అర్బన్ ఎకో ఫార్మింగ్: విశాఖలో వీకెండ్స్‌లో సాఫ్ట్‌వేర్ ఉద్యోగులు ఎలా వ్యవసాయం చేస్తున్నారు?

ఫైనాన్స్ రంగంలో పని చేసే విశాఖకి చెందిన ప్రణయశ్రీకి అడుగు పంట భూమి కూడా లేదు. కానీ వారం వారం ఆమె తన కుటుంబంతో సహా పొలానికి వెళ్లారు. ఆమె కుటుంబంలో ఎవరికి వ్యవసాయం తెలియదు. కానీ వారే తమ కుటుంబానికి కావలసిన కూరగాయలు సేంద్రీయ విధానంలో పండించుకుంటారు.

అర్బన్ ఏకో ఫార్మింగ్...ఇదీ వ్యవసాయమే. కాకపోతే పొలాన్ని అద్దెకు తీసుకుని చేసుకునే వ్యవసాయం. మనకి పొలం ఉండనక్కరలేదు. వ్యవసాయమంటే ఆసక్తి ఉంటే చాలు.

అద్దెకు పొలం దొరుకుతుంది. అది కూడా ఎకరాలకు ఎకరాలు అద్దెకు తీసుకోనవరం లేదు. ఒక కుటుంబానికి సరిపోయే కాయగూరలు పండించుకుంనేందుకు కావాలసినంత పొలాన్ని అద్దెకు తీసుకుని...మనకి నచ్చిన కూరగాయాల్ని పండించుకోవచ్చు. అది కూడా ఎటువంటి హానికరమైన ఎరువులు వాడకుండా...సేంద్రీయ విధానంలో. విశాఖ, విజయనగరం శివారు ప్రాంతాల్లో ఈ తరహా వ్యవసాయం జోరుగా సాగుతోంది.

ప్రస్తుతం సేంద్రీయ ఉత్పత్తులకు గిరాకీ పెరుగుతోంది. ఆర్గానిక్ ఫార్మింగ్ పట్ల ఇప్పుడు అంతా అవగాహన పెంచుకుంటున్నారు. వీలున్నవారు వారివారి ఇళ్ల మిద్దెలపై 'టెర్రస్ ఫార్మింగ్ 'పేరుతో ఆర్గానిక్ కూరగాయలను పెంచుతున్నారు.

ఆర్గానిక్ ప్రోడక్ట్స్‌పై ప్రజల్లో పెరుగుతున్న ఆసక్తిని గమనించిన కొందరు ఆర్గానిక్ ఫార్మింగ్ చేస్తూ... వ్యవసాయమంటే ఆసక్తి ఉన్నవారి చేత చేయిస్తున్నారు కూడా. దీనినే 'అర్బన్ ఎకో ఫార్మింగ్' అంటారు. అలాగే 'అర్బన్ ఎకో ఫామ్స్' పేరుతో వ్యవసాయం చేసుకునేందుకు పొలాన్ని అద్దెకిస్తున్నారు.

వ్యవసాయం తెలియని వారుంటే వారికి వ్యవసాయం, అందులోని మెళకువలను నేర్పిస్తున్నారు. విశాఖకి చెందిన ఉషా గజపతిరాజు విజయనగరం జిల్లాలోని శివారు ప్రాంతాల్లో 'అర్బన్ ఎకో ఫామ్స్' పేరిట ఈ విధానంలో ప్రజలనూ భాగస్వాములు చేస్తున్నారు. 'అర్బన్ ఎకో ఫార్మింగ్', అలాగే 'అర్బన్ ఎకో ఫామ్స్' విధానాన్ని ఉషా గజపతిరాజు బీబీసీకి వివరించారు.

వీకెండ్ వ్యవసాయం..

ఉషా గజపతిరాజు విజయనగరం జిల్లా, బసవపాలెంలో 30 ఎకరాలలో 'అర్బన్ ఎకో ఫామ్స్' ప్రారంభించారు. ఒక వైపు ఆరోగ్యం... మరో వైపు ఆర్థిక లాభం పొందడమే ఈ విధానమని చెబుతూ, "నిజానికి నేను వృత్తిరీత్యా డైటీషియన్. ఖాళీ సమయాల్లో టెర్రస్ ఫార్మింగ్, చెత్త నుంచి కంపోస్టు వంటి అంశాలను నేర్చుకున్నాను. ఈ క్రమంలో ప్రజలు సేంద్రీయ ఉత్పత్తులపై చూపిస్తున్న ఆసక్తిని గమనించాను. అయితే మన వద్ద ఆర్గానిక్ ప్రోడక్ట్స్‌ పేరుతో లభించేవన్ని నిజమైన ఆర్గానిక్ పదార్థాలు కావనే విషయాన్ని తెలుసుకున్నాను. దీంతో నేనే స్వయంగా ఆర్గానిక్ ఫార్మింగ్ చేయాలని నిర్ణయించుకున్నాను" అని బీబీసీతో చెప్పారు.

