Makombora ya Hypersonic:Uingereza,Marekani na Australia kuzidisha ushirikiano wa kijeshi

Uingereza, Marekani na Australia zitaanza kushirikiana katika utafiti wa silaha za hypersonic na jinsi ya kujilinda dhidi ya ya silaha hiyo, serikali imesema.

Mpango huo utakuwa sehemu ya ushirikiano wa AUKUS, mkataba wa usalama uliotangazwa na nchi hizo tatu mwaka jana.

Inafuatia hatua za Urusi na China kustawisha makombora ya hypersonic na matumizi yao yaliyodaiwa na Urusi nchini Ukraine mwezi uliopita.

Silaha za hypersonic ni zile zinazozidi kasi ya sauti mara tano.

Ni vigumu zaidi kujilinda dhidi yao kwa sababu ya kasi yao na vilevile yanaruka katika mwinuko wa chini - nje ya mstari wa kuonekana kwa rada za ardhini - na yanaweza kurushwa katikati ya ndege.

Uingereza kwa sasa haina makombora ya hypersonic.

Marekani na Australia zina mpango wa pamoja wa kutengeneza silaha lakini serikali ya Uingereza ilisisitiza lengo la mradi huo mpya litakuwa katika ulinzi.

Ilisema hakuna mipango ya Uingereza kuunda silaha zake za hypersonic lakini mpango huo mpya utasaidia kutathmini ikiwa itahitaji kuzitengeneza katika siku zijazo.

Imeongeza kuwa tangazo la hivi punde halihusiani na utumiaji wa silaha za Urusi nchini Ukraine lakini ilisema ukweli kwamba mataifa mengine yalikuwa yakiwekeza katika silaha hizo inamaanisha kwamba Uingereza inapaswa kufikiria jinsi ya kujilinda dhidi yao.

Mnamo tarehe 19 Machi, Urusi ilidai kutumia kombora la hypersonic kuharibu ghala la silaha magharibi mwa Ukraine, na ujasusi wa jeshi la Marekani umependekeza kuwa vikosi vya Urusi vimezitumia mara kwa mara tangu wakati huo.

Mashambulizi hayo yaliashiria matumizi ya kwanza ya makombora ya hypersonic katika mapigano.

Ilikuja miezi michache tu baada ya China kushtua majasusi wa Marekani kwa kufanyia majaribio makombora mawili ya nyuklia ya hypersonic.

Kila moja iliizunguka dunia katika nafasi ya mzingo wa chini kabla ya kurudi chini Duniani, ya pili ikikosa shabaha yake kwa takriban maili 24 tu (km 40).

Kombora hilo linafikiriwa kuchanganya mfumo unaoitwa "fractional orbital bombardment system", ambayo hutuma makombora kwenye mzunguko wa sehemu ya Dunia ili kugonga kutoka upande usiotarajiwa, na glider ya hypersonic, ambayo inabaki kwenye anga ya nje na ni ngumu kugundua hadi baadaye.

Majaribio yalionyesha Uchina ilikuwa na uwezo wa juu zaidi wa anga za juu kuliko ilivyoeleweka hapo awali.

Korea Kaskazini pia imedai kuwa katika harakati za kufanya majaribio ya makombora ya hypersonic.

Kinachoweza kubadilisha mambo kabisa

Makombora ya hypersonic yanaweza kubadilisha mambo katika njia ambayo vita vya baadaye vitapiganwa.

Kama jina lao linavyopendekeza, yanasafiri kwa kasi kubwa - Mach 5 au zaidi, ambayo ni sawa na karibu maili kwa sekunde. Ndio inaitwa "dual capacity" ikimaanisha yanaweza kubeba kichwa cha kawaida cha kulipuka au cha nyuklia. yanaweza pia kuzinduliwa kutoka kwa hewa, bahari au ardhi.

Kuna aina mbili za silaha hizi: makombora ya cruise na ya kuruka. Urusi ina kadhaa, inaweza kurushwa kutoka kwa ndege na kulenga shabaha iliyo umbali wa zaidi ya maili 1,200. Aina ya kuteleza huzinduliwa hadi angani kutoka ambapo inateleza hadi duniani kwa njia isiyotabirika.

Makombora ya hypersonic yanabadilisha jinsi mataifa yanajipanga kwa ulinzi wao wa kimkakati kwa sababu mbili. Kwanza, ziko haraka sana kungekuwa na muda mdogo sana - dakika chache - kati ya uzinduzi kugunduliwa na kiongozi wa nchi kuamua kama atafanya kulipiza kisasi. Karibu hakuna njia ya kujua ikiwa kombora hilo lina ncha ya nyuklia au la.

Pili, njia yao ya kuruka, haswa ile ya gari la kuruka kwa kasi (HGV), ni ngumu sana kutabiri hivyo hufanya kuinasa kuwa mgumu sana.

Hivi sasa China iko mstari wa mbele katika kutengeneza makombora ya hypersonic, ikifuatiwa kwa karibu na Urusi, ambayo tayari imetumia makombora hayo kulenga shabaha za masafa marefu nchini Ukraine. Marekani imechelewa kuingia katika kipute hicho na baadhi ya majaribio yake hayajaenda vizuri.

Uingereza haina mali yoyote na sasa inaunda muungano na Marekani na Australia ili kufanya utafiti kuzihusu na jinsi gani, ikiwezekana, kujilinda dhidi ya makombora hayo

Ushirikiano wa AUKUS, uliotangazwa Septemba 2021, ni mkataba wa usalama wa pande tatu kwa eneo la Indo-Pasifiki. Madhumuni ya kimsingi ya mpango huo ni kwa Marekani na Uingereza kusaidia Australia kupata manowari zinazotumia nyuklia.

Mpango huo pia unalenga kuimarisha ushirikiano juu ya uwezo wa mtandao, akili ya kisasa(AI), teknolojia ya quantum, na uwezo wa ziada wa chini ya bahari.

Kufuatia tangazo la Jumanne, mshauri wa usalama wa kitaifa wa Uingereza Stephen Lovegrove alisema: "Tunapoleta pamoja ujuzi wa kiufundi na uwezo wa nchi zetu tatu, tunaweza kufikia kiasi kikubwa kusaidia kujiweka sisi wenyewe na washirika wetu na washirika wetu salama.

"Kwa kuzingatia uvamizi wa Urusi nchini Ukraine, ni muhimu zaidi sasa kuliko wakati mwingine wowote washirika kufanya kazi pamoja kutetea demokrasia, sheria za kimataifa na uhuru duniani kote."

Unaweza pia kusoma: