'Olompikii Tookiyoorratti atileetonni maaraatoonin Itoophiyaa bakka bu’an koree teknikaa biyyaalessaan filamu'- Federeeshinii

Federeeshiniin Atileetiksii Itoophiyaa atileetootni Itoophiyaa bakka bu'uun Olompikii Tookiyoo bara 2020 irratti maaraatoonii dorgoman gama filachuutin murteen xummuraa kan Koree Teeknikaa Biyyaalessaa ta'uu beeksise

Federeeshinichi qophii Olompikii Tookiyoo ilaalchisee miidiyaalef ibsa laatera.

Ibsi har'aa kun Federeeshinii Atileetiksii Itoophiyaa, Koreen Olompikii Itoophiyaa, Komishiniin Ispoortii Federaalaafi Ministeera Aadaafi Tuurizimii ni hirmaatu jedhamee turullee Federeeshiii Atileetiksii Itoophiyaa qofuma ibsicha laate.

Kunis marii qaamolee kunneen walin taasifamen ibsa har'aa Federeeshiniin Atileetiksii Itoophiyaa akka kennu waliigalamuunsaa himameera.

Federeeshinichi Caamsaa 01 bara 2021 dorgommii calallii maaraatoonii magaala Sabbataatti adeemsiseen gama dhiiraatin atileetota qabxii foyyaa'aa qaban afur ibsee ture.

Atileetootni dorgommii calallii Olompikii Tookiyoo 2020 irratti tokkoffaa hanga afraffaa bahanis Shuraa Qixxaataa, Lelisaa Desisaa, Sisaay Lammaafi Caaluu Dassoo dha.

Gama biraatin Atileet Qananiisaa Baqqalaa "dorgomichi sirrii miti" jechuun dorgommii calallii taasifameeratti hirmaachuurraa of qusatee ture.

Dabalataan "ta'e jedhamee biyya bakka bu'ee akkan hin dorgomne ta'aa jira" jechuunis himee ture.

Boodarrammoo Koreen Olompikii Itoophiyaa Atileet Qananiisaan dorgommicharratti akka hirmaatu beeksisuunsaa ni yaadatama.

Federeeshiniin Atileetiksii Itoophiyaa gama isaatin atileetota dorgomicharratti hirmaatan gama murteessuutin aangoon isa dhumaa kan Koree Teknikaa Biyyaalessaa ta'uu ibsa har'a miidiyaalef kenneen baaksiseera.

Koreen Teknikaa Biyyaalessaa kun Pirezidaantii Koree Olompikii Biyyaalessaa kan ta'an Dr Ashabbir Waldagoorgisin kan hogganamu ta'uu mala, garuu koricha keessatti leenjistootni atileetiksii ni argamu.

Dhimma kanarratti Koree Olompikii Biyyaalessaa walin waliigalteerra gahamuunsaas himameera.

Murteen Koree Teknikaa Biyyaalessaas fulduratti kan beeksifamu ta'uun himameera.

Gama biraatin atileetootni fageenya meetira 800 hanga 10,000 Olompikii Tookiyoorratti Itoophiyaa bakka bu'an filachuuf atileetootni 73 dorgommii calalliif qophii taasisaa jiraachun himameera.

Atileetootni kunneen sa'aa foyyaa'aa dorgommii idil-addunyaarratti qaban, qabxii fooyyee shaampiyoonaa atileetiksii Itoophiyaa irratti galmeessisan akkasumas kanaan dura dorgommii Olompikiif filamanii sababa dhibee Covid-19fi miidhamaan dorgommii calallii irratti hirmaachuu hin dandeenyedha.

Atileetotni kunneen Waxabajjii 08 bara 2021 Neezarlaand Heenglootti dorgommii calallii adeemsisuun kunneen sadarkaa fooyyee galmeessisan Olompikii Tookiyoof akka filataman himameera.

Kana malees, atileetotni dhuunfaadhaan baasii ofii kaffaluun Heenglootti dorgomuu danda'an dorgommii calallii taasifamun qabxii gaarii yoo fidan Olompikii Tookiyoof kallattin akka filaman himameera.