Delyth Harris Oed: 35 Statws teuluol: Yn priod i Robin, gyda 2 o blant (Dion, 5 a Sioned 9) Ardal: Bethesda, Gwynedd Gwaith: Cynorthwy-ydd Personol, Cyngor Cefn Gwlad Cymru Cyngor gorau: Gwnewch yn siŵr bod amrywiaeth yn eich deiet drwy geisio ryseitiau newydd fel nad ydych yn diflasu, a dechreuwch ymarfer. Wedi colli: 47 pwys ers mis Mai gyda Weight Watchers, a stôn cyn hynny.

Roeddwn i wedi bod yn rhy fawr am rai blynyddoedd, ac roeddwn i wedi blino ar fod yn dew ac yn anffit - doeddwn i ddim yn medru gwneud y pethau roeddwn i'n mwynhau eu gwneud, ac roedd hi'n anodd ffeindio dillad i ffitio. Mae gen i ferch anabl a dw i wedi bod dan straen ers ei geni, a dw i'n credu i mi ddefnyddio hyn fel rheswm dros orfwyta. Doedd gen i ddim amser i fi fy hun.

Mi benderfynais i newid farferion drwg yn gyntaf, a ddaru mi ddechrau mynychu dosbarth camau aerobig un noson yr wythnos yn lle eistedd o flaen y teledu. Wedyn, ddaru mi stopio bwyta byrbrydau a dechrau bwytan synhwyrol. Ddaru mi golli stôn yn gyflym, ond ddaru mi aros yn stond am oesoedd. Ddaru ffrind i mi ffeindio bod gynni hi glefyd siwgr, a bu rhaid iddi golli pwysau. Ddaru mi fynd i Weight Watchers efo hi, nid yn unig i'w chefnogi hi, ond er fy lles fy hun hefyd. Ddaru ni ymuno mis Mai diwetha, a dw i wedi colli 47 pwys erbyn hyn.

Dw in gwneud mwy o ymarfer rŵan, a dw i'n mynychu o leia tri dosbarth aerobig/ tynhau bob wythnos a dau ddosbarth gyda'r nos (os oes gen i amser). Mae hyn wedi helpu fi i newid fy siâp yn ddramatig. Dw i'n iach rŵan, a dw i'n teimlo cymaint yn well o'i herwydd, a dan ni'n mwynhau dyddiau seiclo fel teulu ar y penwythnosau.