You’re viewing a text-only version of this website that uses less data. View the main version of the website including all images and videos.
ਜੇਲ੍ਹ 'ਚ ਬੰਦ ਗੁਰਮੀਤ ਰਾਮ ਰਹੀਮ ਨੂੰ ਡੇਰਾ ਪ੍ਰੇਮੀਆਂ ਨੇ ਭੇਜੀ 'ਇੱਕ ਟਨ' ਵਧਾਈ
- ਲੇਖਕ, ਸਤ ਸਿੰਘ
- ਰੋਲ, ਬੀਬੀਸੀ ਲਈ ਰੋਹਤਕ ਤੋਂ
ਬਲਾਤਕਾਰ ਕੇਸ ਵਿੱਚ ਸਜ਼ਾ ਕੱਟ ਰਹੇ ਡੇਰਾ ਸੱਚਾ ਸੌਦਾ ਮੁਖੀ ਗੁਰਮੀਤ ਰਾਮ ਰਹੀਮ ਨੇ ਇਸ ਵਾਰ ਆਪਣਾ ਜਨਮ ਦਿਨ ਜੇਲ੍ਹ ਵਿੱਚ ਮਨਾਇਆ। ਪਰ ਉਨ੍ਹਾਂ ਦੇ ਸਮਰਥਕਾਂ ਨੇ ਇਹ ਇਕੱਲਾਪਣ ਦੂਰ ਕਰਨ ਵਿੱਚ ਕੋਈ ਕਸਰ ਨਹੀਂ ਛੱਡੀ।
ਰਾਮ ਰਹੀਮ ਦਾ ਲੰਘੀ 15 ਅਗਸਤ ਨੂੰ 51ਵਾਂ ਜਨਮ ਦਿਨ ਸੀ ਅਤੇ ਡੇਰਾ ਪ੍ਰੇਮੀਆਂ ਨੇ ਉਨ੍ਹਾਂ ਦੀ ਬੈਰਕ ਵਧਾਈ ਕਾਰਡਾਂ ਨਾਲ ਭਰ ਦਿੱਤੀ।
ਰੋਹਤਕ ਦੀ ਸੁਨਾਰੀਆ ਜੇਲ੍ਹ ਜਿੱਥੇ ਰਾਮ ਰਹੀਮ ਸਜ਼ਾ ਪੂਰੀ ਕਰ ਰਹੇ ਹਨ ਉਸ ਦੇ ਨਜ਼ਦੀਕੀ ਡਾਕ ਖਾਨੇ ਨੂੰ ਵਧਾਈਆਂ ਦੇ ਪੰਜਾਹ ਥੈਲੇ ਪ੍ਰਾਪਤ ਹੋਏ ਸਨ ਜਿਨ੍ਹਾਂ ਵਿੱਚੋਂ ਹਰੇਕ ਦਾ ਵਜ਼ਨ ਤਕਰੀਬਨ 20 ਕਿੱਲੋ ਸੀ।
ਇਹ ਕਾਰਡ ਸਾਰੇ ਦੇਸ ਵਿੱਚੋਂ ਹੀ ਆਏ ਹਨ ਅਤੇ ਡਾਕ ਖਾਨੇ ਦੇ ਮੁਲਾਜ਼ਮਾਂ ਮੁਤਾਬਕ ਇਹ ਸਿਲਸਿਲਾ ਆਉਂਦੇ ਕੁਝ ਦਿਨ ਵੀ ਜਾਰੀ ਰਹਿ ਸਕਦਾ ਹੈ।
ਵਧਾਈਆਂ ਦਾ ਭਾਰ ਇੱਕ ਟਨ
