ఆర్థికంగా దూసుకుపోతున్న అతి చిన్న దేశం, ఏడాదిలోనే ఆ దేశ కరెన్సీ విలువ డాలర్‌తో పోల్చితే 15% పెరిగింది... ఎలా?

ఒక చిన్న దేశం ఎవరూ ఊహించని రీతిలో ఆర్థికంగా పైపైకి దూసుకుపోయింది. దానికి కారణం, యుక్రెయిన్ యుద్ధం.

అవును, సోవియట్ రిపబ్లిక్‌ నుంచి విడిపోయిన చిన్న దేశమైన జార్జియాకు ఇప్పుడు పెట్టుబడులు వరదలా వచ్చి పడుతున్నాయి. రష్యా దక్షిణ సరిహద్దుకు ఆనుకుని ఉన్న ఈ దేశ జనాభా 37 లక్షలు. యుక్రెయిన్ మీద రష్యా దాడి ప్రారంభించిన తరువాత ఆ పరిణామం ఈ చిన్న దేశానికి ఒక వరంగా మారింది.

యుద్ధానికి ముందు జార్జియా ఆర్థిక వృద్ధి రేటు సుమారు 5 శాతం. కానీ, ఈ ఏడాదిలో ఇప్పటివరకు అది 10,.2% ఆర్థిక వృద్ధిని నమోదు చేసింది.

‘‘దేశంలోకి రష్యన్ నగదు రాక భారీగా పెరిగింది’’ అని జార్జియాలోని టిబిలిసి స్టేట్ యూనివర్సిటీ ఇంటర్నేషనల్ స్కూల్ ఆఫ్ ఎకనామిక్స్‌లోని ఐఎస్ఈటీ-పీఐ సెంటర్లో స్థూల ఆర్థిక విధాన పరిశోధన కేంద్రంలో డైరెక్టర్‌గా ఉన్న యరోస్లావా బేబిచ్, బీబీసీ వరల్డ్ న్యూస్‌కు చెప్పారు. ఈ ఏడాది జనవరి నుంచి అక్టోబర్ మధ్య కాలంలో దేశంలోకి 140 కోట్ల డాలర్లు వచ్చినట్టు ఈ ఆర్థికవేత్త అంచనావేశారు. 2021లో ఇదే కాలంతో పోలిస్తే ఇది 3.6 రెట్లు ఎక్కువని చెప్పారు. మరోవైపు జార్జియా దేశ కరెన్సీ అయిన లారి విలువ కూడా భారీగా పెరిగింది. ఈ ఏడాది ప్రారంభం నుంచి ఇప్పటి వరకు డాలర్‌తో పోల్చితే లారి విలువ 15 శాతం పెరిగింది.

యుక్రెయిన్‌కు వెళ్లిన భారతీయ మహిళ ఎందుకు స్వదేశానికి రానంటున్నారు, ఎందుకో తెలుసా?

రష్యా: గ్రోజ్నీ నుంచి యుక్రెయిన్ వరకు, ప్రతిఘటన ఎదురైనచోట బాంబుదాడులతో ఎందుకు విరుచుకుపడుతోంది-గ్రౌండ్ రిపోర్ట్

జార్జియాకు రష్యా నుంచి వలసలు

యుక్రెయిన్‌ యుద్ధం ప్రారంభమైన తర్వాత 70 వేల నుంచి లక్ష మంది రష్యన్ పౌరులు జార్జియాకు తరలి వెళ్లినట్లు అంచనా.

రష్యా, యుక్రెయిన్, బేలారుస్ వంటి దేశాల నుంచి ఎంత మంది జార్జియాకు వచ్చారో కచ్చితంగా చెప్పడం కష్టమైనప్పటికీ, అక్కడి నుంచి వచ్చే వారు తాము విహారయాత్రకు వస్తున్నారా లేక జార్జియాలో బతకడానికి వస్తున్నారా అన్నది చెప్పాల్సిన అవసరం లేదు.

జార్జియాకు వచ్చిన తరువాత వారు ఏడాది పాటు ఎలాంటి సమస్యా లేకుండా ఇక్కడే ఉండవచ్చు. జీవిక కోసం ఏదైనా పని కూడా చేసుకోవచ్చు. అంతేకాదు, ఏడాది పూర్తయిన తరువాత ఒకసారి తిరిగి వెళ్ళి మళ్ళీ రావచ్చు. అలా వేల సంఖ్యలో జనం జార్జియాకు వస్తున్నారు.

