Sanwo-Olu: ₦200 sì ₦300 làwọn èèyàn yóò máa wọ ọkọ̀ ojú irin ayára bí àṣá tí a ṣẹ̀ṣẹ́ rà

Gomina ipinlẹ Eko, Babajide Sanwo-Olu ti fi ọkan awọn eeyan ipinlẹ naa balẹ pe owo perete ni wọn yoo maa wọ ọkọ oju irin ni ipinlẹ naa ti awọn ba ti pari awọn ọna oju irin ti wọn n ṣe lọwọ.

Sanwo-Olu lo sọ ọrọ naa lasiko ifọrọwerọ kan pẹlu ileeṣẹ iroyin Channels nigba to n ṣalaye ohun ti ijọba rẹ n ṣe lati koju iṣoro funkẹrẹ-fakẹrẹ to nn ba ipinlẹ Eko finra.

O ni "A gbagbọ pe iye owo ti awọn eeyan yoo maa san ko ni pọ rara."

"Iye owo naa ko ni to ẹgbẹrun kan... ko ni ju nnkan bii igba naira si ọọdunrun naira lọ."

"Ninu iwoye mi, kii ṣe pe awọn eeyan yoo na owo apo wọn tan lori pe wọn n wọ ọkọ oju irin, owo naa ko ni wọn rara, bẹẹ si ni ọkọ oju irin ọhun yoo wa nilẹ fun gbogbo araalu."

Sanwo-Olu ni owo ti wọn yoo maa na lori ọkọ oju irin ko ni ju iye owo ti wọn n na lati wọ ọkọ ọlọpọ ero BRT lọ.

Gomina naa sọ pe anfani pupọ lo wa ninu lilo ọkọ oju irin nitori kii gba akoko to pọ bii ọkọ oju popo.

Ọkọ oju irin tuntun niluu Eko

Ọjọ kọkandinlogun, oṣu Kinni yii ni ijọba Eko kede pe awọn ti ra ọkọ oju irin ayarabiasa meji lati ilẹ Amẹrika.

Ọjọ naa ni ijọba Eko fẹnuko lori idunadura lori ọkọ oju irin naa pẹlu ileeṣẹ Talgo Incorporated ,niluu Milwaukee nilẹ Amẹrika.

Sanwo-Olu sọ fun awọn to wa nibi ti wọn ti ra ọkọ oju irin ọhun pe ọkọ naa ni yoo maa na ọna oju irin oni kilomita mẹtadinlogoji ti wọ ṣẹṣẹ ṣe.

Ati pe ọkọ oju irin ayara bi aṣa naa ni akọkọ iru rẹ ni iha Iwọ Oorun Afrika.