સ્મૃતિ મંધાનાએ ODIમાં રચ્યો ઇતિહાસ, વિશ્વની બીજી સૌથી ઝડપી સદી ફટકારી છતાં ભારતની ટીમ ઑસ્ટ્રેલિયા સામે હારી

ભારત અને ઑસ્ટ્રેલિયા વચ્ચે ત્રણ મૅચોની વિમૅન્સ ઓડીઆઈ સિરીઝની છેલ્લી મૅચમાં ઑસ્ટ્રેલિયાએ 43 રને જીત મેળવી છે. આ મુકાબલામાં ઑસ્ટ્રેલિયાની ટીમે ભારતને જીત માટે 413 રનનું લક્ષ્યાંક આપ્યું હતું. પરંતુ ભારતની ટીમ 47 ઓવરમાં 369 રન બનાવીને ઑલઆઉટ થઈ ગઈ હતી. ભલે આ મૅચ ભારતની મહિલા ટીમ હારી ગઈ પરંતુ તેણે તેને જીતવાનો તમામ સંભવ પ્રયાસ કર્યો. આ મુકાબલામાં કુલ 781 રન બન્યા હતા. આ મૅચમાં સૌથી આકર્ષક હતી સ્મૃતિ મંધાનાની સદી.

ભારત અને ઑસ્ટ્રેલિયા વચ્ચે વિમૅન્સ વન-ડે સિરીઝની ત્રીજી મૅચમાં રનોની વણઝાર જોવા મળી હતી. ઑસ્ટ્રેલિયાનાં બૅથ મૂની અને ભારતીય ઓપનર સ્મ઼તિ મંધાનાની સદી આ મૅચમાં છવાઈ હતી.

દિલ્હીના અરુણ જેટલી સ્ટેડિયમમાં રમાયેલી આ મૅચમાં ભારતનાં બેટર સ્મૃતિ મંધાનાએ બેટ મારફતે શાનદાર પ્રદર્શન કર્યું. મંધાનાએ 63 બૉલમાં 125 રન ફટકાર્યાં હતાં. જેમાં 17 ચોક્કા અને 5 છક્કા સામેલ હતા.

સાથે વિમૅન્સ વન-ડેમાં કોઈ બેટરની આ બીજી સૌથી ઝડપી સદી છે. મંધાનાએ વિમૅન્સ ઓડીઆઈમાં સતત બીજી સદી ફટકારી છે.

ભારતીય ટીમની આક્રમક ઇનિંગ છતાં ટીમ મૅચને પોતાના પક્ષે કરવામાં નિષ્ફળ રહી હતી અને 369 રનમાં ઑલ આઉટ થઈ ગઈ હતી.

મહેમાન ટીમે પહેલી બૅટિંગ લીધી હતી અને 413 રનનો જંગી જુમલો ખડક્યો હતો. ઑસ્ટ્રેલિયા વતી બૅથ મૂનીએ યાદગાર ઇનિંગ રમી હતી.

વિમૅન્સ ODIમાં સૌથી ઝડપી સદી

એક કૅલેન્ડર વર્ષમાં સૌથી વધુ સદી

વિમૅન્સ ક્રિકેટમાં સૌથી વધુ વન-ડે સદી

ભારતીય ટીમ અને રનોની આતશબાજી

જોકે, જીતવા માટે 413 રનના લક્ષ્યાંકનો પીછો કરતા ભારતની મહિલા ટીમે પૂરી તાકત લગાવી હતી. પરંતુ તેના તમામ બેટરો 47 ઓવરમાં 369 રન બનાવીને આઉટ થઈ ગયાં હતાં.

ભારત તરફથી સ્મૃતિ મંધાનાએ 125 રન ફટકાર્યા હતા. મંધાનાએ 63 બૉલમાં 125 રન ફટકાર્યાં હતાં. જેમાં 17 ચોક્કા અને 5 છક્કા સામેલ હતા.

સ્મૃતિ મંધાનાએ આ પહેલાં માત્ર 23 બૉલમાં તેની અર્ધસદી ફટકારી હતી. આ ભારત તરફથી મહિલા વન-ડેમાં સૌથી ઝડપી અર્ધસદી રહી.

પછી મંધાનાએ તેની સદી માત્ર 50 બૉલમાં પૂર્ણ કરી. જે ભારત તરફથી વિમૅન્સ ઓડીઆઈમાં કોઈ પણ બેટરની સૌથી ઝડપી સદી છે. મંઘાનાએ પોતાનો જ રેકૉર્દ ધ્વસ્ત કર્યો.

જ્યારે કે કૅપ્ટન હરમનપ્રિતકોરે 35 બૉલમાં 52 રન ફટકાર્યા હતા. દિપ્તી શર્માએ 58 બૉલમાં 72 રન ફટકાર્યા હતા. સ્નેહ રાણા પણ છેલ્લે સુધી ઝઝૂમ્યાં હતાં. તેમણે 41 બૉલમાં 35 રન બનાવ્યા હતા.

ભારત તરફથી સૌથી સફળ બૉલર અરુંધતિ રેડ્ડી રહ્યાં હતાં. તેમણે 86 રન આપીને ત્રણ વિકેટો ઝડપી હતી.

રેણુકા સિંહ અને દિપ્તી શર્માએ 2-2 વિકેટો ઝડપી હતી. ઑસ્ટ્રેલિયા તરફથી સૌથી વધુ વિકેટ ઝડપનારાં કિમ ગ્રથ રહ્યાં હતાં. તેમણે 69 રનમાં ત્રણ વિકેટો ઝડપી હતી.

ટૉસ જીતીને ઑસ્ટ્રેલિયાએ પહેલાં બૅટિંગ લીધી હતી. આ જીત સાથે ત્રણ વન-ડે મૅચોની સિરીઝ ઑસ્ટ્રેલિયાએ 2-1થી જીતી લીધી છે.

ઑસ્ટ્રેલિયાની ટીમે બનાવ્યા હતા 412 રન

આ મૅચમાં ઑસ્ટ્રેલિયાની ટીમે 47.5 ઓવરમાં 412 રન બનાવ્યા હતા. ઑસ્ટેલિયાની ટીમનો આ વિમૅન્સ ઓડીઆઈમાં સંયુક્ત રીતે સૌથી મોટો સ્કોર છે.

ઑસ્ટ્રેલિયાએ આ પહેલાં 1997માં ડેનમાર્ક સામે ત્રણ વિકેટે 412 રન બનાવ્યા હતા. બૅથ મૂનીએ 75 બૉલમાં 138 રન બનાવ્યા હતા.

જેમાં 23 ચોક્કા અને એક છક્કો સામેલ છે. ત્યાં જ્યૉર્જિયા વૉલે 81 રન અને એલિસા પેરીએ 68 રન બનાવ્યાહતા. બૅથ મૂનીએ 57 બૉલમાં સદી ફટકારી હતી.

બીબીસી માટે કલેક્ટિવ ન્યૂઝરૂમનું પ્રકાશન