ਸੁਨਾਰੀਆ ਦੇ ਪੋਸਟ ਮਾਸਟਰ ਜਗਦੀਸ਼ ਬੁਧਵਰ ਨੇ ਦੱਸਿਆ ਕਿ ਚਾਰ ਦਿਨਾਂ ਵਿੱਚ ਡਾਕ ਖਾਨੇ ਪਹੁੰਚਣ ਵਾਲੀ ਡਾਕ ਦੀ ਸੰਖਿਆ ਕਈ ਗੁਣਾਂ ਵਧ ਗਈ ਹੈ ਜਿਸ ਕਰਕੇ ਕਰਮਚਾਰੀਆਂ ਨੂੰ ਓਵਰ ਟਾਈਮ ਕਰਨਾ ਪੈ ਰਿਹਾ ਹੈ।
ਉਨ੍ਹਾਂ ਕਿਹਾ, "ਆਮ ਤੌਰ 'ਤੇ ਅਸੀਂ ਇੱਕ ਵਜੇ ਆਪਣਾ ਕੰਮ ਮੁਕਾ ਲੈਂਦੇ ਹਾਂ ਪਰ ਇੱਕ ਦਿਨ ਮੈਂ 6 ਵਜੇ ਕੰਮ ਮੁਕਾ ਕੇ ਵਿਹਲਾ ਹੋਇਆ ਅਤੇ 80 ਫੀਸਦੀ ਪੈਕਟਾਂ ਉੱਪਰ ਸਿਰਫ ਰਾਮ ਰਹੀਮ ਸਿੰਘ ਇੰਸਾਂ ਦਾ ਹੀ ਪਤਾ ਲਿਖਿਆ ਹੋਇਆ ਸੀ।"
ਇਹ ਵੀ ਪੜ੍ਹੋ꞉
'37 ਸਾਲਾਂ ਵਿੱਚ ਪਹਿਲੀ ਵਾਰ ਕਿਸੇ ਲਈ ਇੰਨੀਆਂ ਚਿੱਠੀਆਂ'
ਜਗਦੀਸ਼ ਨੇ ਹੈਰਾਨਗੀ ਪ੍ਰਗਟਾਈ ਕਿ ਆਪਣੀ 37 ਸਾਲ ਦੀ ਨੌਕਰੀ ਵਿੱਚ ਉਨ੍ਹਾਂ ਨੇ ਪਹਿਲੀ ਵਾਰ ਕਿਸੇ ਇੱਕ ਵਿਅਕਤੀ ਲਈ ਇੰਨੀ ਡਾਕ ਦੇਖੀ ਹੈ।
ਉਨ੍ਹਾਂ ਮਜ਼ਾਕੀਆ ਲਹਿਜ਼ੇ ਵਿੱਚ ਕਿਹਾ ਕਿ ਜੇ ਇਹ ਸਿਲਸਿਲਾ ਇਸੇ ਤਰ੍ਹਾਂ ਚਲਦਾ ਰਿਹਾ ਤਾਂ ਆਪਣੀ ਪ੍ਰਸੰਗਿਕਤਾ ਖੋ ਰਹੇ ਡਾਕ ਖਾਨਿਆਂ ਵਿੱਚ ਮੁੜ ਬਹਾਰ ਆ ਸਕਦੀ ਹੈ।
ਉਨ੍ਹਾਂ ਦੱਸਿਆ ਕਿ ਸਪੀਡ ਪੋਸਟ ਜਾਂ ਰਜਿਸਟਰੀ ਕਰਵਾਉਣ ਵਾਲੇ ਨੇ 50 ਰੁਪਏ ਤਾਂ ਖਰਚੇ ਹੀ ਹੋਣਗੇ ਨਹੀਂ ਤਾਂ ਆਮ ਕਾਰਡ ਉੱਪਰ ਵੀ 5 ਰੁਪਏ ਦੇ ਟਿਕਟ ਤਾਂ ਜ਼ਰੂਰ ਲਾਏ ਹੋਣਗੇ