"ఇందులో ఆసక్తి ఉన్న వారిని భాగస్వాములను చేశాను. వారికి ఫ్లాట్ల చొప్పున కొంత స్థలం కేటాయించి (గరిష్టంగా 600 అడుగులు) వారికి కావల్సిన ఉత్పత్తులు పండిస్తాం. అలా పండించిన వాటిని వారానికోసారి వారికి వారి ఇంటికే స్వయంగా అందిస్తాం. విత్తనం నుంచి పంట చేతికొచ్చే వరకు తను సాగు చేసే విధానాన్ని ఫోటోలు తీసి కస్టమర్ల సెల్​ఫోన్లకు పంపిస్తాను. ఆసక్తి ఉన్న వినియోగదారులు కావాలంటే వారే తమ ఫ్లాట్లలో పంటలు పండించుకునే అవకాశాన్ని కల్పిస్తున్నాను. చాలా మంది వీకెండ్‌లో వచ్చి ఇక్కడ వ్యవసాయం చేస్తారు. వ్యవసాయంపై అవగాహన లేనివారికి మేం ఇక్కడ నేర్పిస్తాం. లెర్నింగ్ బై డూయింగ్ విధానంలో ఇక్కడ ఫార్మింగ్ సాగుతుంది" అని ఆమె వివరించారు.

మూడు 'బెడ్లు' ఒక ఇంటికి నెలకి సరిపోతాయి

ఇందులో పొలం కోసం వినియోగదారుడు తీసుకునే స్థలాన్ని బెడ్లు అంటారు. నలుగురు ఉన్న ఒక కుటుంబానికి నెలకి సరిపడా కూరగాయలు పండించడానికి మూడు 'బెడ్లు' (600 అడుగుల స్థలం) అవసరం అవుతాయి.

ఇందులో బీరకాయ, బీట్ రూట్, క్యారెట్, ముల్లంగి, తోటకూర, గోంగూర, స్వీట్ కార్న్, ఆనపకాయ, వంకాయ, కాకరకాయ, బెండకాయ, దోసకాయ, మిరప, ఉల్లికాడలు ఇలా అనేక రకాలైన పంటలను వేస్తారు. వీటితో పాటు కొందరు వినియోగదారుల కోసం జామ, బొప్పాయి తోటలు కూడా వేస్తున్నారు.

"ఈ ఎకో ఫార్మ్‌లో 25 రకాలైన కూరగాయలు, ఆకుకూరలు పండిస్తారు. వీటిలో వినియోగదారులు 12 వరకు ఎంచుకుని...వాటని పండించుకోవచ్చు...లేదా మేమే వారి కోసం పండిస్తాం. ఫార్మింగ్ మొదలు పెట్టిన 40 రోజుల నుంచి ప్రతి వారం వినియోగదారుడికి 8 కిలోలు...వారు పండించుకున్న కూరగాయలను, ఆకుకూరలను బాక్సులలో పెట్టి అందిస్తాం. 600 అడుగుల స్థలాన్ని అద్దెకివ్వడం నుంచి ఇంటికి కూరగాయలు అందించడం వరకు అన్ని మేమే చేస్తాం. వారి స్థలంలో వేసుకునే మొక్కలు, విత్తనాలు, సేంద్రీయ ఎరువులు అన్ని మేమే సమకూరుస్తాం. ఆవుపేడ, మూత్రం, మొక్కల ఆకులతో తయారు చేసిన ఎరువులే వాడతాం. ఇందు కోసం నెలకి 2,200 నుంచి 2,600 వరకు అద్దె తీసుకుంటాం. ఇది నెలకు కూరగాయల కోసం వినియోగదారుడు వెచ్చించే దాని కంటే కాస్త తక్కువే. పైగా మా వద్ద ఆర్గానిక్ ఉత్పత్తులు లభిస్తాయి. అంతే కాకుండా కస్టమరే వీకెండ్స్, హాలీడేస్‌లో ఇక్కడి వచ్చి స్వయంగా పండించుకోవడం వారికి ఆనందాన్ని ఇవ్వడంతో పాటు ఆరోగ్యానికి మేలు చేస్తుంది. ఆహ్లాదకరమైన వాతావరణంలో గడపడం వారికి మానసిక ఉల్లాసాన్ని కూడా కలిగిస్తుంది" అని ఉషా గజపతి చెప్పారు.

