దిల్లీలో వైరల్ వీడియో: "నా భర్తను నేను ముద్దు కూడా పెట్టుకుంటా, మీరు అడ్డుకోగలరా"

కోవిడ్ వీకెండ్ లాక్‌డౌన్ ఉల్లంఘించడంతోపాటూ, మాస్క్ ధరించకుండా పోలీసులతో గొడవకు దిగిన దంపతులను దిల్లీ పోలీసులు అరెస్ట్ చేసిన ఘటన ఆలస్యంగా వెలుగులోకి వచ్చింది.

ఈ దంపతులు పోలీసులతో గొడవపడే ఒక వీడియో ఇప్పుడు వైరల్ అవుతోంది. కారులో మాస్కులు ధరించలేదని ఆపిన పోలీసులపై ఆ మహిళ, ఆమె భర్త దురుసుగా ప్రవర్తించడం కనిపిస్తోంది.

కర్ఫ్యూ పాస్ కూడా లేకపోవడంతో వారిని పోలీసులు అడ్డుకున్నారు. ఫైన్ కట్టాలని కోరారు. కానీ దానికి నిరాకరించిన మహిళ ఏం చేసుకుంటారో చేసుకోండని అనడం వీడియోలో కనిపిస్తోంది.

పోలీసులతో గొడవ పడే సమయంలో "నా భర్తను నేను ముద్దు కూడా పెట్టుకుంటా. మీరు నన్ను అడ్డుకోగలరా" అని ఆ మహిళ అనడం కూడా వినిపిస్తోంది.

ఈ దంపతుల పేర్లు పంకజ్ దత్తా, ఆభా గుప్తా.

ఈ ఘటన దిల్లీలోని దరియాగంజ్ ప్రాంతంలో ఆదివారం సాయంత్రం 4 గంటల సమయంలో జరిగింది.

"మీరు నా కారెందుకు ఆపుతారు, నేను నా భార్యతోపాటూ నా కార్లో ఉన్నా" అని వీడియోలో డ్రైవ్ చేస్తున్న వ్యక్తి పోలీసులపై గట్టిగా అరుస్తున్నాడు. ఆయన మాస్క్ కూడా వేసుకోకపోవడం కనిపిస్తోంది.

కార్లో ఒక్క వ్యక్తి ఉన్నప్పటికీ మాస్క్ ధరించాలని ఇటీవల హైకోర్టు ఇచ్చిన ఆదేశాల గురించి పోలీసులు వారికి నచ్చజెప్పడానికి ప్రయత్నించినా, దంపతులు వారితో కోపంగా గొడవకు దిగడం ఈ వీడియోలో కనిపించింది.

"మాపై యాక్షన్ తీసుకోండి చూద్దాం" అంటూ దంపతులు ఇద్దరూ పోలీసులను సవాల్ చేయడం కూడా కనిపిస్తుంది.

తర్వాత, అక్కడికి ఒక మహిళా పోలీసును పిలిపించిన పోలీసులు గొడవకు దిగిన మహిళను సమీప పోలీస్ స్టేషన్‌కు తీసుకెళ్లారు.

ఇద్దరినీ సోమవారం ఉదయం కోర్టులో హాజరు పరిచారు. స్థానిక కోర్టు బెయిల్ నిరాకరించడంతో వారిని జ్యుడిషియల్ కస్టడీకి తరలించినట్లు ఇండియన్ ఎక్స్‌ప్రెస్ పత్రిక తన రిపోర్టులో చెప్పింది.

"తన భార్య మాస్కు వేసుకోదని, తననూ వేసుకోనివ్వదని" ఇంటరాగేషన్ సమయంలో భర్త చెప్పారని ఒక సీనియర్ పోలీసు అధికారి సమాచారం ఇచ్చారని పత్రిక చెప్పింది. కానీ, ఆయన భార్య మాత్రం తనకు శ్వాస సమస్య ఉందని అందుకే మాస్క్ వేసుకోనని పోలీసులకు చెప్పారని తెలుస్తోంది.

(కథనంలో వీడియోలో ఘటనను మాత్రమే వివరించాం. దీనిని బీబీసీ స్వతంత్రంగా ధ్రువీకరించడం లేదు)

ఇవి కూడా చదవండి:

(బీబీసీ తెలుగును ఫేస్‌బుక్, ఇన్‌స్టాగ్రామ్‌, ట్విటర్‌లో ఫాలో అవ్వండి. యూట్యూబ్‌లో సబ్‌స్క్రైబ్ చేయండి.)