కమలం: డ్రాగన్ ఫ్రూట్ పేరు మార్చిన గుజరాత్

డ్రాగన్ అంటే "చైనా గుర్తుకొస్తోందంటూ" ఆ పండు పేరును ‘కమలం’గా మార్చాలని గుజరాత్ రాష్ట్ర ప్రభుత్వం నిర్ణయించింది.

ఈ నిర్ణయంపై సోషల్ మీడియాలో జోకులు, కార్టూన్లు వెల్లువెత్తుతున్నాయి.

డ్రాగన్ చిహ్నానికి చైనా జానపద సాహిత్యంలోనూ, పురాణాల్లోనూ ప్రముఖ పాత్ర ఉందన్న సంగతి తెలిసిందే!

డ్రాగన్ ఫ్రూట్‌ను ఇకపై ‘కమలం’ అని పిలవనున్నట్లు గుజరాత్ ముఖ్యమంత్రి విజయ్ రూపానీ ప్రకటించారు.

కమలానికి హిందూ మతంలో పవిత్రమైన స్థానం ఉంది. అంతే కాకుండా, కమలం భారత జాతీయ పుష్పం కూడా.

హిమాలయా సరిహద్దుల్లో భారత్, చైనాల మధ్య ఇటీవల రేగిన ఘర్షణల కారణంగా రెండు దేశాల మధ్య సంబంధాలు బలహీనపడ్డాయి.

డ్రాగన్ ఫ్రూట్ మధ్య అమెరికానుంచి వచ్చిన పండు అయినా, డ్రాగన్ అనే పేరువలన దీన్ని చైనాకు సంబంధించిన పండుగా అనేకమంది భారతీయులు భావిస్తుంటారు.

భారత్, చైనాలను తరచుగా ఏనుగు, డ్రాగన్‌లతో పోల్చి చెబుతుంటారు.

నిజానికి ఈ పండును దక్షిణ అమెరికానుంచీ అధికంగా దిగుమతి చేసుకుంటారు.

అయితే, గత కొద్ది సంవత్సరాలుగా డ్రాగన్ ఫ్రూట్‌ను ఇండియాలో కూడా పండించడం ప్రారంభించారు. అనేక రాష్ట్రాలతో సహా గుజరాత్‌లో కూడా కొన్ని ప్రాంతాల్లో డ్రాగన్ ఫ్రూట్ తోటలున్నాయి.

ఇది ముళ్లజెముడు (కాక్టస్) కుటుంబానికి చెందిన చెట్టు. ఈ పండు పైన ఉన్న తొక్క పొరలు పొరలుగా ఉంటూ ముళ్లల్లా బయటకి పొడుచుకొచ్చి..డ్రాగన్ ఆకారాన్ని తలపిస్తున్నట్లు ఉంటుంది కాబట్టి దీనికి డ్రాగన్ ఫ్రూట్ అనే పేరు వచ్చింది.

గత ఏడాది వేసవిలో వాస్తవాధీన రేఖ (ఎల్ఏసీ) వద్ద ఇండియా, చైనాల మధ్య జరిగిన ఘర్షణల తరువాత ఇరు దేశాల మధ్య సంబంధాలు సన్నగిల్లాయి.

2020 జూన్‌లో ఇండియా, చైనాల మధ్య జరిగిన ఘర్షణలో 20మంది భారత సైనికులు ప్రాణాలు కోల్పోయారు. ఈ ఘర్షణల తరువాత కూడా చైనా సరిహద్దు నిబంధనలను ఉల్లంఘింస్తోందని, సరిహద్దుల వద్ద కవ్వింపు చర్యలు చేపడుతోందని ఇండియా ఆరోపించింది.

ఈ నేపథ్యంలో, డ్రాగన్ ఫ్రూట్ పేరును కమలంగా మారుస్తున్నట్లు రుపానీ మంగళవారం ప్రకటించారు. భారతీయ జనతా పార్టీ గుర్తు కూడా కమలమే.

"డ్రాగన్ ఫ్రూట్ అనే పేరు సరైనది కాదు. ఆ పేరు వినగానే చైనా గుర్తొస్తుంది. అందుకే దాని పేరును కమలంగా మార్చాం" అని రూపానీ మీడియాకు తెలిపారు.

రూపానీ ప్రకటనతో సోషల్ మీడియాలో మీమ్స్, కార్టూన్లు వరదలా పొంగుకొచ్చాయి. ఇది ఒక అర్థం పర్థం లేని చర్య అని, ఎలాంటి ప్రయోజనాలు చేకూర్చదని పేర్కొంటూ అనేకమంది సరదాగా కామెంట్లు చేశారు.

కొంతమంది ‘పాపం డ్రాగన్ ఫ్రూట్’ అంటూ సానుభూతి తెలిపారు.

బీజేపీ నగరాల, ప్రాంతాల పేర్లను మారుస్తూ ఇప్పుడు పండ్ల పేర్లను కూడా మార్చేస్తోందంటూ జోకులు వేసారు.

భారతదేశంలో ముస్లిం పరిపాలన గుర్తులను చెరిపి వేసే దిశలో పాలక బీజేపీ పార్టీ నగరాల పేర్లను మారుస్తున్న విషయం తెలిసిందే.

‘పేరు మార్చడంతో సరిపెట్టారు..పండు తినడం నిషేధించలేదు, అంది కొంత ఊరట అంటూ’ ఒక ట్విట్టర్ యూజర్ సంతోషం వ్యక్తం చేశారు. భద్రత, గోప్యత సమస్యలు వస్తున్నాయంటూ గత జూన్‌నుంచీ భారత ప్రభుత్వం అనేక చైనా యాప్‌లను నిషేధించింది.

గేమ్ ఆఫ్ థ్రోన్స్ సీరీస్‌లో ఖలీసి, తన డ్రాగన్‌ను గుర్తు చేసుకుంటూ..."కమలంతో ఖలీసి" అంటూ జోకులు వేసారు.

ఇవి కూడా చదవండి:

(బీబీసీ తెలుగును ఫేస్‌బుక్, ఇన్‌స్టాగ్రామ్‌, ట్విటర్‌లో ఫాలో అవ్వండి. యూట్యూబ్‌లో సబ్‌స్క్రైబ్ చేయండి.)