Орусияда он миңдеген киши Навальныйды колдоп көчөгө чыкты

Ишемби күнү он миңдеген адам көчөгө чыгып, Алексей Навальныйды колдошту. Президент Путин бийликке келгенден бери бул эң ири демонстрациялардын бири болгону айтылууда.

Алексей Навальный Орусияга Германиядан кайтып келгенде камакка алынды. Ал "новичок" түрүнө кирген зат менен ууландырылган деп, беш айдан бери Германияда дарыланып жаткан.

Reuters агенттигинин маалыматына караганда, Москва шаарында эле кырк миңге чукул киши демонстрацияга чыкты. Нааразылык акциялар өлкөнүн туш тарабындагы ондогон шаарда болду. Бирок Кремль демонстрацияга чыккандардын саны медиада кабарлангандан кыйла аз экенин айтууда.

Окуяга байкоо салган уюмдар үч миңден ашуун киши камакка алынганын маалымдады. Көз карандысыз OVD Info уюму Москва шаарында эле 1200дөн ашуун киши кармалганын билдирди.

Орусиянын атайын даярдыктагы күч түзүм бөлүгү нааразылыкка чыккан кишилерди сабап жатканын чагылдырган сүрөт жана видеолор интернетте желдей тарады. АКШ менен Британия тынч митинг өткөрүп жаткандарга каршы полиция ашыкча күч колдонгонун айыптап чыкты. Европа Биримдигинин тышкы саясат мекемесинин башчысы Жозеф Боррел дүйшөмбү күнү Биримдик кандай чара көрөрүн талкуулайт деп билдирди.

Демонстрациялар Орусиянын чыгыш тарабындагы шаарлардан тарта маданий борбор саналган Санкт-Петербург калаасында да болду.

Мисалы Омск шаарында температура -30 градус болгонуна карабастан демонстранттар көчөгө агылды.

Сибирдеги Якутск шаарында температура -52 градус болгон. Навальныйды колдогондор ызгаар суукка карабай митингге чыкты.

Алексей Навальный Кремлди сындаган жана коррупцияга каршы күрөшкөн Орусиядагы эң негизги оппозициячыл саясатчыга айланды.

Ал өткөн жылдын 20-августунда Сибирден Москваны көздөй учканда өзүн жаман сезип, учак Омск шаарына аргасыз конууга мажбур болгон. Эки күндөн кийин Навальный Германиядагы ооруканага эс-учун билбеген абалда жеткирилген.

Навальный "новичок" деген зат менен ууландырылганын Германия айтууда. Ал эми Навальныйдын командасы президент Путин буйрук бергенден кийин саясатчы ууландырылганын билдирип келет. Кремль дооматтарды четке кагууда.

Өткөн жекшемби күнү Навальный Орусияга учуп келгенде, полиция аны аба майдандан кармап кеткен. Ага абактан эрте бошотулгандан кийинки шарттарды аткарбай койду деген айып тагылууда.

Оппозициячыл саясатчыны бошотуу талабы менен Европа Биримдиги жана АКШнын лидерлери, укук коргоочулар орус бийлигине кайрылуу жолдоп, Кремлдин бул кадамын катуу сынга алышты. Навальный болсо тарапташтарын демонстрацияга чыгууга чакырды.

Андан тышкары өткөн аптада оппозициячыл саясатчы эки сааттык тасма жарыялап, анда Путиндин ишмердүүлүгүнө кеңири токтолгон. Иликтөөдө Кара деңиздин жээгиндеги имараттын президент Владимир Путинге тиешелүү экени айтылган. Мурда бир миллиард долларга бааланган бул жайды көптөгөн басылмалар "Путиндин хан сарайы" катары атап келишкен эле. Бул иликтөөнү кыска убакыттын ичинде жетимиш миллиондон ашуун киши көрдү.

Орусиянын бийлиги мыйзамсыз митингге чыккандар камакка алынат деп алдын ала эскерткен. Нааразылык акция учурунда ондогондор жаракат алды.

Сүрөттөрдүн автордук укугу корголгон.