ఇది చాలా సరళతరమైన ఇమ్మిగ్రేషన్ విధానమని బేబిచ్ బీబీసీ ముండోతో చెప్పారు.

యుద్ధం ప్రారంభమైన తర్వాత రష్యా నుంచి జార్జియాకు తరలివెళ్లే వారి సంఖ్య స్థిరంగా పెరిగినప్పటికీ, మనం రెండు దశలను గుర్తించవచ్చు. ఒకటి మే నెలలో, రెండోది సెప్టెంబర్‌లో. యుద్ధంలో ప్రతి పురుషుడు తప్పనిసరిగా పాల్గొనాలంటూ రష్యా అధ్యక్షుడు వ్లాదిమిర్ పుతిన్ బిల్లును తీసుకురావడంతో, పెద్ద ఎత్తున ప్రజలు రష్యా నుంచి జార్జియాకు తరలివెళ్లడం మొదలైంది.

టిలిబిసి వంటి నగరాలలో బ్యాంకుల వద్ద క్యూ లైన్లు పెరిగాయి. ఆ ప్రాంతాల్లో రెంట్లకు భారీగా డిమాండ్ పెరిగింది. దీంతో అంతకుముందు ఎన్నడూ చూడని రీతిలో ధరలు పెరిగాయి. ఈ స్థాయిలో ధరలు పెరుగుతండడంతో తట్టుకోలేక స్థానికులలో అసహనం పెరుగుతోంది. ఈ సంఘటనలు రష్యన్లు ఎంతగా జార్జియా నగరాలకు తరలివెళ్లారో చెప్పకనే చెబుతున్నాయి.

జార్జియాలో ఒక విదేశీయుడు కంపెనీని ఏర్పాటు చేయడం చాలా తేలిక. రెండు మూడు రోజుల్లోనే కంపెనీని రిజిస్టర్ చేసుకోవచ్చని బేబిచ్ అన్నారు. ఈ ఏడాది ప్రారంభం నుంచి రష్యన్ పౌరులు నమోదు చేసిన కంపెనీల సంఖ్య గణనీయంగా పెరిగింది. 2021తో పోలిస్తే ఇక్కడ కంపెనీలు పదింతలు ఎక్కువగా నమోదయ్యాయి. జనవరి - సెప్టెంబర్ మధ్య కాలంలోనే, జార్జియాలో 9,500 సిగ్నేచర్లను రష్యన్ పౌరులు నమోదు చేసినట్టు ఈ ఆర్థికవేత్త చెప్పారు. మెజార్టీ ప్రజలు సొంతంగా వ్యాపారాలను ప్రారంభించుకునేందుకు రిజిస్ట్రేషన్ నమోదు చేసుకున్నారు. అయితే, వారు నిజానికి ఏం చేయదలుచుకున్నారో తెలియడం లేదని అన్నారు. దీనితోపాటు, జార్జియాలో రష్యన్ పౌరుల కొత్త బ్యాంకు అకౌంట్లు కూడా బాగా పెరిగాయి.

అనానిమస్: రష్యాపై 'సైబర్ వార్‌' ప్రకటించి పుతిన్‌ను బలాన్ని సవాల్ చేస్తున్న హ్యాక్టివిస్ట్‌లు

యుక్రెయిన్‌ యుద్ధం: రష్యా తొలి హైపర్‌సోనిక్ మిసైల్‌ కింజాల్ 'గేమ్ చేంజర్’ కాదా?

ఈ ఆర్థిక వృద్ధి గాలిబుడగేనా?

2008లో ఈ మాజీ సోవియట్ రిపబ్లిక్‌ దేశానికి రష్యాతో యుద్ధం జరిగింది. ఆ తరువాత రెండు దేశాల మధ్య సత్సంబంధాలు లేకుండాపోయాయి. రష్యా నుంచి ప్రస్తుతం తరలి వస్తున్న వలసవాదులతో జార్జియన్లు భయపడుతున్నారు. రష్యన్ ఇమిగ్రేషన్ సామాజిక-రాజకీయాల అంశాలపై ప్రభావం చూపుతుందని కొందరు జార్జియన్లు అంటున్నారు.