ਰੋਹਤਕ ਦੇ ਮੁੱਖ ਡਾਕ ਖਾਨੇ ਤੋਂ ਚਿੱਠੀਆਂ ਲਿਆਉਣ ਵਾਲੇ ਡਾਕੀਏ ਰਾਜੇਸ਼ ਕੁਮਾਰ ਨੇ ਦੱਸਿਆ ਕਿ ਪਹਿਲਾਂ ਤਾਂ ਉਹ ਸਾਈਕਲ ਜਾਂ ਬਾਈਕ ਉੱਪਰ ਜਾ ਕੇ ਹੀ ਚਿੱਠੀਆਂ ਲੈ ਆਉਂਦੇ ਸਨ।
ਉਨ੍ਹਾਂ ਦੱਸਿਆ, "ਪਿਛਲੇ ਚਾਰ ਦਿਨਾਂ ਤੋਂ ਮੈਨੂੰ ਡਾਕ ਆਟੋ ਰਿਕਸ਼ੇ ਵਿੱਚ ਲਿਆਉਣੀ ਪੈ ਰਹੀ ਹੈ। ਜਿਸ ਕਰਕੇ ਮੈਂ ਆਪਣੀ ਜ਼ੇਬ੍ਹ ਵਿੱਚੋਂ 500 ਰੁਪਏ ਦੇਣੇ ਪੈ ਰਹੇ ਹਨ।"
ਰਾਮ ਰਹੀਮ ਵੱਲੋਂ ਜ਼ੇਲ੍ਹ ਵਿੱਚ ਇਹ ਚਿੱਠੀਆਂ ਪੜ੍ਹੇ ਜਾਣ ਬਾਰੇ ਕੁਮਾਰ ਨੇ ਦੱਸਿਆ ਕਿ ਉਨ੍ਹਾਂ ਦਾ ਕੰਮ ਤਾਂ ਚਿੱਠੀਆਂ ਜ਼ੇਲ੍ਹ ਵਿੱਚ ਪਹੁੰਚਾ ਕੇ ਪਾਵਤੀ ਲੈਣਾ ਹੈ ਉਸ ਮਗਰੋਂ ਕੀ ਹੁੰਦਾ ਹੈ ਇਹ ਜ਼ੇਲ੍ਹ ਅਧਿਕਾਰੀਆਂ ਦੀ ਜਿੰਮੇਵਾਰੀ ਹੈ।
ਹੱਥੀਂ ਬਣਾਏ ਅਤੇ ਡਿਜ਼ਾਈਨਰ ਕਾਰਡ
ਫਟੇ ਲਿਫਾਫਿਆਂ ਵੱਚੋਂ ਝਾਕਦੇ ਕਾਰਡ ਦੇਖ ਕੇ ਲਗਦਾ ਸੀ ਕਿ ਪ੍ਰੇਮੀਆਂ ਨੇ ਮਹਿੰਗੇ ਸਸਤੇ ਸਭ ਕਿਸਮ ਦੇ ਕਾਰਡ ਭੇਜੇ ਸਨ।
ਸ਼ਰਾਧਾਲੂਆਂ ਨੇ ਜਨਮ ਦਿਨ ਦੀਆਂ ਵਧਾਈਆਂ ਦੇਣ ਦੇ ਨਾਲ ਹੀ ਗੁਰਮੀਤ ਰਾਮ ਰਹੀਮ ਦੀ ਜਲਦੀ ਘਰ ਵਾਪਸੀ ਦੀ ਅਰਦਾਸ ਕੀਤੀ ਹੈ।
ਕਈ ਕਾਰਡਾਂ ਉੱਪਰ ਇਤਰ ਛਿੜਕੇ ਹੋਏ ਸਨ ਅਤੇ ਉੱਪਰੋਂ ਲਾਲ ਗੁਲਾਬ ਚਿਪਕਾਏ ਹੋਏ ਸਨ।
ਇਹ ਵੀ ਪੜ੍ਹੋ꞉
ਗੁਰੂਗਰਾਮ ਦੀ ਇੱਕ ਫਰਮ ਵਿੱਚ ਕਰਮਚਾਰੀ ਸੁਖਚਰਨਪ੍ਰੀਤ ਇੰਸਾਂ ਨੇ ਦੱਸਿਆ ਕਿ ਉਨ੍ਹਾਂ ਨੇ ਰਾਮ ਰਹੀਮ ਨੂੰ ਇੱਕ ਹੱਥੀਂ ਬਣਾਇਆ ਕਾਰਡ ਭੇਜਿਆ ਹੈ।
