 | | | | | | Botuar: E enjte, 04 mars 2004 - 14:00 CET | | | | Powell hedh poshtë akuzat e presidentit haitian | | | Sekretari amerikan i Shtetit, Colin Powell, ka hedhur poshtë akuzat e presidentit të larguar haitian se amerikanët e kishin larguar atë me pahir.
Powell: Presidenti Aristide u largua vullnetarisht |
Zoti Powell tha se presidenti haitian Jean Bertrand Aristide ishte larguar nga Haiti vullnetarisht.
"Sugjerimi (i zotit Aristide) se në një farë mënyre amerikanët e rrëmbyen atë dhe e larguan jashtë dëshirës së tij nuk është i vërtetë," tha zoti Powell.
Zyrtari i lartë amerikan tha se largimi i zotit Aristide kishte ndodhur për shkak të përkeqësimit të gjendjes së sigurisë dhe se vendimi i largimit të tij ishte marrë nga "autoritetet përkatëse të sigurisë të presidentit Arisitide".
"Ata u konsultuan me ne, kërkuan ndihmën tonë për largimin e tij dhe ne ishim gati ta bënim atë brenda një periudhe të shkurtër," tha zoti Powell.
Mungesë ligji
Në Haiti janë shtuar përpjekjet për t'i dhënën fund mungesës së ligjit dhe kanë vazhduar përleshjet midis policisë dhe bandave besnike të presidentit Arisitide.
Kryeministri haitian Yvon Neptune ka shpallur gjendjen e jashtëzakonshme për t'i dhënë fund dhunës dhe grabitjeve.
Megjithatë, korrespondentët e BBC-së në kryeqytetin Port-au-Prince thonë se ka pikëpyetje edhe për autoritetin e zotit Neptune, i cili ka qenë një aleat i ngushtë i ish- presidentit.
Udhëheqësi i rebelëve më herët i urdhëroi luftëtarët e tij të ulin armët.
Ndërkohë trupat amerikane dhe franceze kanë kryer patrullimet e tyre të para në kryeqytetin haitian.
Është planifikuar që në Haiti të dërgohet një forcë më e madhe ndërkombëtare, por vendet e Karaibeve kanë thënë se ata nuk do të marrin pjesë pas akuzave të presidentit Aristide se ai ishte detyruar me forcë të largohej nga pushteti.
Ata kanë kërkuar për një hetim të pavarur. | |
| | |
