Vita vya Ukraine: Lavrov wa Urusi asema yuko tayari kuongeza malengo ya vita

Mtazamo wa kijeshi wa Urusi nchini Ukraine hauko tena "tu" mashariki mwa nchi, Waziri wa Mambo ya Nje Sergei Lavrov amesema.

Katika mahojiano na vyombo vya habari vya serikali ya Urusi, alisema mkakati wa Moscow ulikuwa umebadilika baada ya nchi za Magharibi kuipatia Ukraine silaha za masafa marefu.

Urusi sasa italazimika kusukuma vikosi vya Ukraine zaidi kutoka mstari wa mbele ili kuhakikisha usalama wake yenyewe, alielezea.

Hapo awali Marekani iliishutumu Urusi kwa kujiandaa kutwaa sehemu za Ukraine.

Urusi iliivamia Ukraine mwezi Februari, ikidai kwamba watu wanaozungumza Kirusi katika eneo la Donbas mashariki mwa Ukraine walikumbwa na mauaji ya halaiki na walihitaji kukombolewa.

Miezi mitano baadaye, Urusi imeteka maeneo ya mashariki na kusini mwa nchi hiyo, lakini ilishindwa katika lengo lake la awali la kuiteka Kyiv na tangu wakati huo imedai lengo lake kuu lilikuwa ukombozi wa Donbas.

Kiongozi wa Iran alivyopongeza hatua ya Putin kushambulia Ukraine

Tangu Februari, nchi za Magharibi zimeipatia Ukraine silaha zenye nguvu zaidi za kutumia katika ulinzi wake dhidi ya vikosi vya Urusi.

Bw Lavrov anasema hilo limeilazimu Urusi kupanua malengo yake zaidi. "Hatuwezi kuruhusu sehemu ya Ukraine inayodhibitiwa na [Rais wa Ukrainian Volodymyr] Zelensky... kumiliki silaha ambazo zingeweza kuwa tishio la moja kwa moja kwa eneo letu," Bw Lavrov alisema katika mahojiano na Margarita Simonyan - mchambuzi mashuhuri kuhusu Urusi. "Jiografia ni tofauti sasa," alisema, akitaja mikoa ya kusini ya Kherson na Zaporizhzhia kama malengo ya hivi karibuni ya Urusi.

Vikosi vya Moscow tayari vinadhibiti sehemu za mikoa yote miwili.

Bw Lavrov alirejelea haswa mfumo wa roketi wa masafa marefu wa Himars - uliotolewa hivi karibuni tu na Marekani - ambao Ukraine imepata mafanikio.

Kwa muda wa siku mbili wanajeshi wa Ukraine wametumia Himars kugonga daraja muhimu, la kimkakati katika Kherson inayokaliwa, ripoti zinasema.

Daraja la Antonivskyi ni mojawapo ya madaraja mawili ambayo Urusi inategemea kusambaza maeneo ambayo imeteka kwenye ukingo wa magharibi wa mto Dnipro, ikiwa ni pamoja na mji wa Kherson.

Waziri wa mambo ya nje wa Urusi alielezea hatua za nchi za Magharibi katika kutoa silaha kwa Ukraine kama "hasira isiyo na nguvu" na "hamu ya kufanya mambo kuwa mabaya zaidi".

Mipango ya ujumuishaji wa Urusi

Upanuzi unaoonekana wa malengo ya Urusi pia ulibainishwa siku ya Jumanne na msemaji wa Baraza la Usalama la Kitaifa la Marekani John Kirby, ambaye alisema Urusi tayari inapanga mipango ya kutwaa maeneo makubwa ya ardhi ya Ukraine.

Bw Kirby alisema Urusi inaweka maafisa wasio halali wanaoiunga mkono Urusi kuendesha mikoa inayokaliwa kwa mabavu ya Ukraine. "Utawala" huu mpya ungepanga kura za maoni za ndani juu ya kuwa sehemu ya Urusi, labda mwezi Septemba.

Matokeo ya kura hizo yangetumiwa na Urusi "kujaribu kudai kunyakua eneo huru la Ukraine", Bw Kirby alisema. Crimea ilitwaliwa na Urusi mwaka 2014 baada ya kura ya maoni iliyoandaliwa kwa haraka - iliyotazamwa kuwa haramu na jumuiya ya kimataifa, ambapo wapiga kura walichagua kujiunga na Urusi.

Wafuasi wengi wa Kyiv walisusia kura na kampeni haikuwa huru wala haki.

Kura kama hizo zilizopigwa katika maeneo mengine ya Ukraine zilishuhudia hali kama hiyo, huku upinzani wowote wa kujiunga na Urusi ukikandamizwa kwa kiasi kikubwa.

Bw Kirby alisema "anafichua" mipango ya Urusi "ili ulimwengu ujue kwamba unyakuzi wowote unaodaiwa ni wa makusudi, kinyume cha sheria na haramu", na akaahidi kutakuwa na jibu la haraka kutoka kwa Marekani na washirika wake.

Maeneo yaliyolengwa kunyakuliwa ni pamoja na Kherson, Zaporizhzhia, Donetsk na Luhansk, alisema - maeneo yale yale ambayo Bw Lavrov anasema sasa ni malengo ya Urusi.