Ị nụla maka ọrịa 'Bovine Tuberclosis' na-arịa ehi n'Abia?

Kọmishọna na-ahụ maka ọrụ ugbo n'Abia bụ Ikechi Mgboji adọọla ndị Abia aka na ntị ha ghara iri anụ ngụgụ ehi ọbụla nọ na steeti ahụ ugbua.

O kwuru na ọ bụ ka ha ghara ibute ọrịa ọ kpọrọ "Bovine Tuberclosis" nke a chọpụtara na steeti ahụ ọhụrụ a.

Ọkammụta Mgboji kwuru na ya bụ ọkwa adịla mkpa maka nchọpụta etu ọrịa ahụ si metụta ehi ndị a.

Gịnị bụ 'Bovine Tuberclosis'?

Nke a bụ ọrịa otu nje a kpọrọ "Mycobacterium bovis" nke metụtara nje na-ebute ụkwara nta (Tuberculosis) a na-ahụ n'ahụ mmadụ maọbụ nke nnụnụ.

Mgboji kwuru na a chọpụtara ya bụ nje n'izuụka abụọ gara aga n'Aba.

Njirimara ọrịa a

Mgboji kwuru na njirimara ọrịa a bụ ntitu ahụ niile , oke ụkwara na ọnwụ.

Mgboji kwuru na ọrụ ha bụ i site n'aka ndị dọkịta na-elekọta anụmanụ mee nyocha ehi ọbụla akpụpụtara maka ogbugbu nakwa iresi ọha.

N'okwu ya" o nweghị ka ị ga-esi mata ehi orịa a ji karịa igbu ya maọbụ nyochaa ehi ahụ."

"Nke a mere anyị ji sị ndị mmadụ ka ha ghara iri ngụgụ anụ ehi ugbua mana ha nwereike iri akụkụ ndị ọzọ.

Mgboji kwuru na ụlọọrụ ya agwaala ndị dọkịta na-elekọta anụmanụ na-anọ n'ebe a na-egbu anụ ka ha kee nkwụcha ma chọpụta ehi ọria a ji ma ghara ikwe ka e resi ya ọha.

Ihe ministri ahụike Abia steeti kwuru maka ọrịa a

Kọmịshọna na-ahụ maka ahụike n'Abia steeti bụ Jonathan Osuji kwuru na o nweghị ihe o nwere ikwu maka ya bụ ọrịa ji anụ ehi na steeti ya.

O kwuru na kọmishọna ọrụ ugbo ma ihe mere o ji kwupute ọkwa ahụ ọ mara maka ngụgụ anụ ehi mana o mebeghi ka ngalaba ahụike steeti Abia mara maka ya.

N'iza ajụjụ, Oriaku Nwadiuto Nwankwu onye bụ onyeisi oru ahụike n'ebe a na-egbu anụ n'Ubakala di n'ọchịchị ime obodo Umuahia South siri na ha na-arụ ọrụ ha nke ọma ịhụ na-echekwara ndụ ndị nata anụ ehi n'akụkụ steeti Abia ebe ha na-elekọta.

Ọ kọwara na ha na-enyocha ehi ọbụla tutu egbu ya nakwa mgbe egbuchara ya, ma nakwa etufu anụ ọbụla ahụrụ na o bu nje ọbụla.

Ndị n'egbu anụ na ndị nrekwa anụ ndị tinyere ọnụ na okwu a siri na ọmama ọkwa ahụ gọọmentị mara isi ka aghara iri akụkụrụ anu ehi Awusa, adoghachila eke ekekere azụ na mgbere anụ ha n'atu.

Ihe ndị na-egbụ anụ kwuru

Dika onye ọrụ nchekwa ahụike ogbe ahụ siri na ha na-eme ezi nyocha tutu, nakwa mgbe egbuchara anụ niile na ọdọ ebe ahụ ana egbu ehi n'Ubakala, onye ode akwụkwọ ndị otu na-egbu ehi n'ebe ahụ bụ Maazi Jacob Uwalaka, kwenyere na-ọbụ eziokwu, ebe ọ nọkwa na ekwusi ike na ọdịghịi mgbe ọbụla ha ga-ekwe ka ebubatara ndị obodo anụ ọbụla bu oke rie ọ nwụọ.

Ọ bụ ezie na Kọmịshọna na-ahụ maka ọrụ ụbị n'Abia steeti anọghị n'oche ya, otu onye ọrụ gbapụtara ihe n'ụlọ ọrụ ahụ, siri na ọ dịghị ihe dịka ndị ọrụ ọtawaike ha tinyere iji hụ na ndị n'egbu anụ ehi Awusa rubere isi igbu nakwa ire nani ehi Awusa nke na-enweghi nsogbu ahụike ọbụla.Onye a na-achọghị ka akpopụta aha ya sikwara na ọ bụ ezie na-achọpụtala ọrịa Bovine Tuberculosis n'ime steeti Abia, ma sikwa na ọ bụ nani n'obere ọnụ ọgụgụ.