మన్మోహన్ సింగ్ ప్రభుత్వం ఒక్క ఆయుధాన్ని కూడా కొనలేదా, ఆర్ధిక మంత్రి నిర్మలా సీతారామన్ వాదనలో నిజమెంత? - బీబీసీ ఫ్యాక్ట్‌ చెక్

భారతదేశ రక్షణశాఖ చరిత్రలో 2014 సంవత్సరానికి ముందు పదేళ్ల కాలంలో సాయుధ దళాల కోసం ఒక్క ఆయుధాన్ని కూడా కొనలేదని, తద్వారా భారత సైన్యాన్ని అప్పటి ప్రభుత్వం నిస్సహాయంగా మార్చిందని ఆర్ధిక మంత్రి నిర్మలా సీతారామన్ అన్నారు.

రాజ్యసభలో సభ్యులు అడిగిన ప్రశ్నకు జవాబుగా, మార్చి 21, 2022న మంత్రి ఈ ప్రకటన చేశారు. ఆర్ధిక మంత్రి కాక ముందు నిర్మలా సీతారామన్ రక్షణమంత్రిగా పని చేశారు. 47 నిమిషాలపాటు మంత్రి చేసిన ఈ ప్రసంగం సంసద్ టీవీలో ప్రసారమైంది. మంత్రి కార్యాలయం ఆ వీడియోను ట్వీట్ ద్వారా షేర్ చేసింది.

ఆయుధాల కొనుగోలు వ్యవహారం ఆమె మాటల్లోనే:

''పదేళ్ల భారత రక్షణ రంగ చరిత్రలో ఒక్క ఆయుధాన్ని కూడా కొనలేదు. పదేళ్లు అలా ఒక్క ఆయుధం కూడా కొనకుండా గడిచి పోయాయి. అందుకే, 2014 తర్వాత పిన్నుల నుంచి విమానాల వరకు చాలా కొనుగోళ్లు వేగంగా చేయాల్సి వచ్చింది. మన సైన్యాన్ని ఎలా బలహీన పరిచారో చెప్పే ఆధారాలను మళ్లీ మళ్లీ చదువుతాను. ఏదీ రాత్రికి రాత్రే మారిపోదు. పాత ప్రభుత్వం చేసిన తప్పిదాలను మేం సరిచేస్తున్నాం. (మరో ప్రశ్నకు సమాధానమిస్తూ) పదేళ్ల పాటు ఏమీ కొనకుండా ఉండటం చిన్న విషయం కాదు. దాన్ని అంగీకరించాలి. పదేళ్లలో కొనాల్సిన వాటిని ఏడేళ్లలో కొనాల్సి వచ్చింది. దీనికి మీరు మమ్మల్ని అభినందించాలి'' అన్నారు నిర్మలా సీతారామన్.

దివంగత రక్షణ మంత్రి అరుణ్ జైట్లీ, ప్రస్తుత రక్షణ మంత్రి రాజ్‌నాథ్‌సింగ్‌ ఆధ్వర్యంలోని మంత్రిత్వ శాఖ ఆడిట్ నివేదికల ఆధారంగా తాను ఈ విషయాలు చెబుతున్నాని ఆర్ధిక మంత్రి వెల్లడించారు. ఆ పదేళ్ల కాలంలో ఎలాంటి కొనుగోళ్లు లేకపోవడం వల్ల సైన్యం నిస్సహాయంగా మారిందని మంత్రి అన్నారు.

ఈ వాదనలో వాస్తవమెంత?

అయితే, రక్షణ మంత్రిత్వ శాఖ నుంచి సంపాదించిన పదేళ్ల రికార్డులను పరిశీలిస్తే, మంత్రి వాదనకు భిన్నంగా కొన్ని రక్షణ కొనుగోళ్లు జరిగినట్లు తేలింది. ఇందులో షిప్‌లు, సబ్‌మెరైన్‌లు, మిస్సైళ్లు, ఎయిర్‌క్రాఫ్ట్‌లు కూడా ఉన్నట్లు స్పష్టమైంది.

రక్షణ మంత్రిత్వ శాఖ పార్లమెంటుకు అందించిన నివేదికలు, వార్షిక రిపోర్టు (మంత్రిత్వ శాఖ వెబ్‌సైట్‌లో అందుబాటులో ఉన్నాయి)లను బీబీసీ పరిశీలించింది.

ఆ నివేదికల ప్రకారం కొన్ని కొనుగోళ్లు జరిగినట్లు తేలింది. అవి:

ఫిబ్రవరి 2014లో, అంటే యూపీఏ ప్రభుత్వపు చివరి నెలల్లో తాము రక్షణ రంగ ఆయుధాల కోసం చేసిన ఖర్చును ప్రభుత్వం పార్లమెంటుకు తెలియజేసింది. 2010-11లో రూ. 62,056 కోట్లు ఖర్చు చేయగా, 2012-13 నాటికి ఆ వ్యయం రూ.70,499.12 కోట్లకు చేరుకుందని వెల్లడించింది.

దీనిని బట్టి యూపీఏ పాలన పదేళ్లలో ఎలాంటి ఆయుధ కొనుగోళ్లు జరగలేదంటూ కేంద్ర ఆర్ధిక మంత్రి పార్లమెంటులో పదేపదే చెప్పింది నిజం కాదని తేలింది.

ఇవి కూడా చదవండి:

(బీబీసీ తెలుగును ఫేస్‌బుక్, ఇన్‌స్టాగ్రామ్‌, ట్విటర్‌లో ఫాలో అవ్వండి. యూట్యూబ్‌లో సబ్‌స్క్రైబ్ చేయండి.)