నాకు సొంత ఇల్లు...అద్దె పొలం ఉన్నాయి

ఇప్పుడు దాదాపు మన పరిసరాలన్ని కాలుష్యమయమే. ఇది ఎవరు కాదనలేని నిజం. నగరాలు, పట్ణణాలైతే ఇక కాలుష్యంతో కలిసి జీవనం సాగించాల్సిందే. మన పరిసరాలు పొల్యూషన్‌తో నిండిపోతే...తినే తిండిలో అన్ని కెమికల్సే. ఇది అనేక జబ్బులకు కారణం అవుతోంది. ఇప్పుడిప్పుడే ఈ విషయాన్ని గ్రహిస్తున్న చాలామంది సేంద్రీయ విధానంలో పండిస్తున్న ఉత్పత్తులంటే ఆసక్తి చూపుతున్నారు.

"సాధారణ కూరగాయల ధరలతో పోలీస్తే సేంద్రీయ విధానంలో పండిన కూరగాయల ధరలు ఎక్కువగా ఉండటం, పైగా అవి నిజంగానే ఆర్గానిక్ వెజిటబుల్సా...? అనే అనుమానం కూడా వస్తుంది. నేను చాలా సార్లు అవి 'ఆర్గానిక్' అని నమ్మి కొని తరువాత మోసపోయానని తెలుసుకున్నాను. అటువంటి సమయంలో నాకు 'అర్బన్ ఎకో ఫామ్స్' కోసం తెలిసింది. వెంటనే నేను కొంత పొలాన్ని అద్దెకు తీసుకున్నాను. అందులో నేను 12 రకాల కూరగాయల్ని పెంచుతున్నాను. నేను నెలకి కూరగాయలకి ఎంత ఖర్చు పెడుతన్నానో...దీనికి అంతే ఖర్చు అవుతుంది. పైగా సేంద్రీయ విధానంలో కూరగాయాల్ని నేనే పండించుకుని తింటున్నాననే తృప్తి అదనం. ఫైనాన్స్ రంగంలో పని చేసే నాకు వ్యవసాయం కొత్తే అయినా...క్రమక్రమంగా తెలుసుంటూ...వ్యవసాయంలో మెలకువలు సైతం నేర్చుకుంటున్నా. నాకు నగరంలో సొంతిల్లు ఉంది. అలాగే నగర శివారులో అద్దె పొలం ఉందని అందరికీ చెప్తుంటా" అని తన ఆనందాన్ని ప్రణయశ్రీ బీబీసీతో పంచుకున్నారు.

వారానికి ఒకసారి పొలానికి పిక్నిక్‌కి వెళ్తాం

అర్బన్ ఎకో ఫామ్స్ నగర శివారు ప్రాంతంలో ఉండటంతో ఇక్కడ ఆహ్లాదకరమైన వాతావరణం ఉంటుంది. చాలామంది వీకెండ్స్ ఎంజాయ్ చేసేందుకు ఇటువంటి ప్రదేశాలకు రావాలనుకుంటారు. ఇప్పుడు ఎకో ఫామ్స్‌లో ఫ్లాట్స్ తీసుకోవడం వలన వీకెండ్స్ ఎంజాయ్ చేయడంతో పాటు సొంతంగా వ్యవసాయం చేసుకుంటున్నారు.

"నాకు వ్యవసాయం అంటే చాలా ఇష్టం. కానీ సాఫ్ట్‌వేర్ ఉద్యోగం చేసే నాకు వ్యవసాయం తెలియదు. ఎకో ఫామ్స్ కోసం తెలుసుకుని ఇందులో ఫ్లాట్ తీసుకున్నాను. ఇందులో నాకిష్టమైన కాయగూరల్ని పండించుకుంటున్నాను. నా కుటుంబంతో వారం వారం ఇక్కడికి పిక్నిక్‌లా వచ్చి... వ్యవసాయం కోసం తెలుసుకున్నాను. మట్టితోనూ, మొక్కలతోనూ సమయాన్ని గడుపడం ఆనందంగా ఉంది. ఇప్పుడు నేను పండించిన కాయగూరల్నే అంతా తింటున్నారు. నాకు కాకరకాయ అంటే చాలా ఇష్టం. అందులో నేను అద్దెకు తీసుకున్న మూడు 'బెడ్లు'లలో ఒకదానిలో మొత్తం కాకరకాయే వేస్తున్నాను’’అని సాఫ్ట్‌వేర్ ఇంజినీర్ మాధవి చెప్పారు.

ఇవి కూడా చదవండి:

(బీబీసీ తెలుగును ఫేస్‌బుక్, ఇన్‌స్టాగ్రామ్‌, ట్విటర్‌లో ఫాలో అవ్వండి. యూట్యూబ్‌లో సబ్‌స్క్రైబ్ చేయండి.)