ఈ పరిస్థితుల్లో జార్జియాలో ఆర్థిక ప్రగతి వేగం పుంజుకుంది. అయితే, ఈ పురోగతి గాలి బుడగలా పేలిపోవచ్చని ఇన్‌స్టిట్యూట్ ఫర్ ది డెవలప్‌మెంట్ ఆఫ్ ఫ్రీడం ఆఫ్ ఇన్‌ఫర్మేషన్(IDFI) ఆర్థిక, సామాజిక విధానాల అధిపతి మిఖాయిల్ కుకవ బీబీసీ ముండోతో అన్నారు.

ఇక్కడ గాలి బుడగలా పేలిపోవడమంటే, ఇప్పుడు యుక్రెయిన్ మీద చేసినట్లుగానే రేపు జార్జియా మీద కూడా రష్యా దాడి చేయడమన్నమాట. "ఒకవేళ వారు మనల్ని ఆక్రమించుకోవాలని నిర్ణయిస్తే, ప్రస్తుత ఆర్థికాభివృద్ధి సంక్షోభంతోనే అంతం కానుంది’’ అని మిఖాయిల్ చెప్పారు.

వ్యవసాయోత్పత్తి (ద్రాక్ష తోటలు, బత్తాయి పండ్లు, నట్స్), మైనింగ్ (మాంగనీస్, కాపర్, గోల్డ్), వైన్ పరిశ్రమ, స్టీల్, ఎరువుల కర్మాగారం మొదలైన వాటి మీద ఆధారపడే జార్జియా ఆర్థిక వ్యవస్థను తాజా వలసలు వేగవంతం చేశాయి.

నల్ల సముద్రం తీరంలో తూర్పు ఐరోపా, పశ్చిమాసియా సరిహద్దుల నడుమ ఉండే జార్జియాకు ఇటీవల కాలంలో పర్యాటకుల సంఖ్య కూడా బాగా పెరిగింది. ఇది కూడా దేశానికి అదనపు ఆదాయ వనరుగా మారింది.

ఈ స్పీడుకు 2023లో బ్రేక్ పడుతుందా?

ప్రస్తుతం నమోదవుతున్న ఈ అనూహ్య వృద్ధి 2023లో నెమ్మదించవచ్చని ప్రభుత్వం భావిస్తోంది. అది యుద్ధానికి ముందున్న స్థాయికి, అంటే 5 శాతానికి పడిపోవచ్చని అంతర్జాతీయ ద్రవ్య నిధి(IMF) అంచనా వేసింది.

అయితే, ఈ వలసదారులు ఎంత కాలం ఈ దేశంలో ఉంటారన్న ప్రశ్నకు ఇప్పుడైతే సమాధానం లేదు. రిమోట్ వర్క్ చేసుకునే వారు ఇక్కడే కొనసాగవచ్చు. కానీ, వారు జార్జియాలో ఉద్యోగం పొందాలనుకుంటే మాత్రం, అది అంత తేలిగ్గా జరిగే పని కాదు. “ఈ ఆర్థికాభివృద్ధి ఎక్కువ కాలం పాటు ఉండదని నేను అంచనా వేస్తున్నా. ఏది ఏమైనా, ఈ మార్పు యుక్రెయిన్ యుద్ధంలో ఏం జరుగుతుందనే దానిపైనే ఆధారపడి ఉంది’’ అని బేబిచ్ చెప్పారు. ఈ పెట్టుబడులు దీర్ఘకాలం కొనసాగకపోవచ్చని కూడా భావిస్తున్నారు.

రష్యాతో జార్జియాకు ఉన్న వైరుధ్యాల మూలంగా సామాజిక సమస్యలు కూడా తలెత్తే అవకాశం ఉందనే ఆందోళనలు వ్యక్తం అవుతున్నాయి. ఏమైనా, ఇటీవలి పరిణామాలతో ఇక్కడ ధరలు భారీగా పెరిగాయి. ఇది తాత్కాలికమేనని అనుకున్నా, పెద్ద నగరాల్లో ఆదాయ వనరులు తక్కువగా ఉన్నవారిపై ఇది తీవ్ర ప్రభావం చూపిస్తోంది.

ఇవి కూడా చదవండి:

(బీబీసీ తెలుగును ఫేస్‌బుక్, ఇన్‌స్టాగ్రామ్‌, ట్విటర్‌లో ఫాలో అవ్వండి. యూట్యూబ్‌లో సబ్‌స్క్రైబ్ చేయండి.)