో ప్రయాణిస్తున్నారు.

చైనా: షాంఘై సబ్‌వే‌ను 1993లో ప్రారంభించారు. ప్రయాణించే దూరంగా ఆధారంగా చూస్తే ప్రపంచంలో ఇదే అతి పెద్ద మెట్రో వ్యవస్థ. ప్రతిరోజూ సగటున 90 లక్షల మంది ప్రయాణిస్తారు.

భారత్: కోల్‌కతా మెట్రో దేశంలో మొదటిది. 1984లో కార్యకలాపాలు ప్రారంభించింది. ప్రతి రోజూ సగటున 6-7 లక్షల మంది ప్రయాణిస్తారు.

మా ఇతర కథనాలు:

(బీబీసీ తెలుగును ఫేస్‌బుక్, ఇన్‌స్టాగ్రామ్‌, ట్విటర్‌లో ఫాలో అవ్వండి. యూట్యూబ్‌లో సబ్‌స్క్రైబ్ చేయండి.)