"ਪਿਛਲੇ ਸਾਲ 25 ਅਗਸਤ 2017 ਨੂੰ ਜੋ ਕੁਝ ਵੀ ਹੋਇਆ ਉਸ ਦੇ ਬਾਵਜੂਦ ਸਾਡੇ ਲਈ ਉਹ ਹਾਲੇ ਵੀ ਸਤਿਕਾਰਤ ਗੁਰੂ ਹਨ। ਮੈਂ ਆਪਣਾ ਪਿਆਰ ਅਤੇ ਆਭਾਰ ਪ੍ਰਗਟਾਉਣ ਲਈ ਉਨ੍ਹਾਂ ਨੂੰ ਕਾਰਡ ਭੇਜਿਆ ਹੈ। ਮੇਰੇ ਹੋਰ ਵੀ ਕਈ ਦੋਸਤਾਂ ਨੇ ਉਨ੍ਹਾਂ ਦੇ ਮੁੜ ਦਰਸ਼ਨ ਕਰ ਸਕਣ ਦੀ ਉਮੀਦ ਨਾਲ ਕੁਰੀਅਰ ਰਾਹੀਂ ਕਾਰਡ ਭੇਜੇ ਹਨ।"
ਇੱਕ ਹੋਰ ਸ਼ਰਧਾਲੂ ਨੇ ਆਪਣਾ ਨਾਮ ਗੁਪਤ ਰੱਖਣ ਦੀ ਸ਼ਰਤ ਉੱਪਰ ਕਿਹਾ ਕਿ ਜੋ ਵੀ ਹੋ ਰਿਹਾ ਹੈ ਉਹ 'ਗੁਰੂ' ਦੀ ਮਰਜ਼ੀ ਮੁਤਾਬਕ ਹੀ ਹੋ ਰਿਹਾ ਹੈ ਅਤੇ ਆਪਣਾ ਕੰਮ ਪੂਰਾ ਕਰਕੇ ਉਹ ਪਵਿੱਤਰ ਆਤਮਾ ਵਾਂਗ ਬਾਹਰ ਆ ਜਾਣਗੇ।
ਜੇਲ੍ਹ ਅਧਿਕਾਰੀ ਕੀ ਕਹਿੰਦੇ ਹਨ
ਰੋਹਤਕ ਜ਼ਿਲ੍ਹਾ ਜ਼ੇਲ੍ਹ ਦੇ ਅਧਿਕਾਰੀਆਂ ਨੇ ਮੰਨਿਆ ਕਿ ਰਾਮ ਰਹੀਮ ਦੇ ਜਨਮ ਦਿਨ ਬਾਰੇ ਬਹੁਤ ਸਾਰੇ ਵਧਾਈ ਕਾਰਡ ਜ਼ੇਲ੍ਹ ਪਹੁੰਚੇ ਹਨ।
ਜੇਲ੍ਹ ਪ੍ਰਸਾਸ਼ਨ ਵੱਲੋਂ ਕਿਸੇ ਵੀ ਪਾਬੰਦੀਸ਼ੁਦਾ ਵਸਤੂ ਦੇ ਰਾਮ ਰਹੀਮ ਤੱਕ ਪਹੁੰਚਣ ਦੀ ਸੰਭਾਵਨਾ ਖਤਮ ਕਰਨ ਲਈ ਸਾਰੀਆਂ ਚਿੱਠੀਆਂ ਦੀ ਨਜ਼ਰਸਾਨੀ ਕੀਤੀ ਜਾ ਰਹੀ ਹੈ।
ਇਸ ਮਾਮਲੇ ਵਿੱਚ ਹਰਿਆਣਾ ਜ਼ੇਲ੍ਹ ਮੈਨੂਅਲ ਉੱਪਰ ਅਮਲ ਕੀਤਾ ਜਾ ਰਿਹਾ ਹੈ।
ਕਿਹਾ ਜਾ ਰਿਹਾ ਹੈ ਮੁਤਾਬਕ ਰਾਮ ਰਹੀਮ ਪਿਛਲੇ ਚਾਰ ਦਿਨਾਂ ਤੋਂ ਆਪਣੇ ਸ਼ਰਧਾਲੂਆਂ ਦੇ ਵਧਾਈ ਸੰਦੇਸ਼ ਪੜ੍ਹਨ ਵਿੱਚ ਮਸ਼ਗੂਲ ਹਨ।
ਇਹ ਵੀ ਪੜ੍ਹੋ꞉
