Hilda Baci set Guinness World Record for largest serving of 'Nigerian style' jollof rice

Guinness World Records don confam Hilda Baci attempt for largest serving of Nigerian style jollof rice.

Dis come afta thousands of Nigerians on Friday 12 September bin gada for Lagos, southwest Nigeria, to watch as di former Guinness World Record holder and food influencer cook di biggest eva pot of jollof rice in di world.

Jollof rice na food wey dey popular for Nigeria, Ghana, Senegal, Sierra Leone, Liberia, among odas.

According to Guinness World Records on Monday 15 September 2025, dem say Hilda Bacci achieve di largest serving of Nigerian style jollof rice.

Hilda wey be 28-year-old bin gain global recognition for 2023 afta she break Guinness World Record for di longest cooking marathon, (individual), wit a time of 93 hours 11 minutes.

"New record: Largest serving of Nigerian style jollof rice - 8,780 kg (19,356 lb 9 oz) achieved by Hilda Baci," Guinness World Records post for dia X page.

Hilda tell BBC News Pidgin say di reason why she attempt to make di record na bicos "Naija no dey carry last."

"Na we be di giant of Africa, and jollof na food wey evribodi sabi Africans for. I kon tink am say as di giant of Africa and say our jollof mad, e go make sense if we get di biggest pot of jollof rice, e go dey nice for we kontri."

Dis na di first time pesin go try to cook di largest ever pot of jollof.

As hashtag #HildaBaci and #GuinessWorldRecord trend for social media, crowds, especially di Gen Zs, millennials, food lovers, vendors and celebrities gada for di venue to show dia support for Hilda Baci.

Hilda Baci tell BBC News Pidgin say e take about one year to come up wit ideas and plan how di cooking go take waka.

She say to produce di pot alone take two months.

She reveal say di giant custom-made pot get capacity of 22,619 litres. Hilda Baci add say plenty pipo come togeda to create dis magic. "Di culinary team pass 300."

Hilda Baci say di ingredients she bin use cook di jollof rice include: 200 bags of rice, ova 1200kg of tomato paste, 600kg of onions, 6000kg of water, 168kg of goat meat, 700kg of oil.

Who be Hilda Baci

For 2023, Guinness World Record crown di Nigerian chef Hilda Baci as she break di record for di longest longest cooking marathon, (individual), wit a time of 93 hours 11 minutes.

She become national sensation afta she cook for four days. Her attempt bin captivate di kontri as politicians and celebrities stop to hail her.

"Hilda cook-a-thon in fact dey so popular so tey our website crash for two days sake of di heavy traffic we receive from her legion of loyal fans," GWR bin tok.

Hilda bin cook for 100 hours - and she dey allowed five-minute break each hour or di equivalent ova several hours. However, GWR bin log her record at 93 hours 11 minutes, sake of say she take longer break pass di one dem allow for one one occasion.

She still beat di previous record by more dan five hours wey one Indian chef Lata Tondon set for 2019.

Afta her marathon cooking session, she tok about wetin motivate her: "I just reason say I gatz do sometin out of di ordinary to put myself on di map, to put Nigeria on di map, to put young African women on di map."

Afta she graduate from Madonna University, Nigeria, wit degree in sociology, Baci bin decide to start her culinary career. She dey inspired by her mother, Lynda Ndukwe, wey also be chef.

Baci bin host one television show Dine on a Budget for 2020. She win di Jollof Face-off competition for 2021. Representing her native Nigeria, Baci beat Ghana Leslie Kumordzie to claim di victory.