ભારતનું એ ગામ, જ્યાં આઝાદી પછી વિધવાઓએ એટલો કર ચૂકવવો પડતો કે જમીન વેચવી પડે
- લેેખક, માયાક્રિષ્નન કન્નન
- પદ, બીબીસી તમિલ માટે
ભારત દેશને આઝાદી મળ્યાનાં અનેક વર્ષ પછી પણ તામિલનાડુના કાલવરાયણ હિલ્સનાં ગામોમાં વિધવા મહિલાઓ એક ચોક્કસ કર ચૂકવતી રહી હતી.
તેનું કારણ એ હતું કે દેશ આઝાદ થયો એ પછી પણ કાલવરાયણ હિલ્સના ઘણાં ગામોમાં જમીનનો વહીવટ જાગીરદારોના હાથમાં હતો. વિધવા મહિલાઓ પાસેથી 1976 સુધી મુંડાચી નામનો કર વસૂલવાનું ચાલુ રહ્યું હતું. તેની પાછળની કહાણી શું છે?
'મુંડાચી કર ચૂકવવા તેમણે જમીન વેચી'
કાલવરાયણ હિલ્સ વિસ્તાર સાલેમ અને કલ્લાકુરિચી જિલ્લામાં ફેલાયેલો છે. તેમાં વેલ્લારીકાડા નામનું એક ગામ છે. પોતાનું કામ પૂર્ણ કરીને પર્વતીય જંગલમાં બેઠેલા તીર્થન અને તેમનાં પત્ની ચિન્નમા તેમની 50 વર્ષ પહેલાંની પરિસ્થિતિને યાદ કરે છે.
તીર્થન કહે છે, "મારા દાદાનું અવસાન થયું એ પછી તેમનાં પત્ની, મારાં દાદીએ ફરીથી લગ્ન કર્યાં ન હતાં. તેઓ વિધવા થયાં હોવાથી તેમને કર ચૂકવવાનું કહેવામાં આવ્યું હતું. એ સમયે જંગલમાં કોઈ ઊપજ ન હતી. તેથી તેઓ કર ચૂકવી શકતાં ન હતાં. એટલે તેમણે જંગલમાંની તેમની જમીન વેચી દીધી હતી અને દુરાઈને કર ચૂકવ્યો હતો."
તીર્થનનાં પત્ની ચિન્નમા કહે છે, "અહીંની કોઈ પણ વૃદ્ધાને પૂછશો તો તેઓ કર વિશે વાત કરશે. તે એક કર હતો અને જે સ્ત્રીઓના પતિનું અવસાન થતું હતું તે સ્ત્રીઓએ એ કર ચૂકવવો પડતો હતો. તેને મુંડાચી કર કહેવામાં આવતો હતો."
નજીકના પચેરી ગામનાં રહેવાસી થેની હવે 75 વર્ષનાં છે. તેઓ કહે છે, "મારાં લગ્ન નાની વયે થયાં હતાં. મારા પતિના મૃત્યુ પછી મેં ફરી લગ્ન કર્યાં ન હતાં. એ વખતે મુંડાચી કર ચૂકવવો પડતો હતો, પરંતુ આ વિસ્તાર તામિલનાડુ સરકારના કાર્યક્ષેત્ર હેઠળ આવ્યો ત્યારથી તે કર લેવાનું બંધ થઈ ગયું."
મેલ બચ્ચેરી ગામનાં 65 વર્ષનાં વૃદ્ધા અમ્માસીને છ સંતાનો છે. તેમના છેલ્લા સંતાનના જન્મના થોડા મહિના પહેલાં તેમના પતિનું અવસાન થયું હતું. તેઓ કહે છે, "મને યાદ છે કે મારાં કાકી મારા માટે મુંડાચી કર ચૂકવતાં હતાં."
દેશ સ્વતંત્ર થયો પછી પણ કાલવરાયણ હિલ્સ વિસ્તારના ગામડાંઓ જાગીરદારોના નિયંત્રણ હેઠળ હતાં. 1918માં પ્રકાશિત મદ્રાસ ગેઝેટીયર કાલવરાયણ હિલ્સમાંની વહીવટી વ્યવસ્થા વિશે કેટલીક માહિતી પ્રદાન કરે છે.
