ਸੈਮ ਪਿਟਰੋਡਾ ਦੇ ਬਿਆਨ ਤੇ ਬਵਾਲ: ‘ਜੋ ਆਗੂ ਕਹਿੰਦੇ ਸਵਾਲ ਨਾ ਕਰੋ, ਉਹ ਖ਼ਤਰਨਾਕ ਹਨ’

ਕਾਂਗਰਸ ਦੇ ਓਵਰਸੀਜ਼ ਮੁਖੀ ਸੈਮ ਪਿਟਰੋਡਾ ਵੱਲੋਂ ਪੁਲਵਾਮਾ ਹਮਲੇ ਬਾਰੇ ਦਿੱਤੇ ਬਿਆਨ ਕਾਰਨ ਕਾਂਗਰਸ ਤੋਂ ਕਈ ਸਵਾਲ ਕੀਤੇ ਜਾ ਰਹੇ ਹਨ।

ਸੈਮ ਪਿਟਰੋਡਾ ਨੇ ਕਿਹਾ, “ਪੁਲਵਾਮਾ ਵਰਗੇ ਹਮਲੇ ਹੁੰਦੇ ਰਹਿੰਦੇ ਹਨ। ਹਮਲਾ ਮੁੰਬਈ ਵਿੱਚ ਵੀ ਹੋਇਆ ਸੀ। ਸਾਨੂੰ ਉਦੋਂ ਕਾਰਵਾਈ ਕਰਨੀ ਚਾਹੀਦੀ ਸੀ।”

“ਅੱਠ ਲੋਕ ਆਉਂਦੇ ਹਨ ਅਤੇ ਹਮਲਾ ਕਰਦੇ ਹਨ ਪਰ ਇਸ ਲਈ ਪਾਕਿਸਤਾਨ ਨੂੰ ਦੋਸ਼ ਦੇਣਾ ਗਲਤ ਹੈ। ਕੁਝ ਲੋਕਾਂ ਵੱਲੋਂ ਹਮਲਾ ਕਰਨ ਲਈ ਪੂਰੇ ਦੇਸ ਨੂੰ ਜ਼ਿੰਮੇਵਾਰ ਠਹਿਰਾਉਣਾ ਗਲਤ ਹੈ।"

26 ਫਰਵਰੀ ਨੂੰ ਭਾਰਤ ਸ਼ਾਸਿਤ ਕਸ਼ਮੀਰ ਵਿੱਚ ਸੀਆਰਪੀਐੱਫ ਦੇ ਕਾਫਿਲੇ ਉੱਤੇ ਹਮਲਾ ਹੋਇਆ ਸੀ ਅਤੇ ਇਸ ਹਮਲੇ ਵਿੱਚ ਸੀਆਰਪੀਐੱਫ ਦੇ 40 ਜਵਾਨ ਮਾਰੇ ਗਏ ਸਨ।

ਸੈਮ ਪਿਟਰੋਡਾ ਦੇ ਇਸ ਬਿਆਨ ਤੋਂ ਬਾਅਦ ਸੋਸ਼ਲ ਮੀਡੀਆ ਉੱਤੇ ਸਿਆਸਦਾਨਾਂ ਸਣੇ ਕਈ ਲੋਕਾਂ ਨੇ ਪ੍ਰਤੀਕਰਮ ਦਿੱਤਾ ਹੈ।

ਇਹ ਵੀ ਪੜ੍ਹੋ:

ਪ੍ਰਧਾਨ ਮੰਤਰੀ ਨਰਿੰਦਰ ਮੋਦੀ ਨੇ ਟਵੀਟ ਕਰਕੇ ਕਿਹਾ, "ਵਿਰੋਧੀ ਧਿਰ ਸਾਡੀਆਂ ਫੌਜਾਂ ਦੀ ਵਾਰ-ਵਾਰ ਬੇਇੱਜ਼ਤੀ ਕਰਦੀ ਰਹਿੰਦੀ ਹੈ। ਮੈਂ ਆਪਣੇ ਸਾਥੀ ਭਾਰਤੀਆਂ ਨੂੰ ਕਹਿਣਾ ਚਾਹੁੰਦਾ ਹਾਂ ਕਿ ਉਹ ਵਿਰੋਧੀ ਧਿਰ ਤੋਂ ਸਵਾਲ ਕਰਨ। ਉਨ੍ਹਾਂ ਨੂੰ ਦੱਸੋ ਕਿ 130 ਕਰੋੜ ਭਾਰਤੀ ਵਿਰੋਧੀਆਂ ਦੀਆਂ ਹਰਕਤਾਂ ਕਾਰਨ ਉਨ੍ਹਾਂ ਨੂੰ ਮਾਫ਼ ਨਹੀਂ ਕਰਨਗੇ।"

