ਨਰਿੰਦਰ ਮੋਦੀ ਦੀ ਖੱਲ ਉਧੜਵਾ ਲਵਾਂਗੇ : ਤੇਜ ਪ੍ਰਤਾਪ

ਕੇਂਦਰ ਸਰਕਾਰ ਨੇ ਬਿਹਾਰ ਦੇ ਸਾਬਕਾ ਮੁੱਖ ਮੰਤਰੀ ਲਾਲੂ ਯਾਦਵ ਦੀ ਜ਼ੈੱਡ ਪਲੱਸ ਸੁਰੱਖਿਆ ਹਟਾ ਲਈ ਹੈ। ਉਸ ਤੋਂ ਬਾਅਦ ਸਿਆਸੀ ਵਿਵਾਦ ਖੜ੍ਹਾ ਹੋ ਗਿਆ ਹੈ।

ਇਸ ਫੈਸਲੇ ਉੱਤੇ ਨਾਰਾਜ਼ਗੀ ਦਿਖਾਉਣ ਦੇ ਚੱਕਰ ਵਿੱਚ ਲਾਲੂ ਦਾ ਪੁੱਤ ਭਾਸ਼ਾ ਦੀ ਮਰਿਯਾਦਾ ਵੀ ਲੰਘ ਗਿਆ।

ਜਦੋਂ ਮੀਡੀਆ ਨੇ ਇਸ ਬਾਰੇ ਸਵਾਲ ਕੀਤਾ ਤਾਂ ਲਾਲੂ ਯਾਦਵ ਦੇ ਵੱਡੇ ਪੁੱਤ ਤੇਜ਼ ਪ੍ਰਤਾਪ ਯਾਦਵ ਨੇ ਕਿਹਾ, ''ਜੋ ਸੁਰੱਖਿਆ ਵਾਪਸ ਲਈ ਗਈ ਹੈ, ਉਹ ਠੀਕ ਨਹੀਂ ਹੈ। ਸਾਡਾ ਪ੍ਰੋਗਰਾਮ ਹੈ ਅਤੇ ਲਾਲੂ ਜੀ ਵੀ ਪ੍ਰੋਗਰਾਮਾਂ ਵਿੱਚ ਜਾ ਰਹੇ ਹਨ ਤਾਂ ਇਹ ਕਤਲ ਕਰਾਉਣ ਦੀ ਸਾਜ਼ਿਸ਼ ਕੀਤੀ ਜਾ ਰਹੀ ਹੈ।''

ਉਸ ਨੇ ਅੱਗੇ ਕਿਹਾ, ''ਉਨ੍ਹਾਂ ਨੂੰ ਮੂੰਹ ਤੋੜ ਜਵਾਬ ਦੇਵਾਂਗੇ। ਨਰਿੰਦਰ ਮੋਦੀ ਦੀ ਖੱਲ ਉਧੜਵਾ ਲਵਾਂਗੇ। ''

ਨਰਿੰਦਰ ਮੋਦੀ ਦੇਸ ਦੇ ਪ੍ਰਧਾਨ ਮੰਤਰੀ ਹਨ, ਉਨ੍ਹਾਂ ਲਈ ਇਸ ਤਰ੍ਹਾਂ ਦੀ ਭਾਸ਼ਾ ਦਾ ਇਸਤੇਮਾਲ ਕਰਨਾ ਸਹੀ ਹੈ, ਇਸ ਸਵਾਲ ਦੇ ਜਵਾਬ ਵਿੱਚ ਉਹ ਕਹਿੰਦੇ ਹਨ, '' ਸਾਡੇ ਪਿਤਾ ਨੂੰ ਕੁਝ ਹੋਵੇਗਾ, ਤਾਂ ਤੁਸੀਂ ਜ਼ਿੰਮੇਵਾਰੀ ਲੈਂਦੇ ਹੋ? ਕੌਣ ਇਸਦੀ ਜ਼ਿੰਮੇਦਾਰੀ ਲਵੇਗਾ। ਸਾਡੇ ਪਿਤਾ ਦੀ ਜਾਨ, ਜਾਨ ਨਹੀਂ ਹੈ? ''

ਤੇਜ਼ ਨੇ ਕਿਹਾ, ''ਨਿੱਜੀ ਪੱਧਰ 'ਤੇ ਉਹ ਹਮਲੇ ਕਰ ਰਹੇ ਹਨ ਤਾਂ ਅਸੀਂ ਇਸ ਤੋਂ ਡਰਨ ਵਾਲਿਆਂ ਵਿੱਚੋਂ ਨਹੀਂ ਹਾਂ। ਬਿਹਾਰ ਦੇ ਲੋਕ ਇਨ੍ਹਾਂ ਨੂੰ ਪੁੱਟ ਸੁੱਟਣਗੇ।''

