Një javë më parë askush nuk do ta kishte parashikuar - një fitore për socialistët dhe një disfatë për Partinë Popullore.
Votë proteste ndaj Aznarit
Sulmet me bomba në Madrid bënë më shumë sesa tronditën vendin deri thellë në zemrën e tij, ato provuan se ishin faktori vendimtar në zgjedhjet e përgjithshme.
U duk sikur votuesit u kthyen kundër Partisë qeverisëse Popullore për shkak të mënyrës se si reagoi pas sulmeve me bomba javën e shkuar ku gjetën vdekjen 200 persona.
Qeveria kishte këmbëngulur se në sulme ishte përfshirë grupi separatist ETA edhe pse gjithnjë e më shumë prova e drejtonin gishtin drejt Al-Kaidas.
Përparsitë
Rezultatet e zgjedhjeve në Spanjë
• Partia Socialiste 43%
• Partia Popullore 38%
• Partia Rajonale Katalane 3%
• Republikanët e Majtë të Katalonias 2,5%
• E Majta e Bashkuar 5%
• Pjesëmarrja 77%
Udhëheqësi i partisë Socialiste, Jose Luis Rodriguez Zapatero, tha se përparësia e tij e parë do të ishte goditja e terrorizmit në të gjitha format e tij.
Por ka mundësi që ai ta bëjë këtë në një mënyrë krej ndryshe krahasuar me qeverinë që po largohet.
Ai ka qenë një kundërshtar i fortë i mbështetjes nga Spanja për luftën e udhëhequr nga amerikanët në Irak dhe me të ardhur në pushtet ai mund të kërkojë të tërheqë trupat spanjolle që shërbejnë tani në Irak.
Kthimi çastet e fundit i mbështetjes në favor të Socialistëve ngre edhe një mendim tjetër shqetësues.
Nëse Al-kaida ishte përgjegjëse për sulmet e së enjtes, duket se ka pasur një ndikim të konsiderueshëm në ndryshimin e qeverisë në një demokraci udhëheqëse perëndimore.
