Mohaammad Saalaah taphni xumuraa Shaampiyoons Liigii 'yeroo haaloo itti baanudha' jedhe

Mohaammad Saalaah taphni xumuraa Shaampiyoons Liigii Liivarpuul fi Riyaal Maadriid walitti fidu ''yeroo haaloo itti baanudha,'' jedhe.

Gareen lamaan Paarisitti Caamsaa 28 walargan kun, 2018ttis tapha waancaaf walarganii turan - gaafas Riyaal 3fi 1n injifate.

Tapha gaafasiin Saalaah miidhaa gateettii isaarra Sarjiyoo Raamoos irraan gaheen, boqonnaa dura dirree dhiisee bahuuf dirqame.

''Baay'ee gammadeera amma, taphichaan dura xumuraaf Maadrid wajjiin taphachuun fedha jedhee dubbadheen ture,'' jedhe jifataan ganna 29.

''Tapha xumuraa (2018) mo'amneerra. Guyyichi hunda keenyaaf guyyaa gaddaa ture, amma garuu yeroonsaa yeroo haaloo itti baanudha.

''Taphichi nutti cimuunsaa wan oolu miti, gareewwan ciccimoo hedduu mo'atanii [as gahan]. Kanaaf xiyyeeffannoon keenya taphicharra tahuu qaba.''

Moo Saalaah fi waahillan isaa guyyaa gaddisiisaa sana irra aanuun, waggaa tokkoon booda xumuraaf qaqqabuun Totanihaam mo'atanii waancaa Chaampiyoons Liigii marroo 6fffaf kaasan. Gaafas Saalaah goolii tokko lakkoofsise.

Waqtii taphaa bara kanaan Liivarpuul waancaa afur altokkotti kaasuuf (quadruple) adamsaa jiru. Amma dura Waancaa Kaaraabaawoo kan kaasan oggaa tahu, FA Cup'f ammoo xumura gahaniiru. Taphni kunis Weembileetti Cheelsii wajjiin Caamsaa 14 gaggeeffama.

Pirimeer Liigii Ingiliziin ammoo qabxii tokko callaan Maanchistar Siititti aanuun lammaffaarra jiru - liigicha xumuruuf taphoota afurtu hafa.

Dursaan garee biyyaalessaa biyya Masrii Moo Saalaah, qabxii Liivarpuul barana galmeessisaa jiruuf shoorta guddaa kan gumaache oggaa tahu, walumatti gooliiwwan 30 galchuun, kubbaa goolii tahan 14 ammoo mijeessee kenneera.

Gahumsa isaa kanaafis yeroo lammaffaaf taphataa cimaa baranaa jedhamuun Waldaa Barreessitoota Kubbaa Miilaan filatameera.