ਲਾਲੂ ਯਾਦਵ ਨੇ ਵੀ ਇਸ ਫੈਸਲੇ ਦੀ ਆਲੋਚਨਾ ਕੀਤੀ ਹੈ। ਉਹ ਕਹਿੰਦੇ ਹਨ, ''ਜੇ ਨਰਿੰਦਰ ਮੋਦੀ ਇਹ ਸਮਝਦੇ ਹਨ ਕਿ ਮੈਂ ਡਰ ਜਾਵਾਂਗਾ, ਤਾਂ ਅਜਿਹਾ ਨਹੀਂ ਹੈ। ਸਾਰੇ ਲੋਕ ਇੱਥੋਂ ਤੱਕ ਕਿ ਬਿਹਾਰ ਦਾ ਬੱਚਾ-ਬੱਚਾ ਮੇਰੀ ਸੁਰੱਖਿਆ ਕਰਦਾ ਹੈ। ''

ਐਤਵਾਰ ਨੂੰ ਲਾਲੂ ਦੇ ਨਾਂ ਉਨ੍ਹਾਂ ਵੀਵੀਆਈਪੀਜ਼ ਦੀ ਸੂਚੀ ਤੋਂ ਹਟਾ ਦਿੱਤਾ ਗਿਆ ਸੀ, ਜਿਨ੍ਹਾਂ ਨੂੰ ਕਿ ਜ਼ੈੱਡ ਪਲੱਸ ਸੁਰੱਖਿਆ ਦਿੱਤੀ ਗਈ ਸੀ।

ਤੇਜ ਪ੍ਰਤਾਪ ਹਾਲ ਵਿੱਚ ਇੱਕ ਹੋਰ ਖ਼ਬਰ ਕਰਕੇ ਚਰਚਾ ਵਿੱਚ ਰਹੇ ਹਨ। ਬਿਹਾਰ ਦੇ ਉਪ-ਮੁੱਖ ਮੰਤਰੀ ਸੁਸ਼ੀਲ ਮੋਦੀ ਨੇ ਉਨ੍ਹਾਂ ਨੂੰ ਆਪਣੇ ਬੇਟੇ ਦੇ ਵਿਆਹ ਦਾ ਸੱਦਾ ਦਿੱਤਾ ਸੀ।

ਇਸ 'ਤੇ ਉਸ ਨੇ ਕਿਹਾ ਸੀ ਕਿ ਜੇਕਰ ਉਹ ਵਿਆਹ ਵਿੱਚ ਜਾਂਦੇ ਹਨ ਤਾਂ ਸੁਸ਼ੀਲ ਮੋਦੀ 'ਤੇ ਹਮਲਾ ਕਰਨਗੇ। ਮੋਦੀ ਨੇ ਸੁਰੱਖਿਆ ਦੇ ਕਾਰਨਾਂ ਕਰਕੇ ਵਿਆਹ ਸਮਾਗਮ ਦੀ ਥਾਂ ਬਦਲਣ ਦੀ ਗੱਲ ਕਹੀ ਸੀ।

ਫਿਰ ਤੇਜ ਪ੍ਰਤਾਪ ਨੇ ਕਿਹਾ ਕਿ ਭਾਜਪਾ ਆਗੂ ਨੂੰ ਬਿਨਾਂ ਕਿਸੇ ਡਰ ਦੇ ਤੈਅ ਯੋਜਨਾ ਦੇ ਹਿਸਾਬ ਪ੍ਰੋਗਰਾਮ ਕਰਨਾ ਚਾਹੀਦਾ ਹੈ।

ਭਾਜਪਾ ਨੇ ਇਸ ਉੱਤੇ ਗੰਭੀਰ ਪ੍ਰਤੀਕਿਰਿਆ ਦਿੱਤੀ ਹੈ।

ਪਾਰਟੀ ਦੇ ਸੀਨੀਅਰ ਆਗੂ ਸੰਬਿਤ ਪਾਤਰਾ ਨੇ ਕਿਹਾ, "ਖਾਲ ਉਧੇੜ ਲੇਂਗੇ .. .." .. "ਸ਼ਾਦੀ ਮੇਂ ਘੁਸ ਕਰ ਮਾਰੇਗੇ .." ਇਹੀ ਹੁੰਦਾ ਹੈ "ਜੰਗ ਰਾਜ" ਦਾ ਸ਼ਬਦਕੋਸ਼ .. ਇਹ ਆਗੂ ਆਪਣੇ ਆਪ ਨੂੰ ਜ਼ਮੀਦਾਰ ਅਤੇ ਹੋਰਾਂ ਨੂੰ ਕੀ ਪ੍ਰਜਾ ਸਮਝਦੇ ਹਨ ??

(ਬੀਬੀਸੀ ਪੰਜਾਬੀ ਨਾਲ FACEBOOK, INSTAGRAM, TWITTERਅਤੇ YouTube 'ਤੇ ਜੁੜੋ।)