End of સૌથી વધારે વંચાયેલા સમાચાર
આ કાલવરાયણ હિલ્સ વિસ્તારને પાંચ જાગીરમાં વહેંચવામાં આવ્યો હતો. તેમાં લિટલ કાલવરાયણ કન્ટ્રી, ધ ગ્રેટ કાલવરાય રાજ્ય, મટીરિયલ કાઉન્ટડાઉન કન્ટ્રી, ધ કન્ટ્રી ઑફ નોટી કાઉન્ટડાઉન અને આર્યન કાઉન્ટડાઉન કન્ટ્રીનો સમાવેશ થાય છે.
આ પાંચ જાગીરો પર પરંપરાગત રીતે મલયાલી રાજવંશના સરદારોનું શાસન હતું. જોકે, આ વિસ્તારો તેમના નિયંત્રણ હેઠળ કેવી રીતે આવ્યા એ અંગે વિવિધ કથાઓ છે, પરંતુ કોઈ નક્કર ઐતિહાસિક માહિતી નથી.
જટાયા ગૌંડા રાજવંશનાં બે તામ્રપત્રોમાં આ પ્રદેશ વિજયનગર રાજાઓના સત્તાક્ષેત્ર હેઠળનો હોવાનું દર્શાવવામાં આવ્યું છે. મદ્રાસ ગૅઝેટિયર અનુસાર, એ તામ્રપત્રો પૈકીનું એક કૃષ્ણદેવરાયના સમયગાળાનું છે અને બીજું અચ્યુતદેવરાયના સમયગાળાનું છે.
તત્કાલીન જાગીરદારોએ ત્યાં રહેતા લોકો પર વિવિધ પ્રકારના કર લાદ્યા હતા, જેથી તેઓ તેમાંથી આવક મેળવી શકે.
'કરાલા વામસમ ઑફ ધ ઇસ્ટર્ન ઘાટ્સ' પુસ્તકના લેખક ચેઝિયન કહે છે, "જમીન પરનો કર, પીવાના પાણીનો કર, રહેઠાણ પરનો કર, બકરા પરનો કર, પશુઓ પરનો કર, જંગલ પરનો કર, ઘાસ પરનો કર, હવા પરનો કર, લગ્ન પરનો કર, અપરિણીત પરનો કર અને વિધવાઓ તથા વિધુરો પરનો કર સહિતના 15થી વધુ કર વસૂલવામાં આવતા હતા."
થોરાડીપટ્ટુના કોનામ્મલના કહેવા મુજબ, કોઈ સ્ત્રી સાથી વિનાની ન હોવી જોઈએ તેવો રિવાજ આ હિલ્સ વિસ્તારમાં હતો.
કોન્નામલ કહે છે, "કોઈ સ્ત્રીને તેનો પતિ પસંદ ન હોય અને તેના જન્મસ્થાનમાં પાછી ફરે અથવા તો તેમના પતિ મૃત્યુ પામે તો તેમના તરત જ લગ્ન કરાવી નાખવામાં આવતા હતા. તેને લગ્ન નહીં, પરંતુ 'ગાંઠબંધન' કહેવામાં આવતું હતું. કોઈ સ્ત્રીનો પતિ વૃદ્ધાવસ્થામાં મૃત્યુ પામે અથવા પતિના મૃત્યુ પછી જે સ્ત્રીઓ ફરી લગ્ન માટે સંમત ન થાય તેમણે જાગીરને મુંડાચી કર ચૂકવવો પડતો હતો."
ઝાકીર રાજવંશ હવે શું કરી રહ્યો છે?
સ્થાનિક લોકોમાં પુથુપાલાપટ્ટુના જાગીરદાર તરીકે ઓળખાતા ચિન્નાયા કુરુમ્બા ગૌંતર હાલ પુથુપાલાપટ્ટુ પહાડી વિસ્તારના છેડે એક નાના ઘરમાં રહે છે.
તેઓ કહે છે, "મારા દાદાના સમયમાં અમારી પાસે 1,000 એકરથી વધારે જમીન હતી. અમારા મહેલમાં 100થી વધુ નોકરો કામ કરતા હતા. મને યાદ છે કે લોકો પાસેથી અમે 15થી વધુ કર વસૂલતા હતા."