ਹਾਲਾਂਕਿ ਸਮਾਜਵਾਦੀ ਪਾਰਟੀ ਦੇ ਮੁਖੀ ਅਖਿਲੇਸ਼ ਯਾਦਵ ਦਾ ਕਹਿਣਾ ਹੈ ਕਿ, "ਸਾਡੀਆਂ ਫੌਜਾਂ ਉੱਤੇ ਕਦੇ ਵੀ ਸਵਾਲ ਨਹੀਂ ਚੁੱਕਣਾ ਚਾਹੀਦਾ। ਲੋਕਤੰਤਰ ਵਿੱਚ ਸਵਾਲ ਕਰਨਾ ਸਾਡਾ ਅਧਿਕਾਰ ਹੈ। ਮੌਜੂਦਾ ਸਰਕਾਰ ਨੂੰ ਭਾਰਤੀ ਫੌਜ ਬਣਨਾ ਛੱਡ ਦੇਣਾ ਚਾਹੀਦਾ ਹੈ। ਜੋ ਸਿਆਸਤਦਾਨ ਕਹਿੰਦੇ ਹਨ ਕਿ ਉਨ੍ਹਾਂ ਨੂੰ ਸਵਾਲ ਨਹੀਂ ਕੀਤੇ ਜਾ ਸਕਦੇ ਉਹ ਖ਼ਤਰਨਾਕ ਹਨ।"

ਕਾਂਗਰਸ ਦੇ ਕੌਮੀ ਬੁਲਾਰੇ ਰਣਦੀਪ ਸੂਰਜੇਵਾਲਾ ਨੇ ਸੈਮ ਪਿਟੋਰਡਾ ਦੇ ਬਿਆਨ ਦਾ ਜ਼ਿਕਰ ਤਾਂ ਨਹੀਂ ਕੀਤਾ ਪਰ ਪੁਲਵਾਮਾ ਹਮਲੇ ਨੂੰ ਮੋਦੀ ਸਰਕਾਰ ਦੀ ਨਾਕਾਮੀ ਦੱਸਿਆ ਹੈ।

ਹਾਲਾਂਕਿ ਐਨ ਕੇ ਕਥੂਰੀਆ ਨਾਮ ਦੇ ਇੱਕ ਸ਼ਖਸ ਨੇ ਟਵੀਟ ਕੀਤਾ ਹੈ, "ਸਰਕਾਰ ਨੂੰ ਸਵਾਲ ਕਰਨਾ ਬੇਇੱਜ਼ਤੀ ਹੈ। ਸਮਝ ਨਹੀਂ ਆ ਰਿਹਾ ਕਿਵੇਂ?"

ਭਾਜਪਾ ਦੇ ਕੌਮੀ ਬੁਲਾਰੇ ਸੰਬਿਤ ਪਾਤਰਾ ਨੇ ਟਵੀਟ ਕਰਕੇ ਸੈਮ ਪਿਟਰੋਡਾ ਨੂੰ ਘੇਰਿਆ ਤੇ ਕਿਹਾ, “ਕਾਂਗਰਸ ਦੇ ਵੱਡੇ ਲੀਡਰ ਸੈਮ ਪਿਟਰੋਡਾ ਇੱਕ ਪਾਸੇ ਪਾਕਿਸਤਾਨ ਨੂੰ ਕਲੀਨ ਚਿੱਟ ਦਿੰਦੇ ਹਨ ਤੇ ਦੂਜੇ ਪਾਸੇ ਮੋਦੀ ਸਰਕਾਰ ਅਤੇ ਭਾਰਤ ਨੂੰ ਹਵਾਈ ਹਮਲਿਆਂ ਲਈ ਕੋਸਦੇ ਹਨ।”

ਦਿਨੇਸ਼ ਸ਼ਰਮਾ ਨਾਮ ਦੇ ਟਵਿੱਟਰ ਅਕਾਊਂਟ ਤੋਂ ਲਿਖਿਆ ਗਿਆ ਹੈ, "ਸਾਡੇ ਸੁਰੱਖਿਆ ਬਲ ਕਿਸੇ ਵੀ ਪਿਟਰੋਡਾ ਨੂੰ ਜਵਾਬਦੇਹ ਨਹੀਂ ਹਨ। ਇਹ ਲੋਕ ਆਪਣਾ ਸਿਆਸੀ ਏਜੰਡਾ ਚਲਾ ਸਕਦੇ ਹਨ। ਪਰ ਸਭ ਤੋਂ ਵੱਧ ਫਰਕ ਪੈਂਦਾ ਹੈ ਭਾਰਤ ਦੇ ਲੋਕ ਕੀ ਸੋਚਦੇ ਹਨ।"

ਇੱਕ ਟਵਿੱਟਰ ਯੂਜ਼ਰ ਸੁਮਨ ਰੇੱਡੀ ਦਾ ਕਹਿਣਾ ਹੈ ਕਿ ਇਹ ਕਾਂਗਰਸ ਵੱਲੋਂ ਪਾਕਿਸਤਾਨ ਤੋਂ ਅੱਤਵਾਦ ਨੂੰ ਵੱਖ ਕਰਨ ਦੀ ਕੋਸ਼ਿਸ਼ ਹੈ।

ਇਹ ਵੀਡੀਓ ਤੁਹਾਨੂੰ ਪਸੰਦ ਆ ਸਕਦੇ ਹਨ:

(ਬੀਬੀਸੀ ਪੰਜਾਬੀ ਨਾਲ FACEBOOK, INSTAGRAM, TWITTERਅਤੇ YouTube 'ਤੇ ਜੁੜੋ।)