નાનો કુરુમ્પક કુંદર તેને એ જગ્યાએ લઈ ગયો હતો, જ્યાં જાગીરદારોનો મહેલ હતો. એ મહેલ એક સમયે ખૂબ જ ભવ્ય હશે, પરંતુ હવે તેનો અડધાથી વધારે હિસ્સો ખંડેર થઈ ગયો છે. મહેલના ખંડેરમાં સ્નાન માટે અલગ કૂવો, ઘોડાના તબેલા અને સુંદર રીતે શણગારેલી દીવાલો છે તે આશ્ચર્યજનક છે.
આ વિસ્તારો તામિલનાડુ સરકારના તાબામાં ક્યારે આવ્યા?
માહિતીના અધિકારના કાયદા હેઠળ આ સંદર્ભમાં સવાલ કરવામાં આવ્યો ત્યારે જણાવવામાં આવ્યું હતું, "1963ના ગુલામી નાબૂદી કાયદા હેઠળ આ વિસ્તારોને 1976ની 25 જૂનથી તામિલનાડુ સરકારના કાર્યક્ષેત્ર હેઠળ લાવવામાં આવ્યા હતા."
કલ્લાકુરિચીમાં 2024માં ગેરકાયદે દારૂકાંડમાં અનેક લોકો મૃત્યુ પામ્યા પછી મદ્રાસ હાઈકોર્ટે આ વિસ્તારના લોકોનું જીવનધોરણ સુધારવા અંગેની પોતાની પહેલ સંદર્ભે એક કેસ હાથ ધર્યો હતો. તે કેસમાં જવાબ દાખલ કરનાર વનવિભાગે જણાવ્યું હતું કે જાગીરદારો દ્વારા વનસંસાધનોનું શોષણ કરવામાં આવી રહ્યું છે. તામિલનાડુ સરકારના નિયંત્રણ હેઠળના કાલવરાયણ હિલ્સ વિસ્તારની વધુ માહિતી એ સંદર્ભમાં આપવામાં આવી હતી.
તામિલનાડુ સરકારે 1963ના કાયદા હેઠળ કાલવરાયણ હિલ્સ વિસ્તારને નિયંત્રણમાં લેવાનો આદેશ 1965ની 31 ડિસેમ્બરે બહાર પાડ્યો હતો. જાગીરદારોએ તેને અદાલતમાં પડકાર્યો હતો. આ કેસનો ચુકાદો 1976માં તામિલનાડુ સરકારની તરફેણમાં આવ્યો હતો.
કાલવરાયણ હિલ્સ પ્રદેશને તામિલનાડુમાં ભેળવી દેવામાં આવ્યો એ પછી તામિલનાડુ સરકારની વિવિધ કલ્યાણકારી યોજનાઓ આ પ્રદેશમાં લાગુ કરવામાં આવી હતી. ખાસ કરીને આ પ્રદેશના લોકોનો સંપર્ક બહારની દુનિયા સાથે થયો હતો. લોકો શાળાએ જતા થયા હતા.
ચેઝિયન કહે છે, "થોડાં વર્ષો પહેલાં સુધી આ પર્વતીય પ્રદેશના 70થી વધુ ગામડાંમાં પતિ વિનાની કોઈ સ્ત્રી ન હતી. સ્ત્રીઓ પતિ ગુમાવે પછી કર ચૂકવવાના ડરથી ફરી લગ્ન કરી લેતી હતી, ભલે તેને એ પસંદ હોય કે ન હોય."
કલ્લાકુરિચીના જિલ્લા કલેક્ટર એમએસ પ્રશાંતે જણાવ્યું હતું કે હાલમાં આ વિસ્તારના લોકોના કલ્યાણ માટે વિવિધ સરકારી યોજનાઓનો અમલ થઈ રહ્યો છે. તામિલનાડુ સરકાર પહાડી પ્રદેશમાં 1,565 મહિલાઓને માસિક સહાય આપી રહી છે. એ મહિલાઓમાં ત્યક્તાઓ, વિધવાઓ અને નિરાધાર સ્ત્રીઓનો સમાવેશ થાય છે.
બીબીસી માટે કલેક્ટિવ ન્યૂઝરૂમનું પ્રકાશન
