RCCG Dating Site: Wo àwọn òfin tí ìjọ Redeem gbé kalẹ̀ kàwọn ọ̀dọ́ tó wọ ojú òpó olólùfẹ́

Ile ijọsin Redeem Christian Church of God (RCCG), ẹka City of David to wa ni agbegbe Victoria Island ni ipinlẹ Eko, ti gbe oju opo ololufẹ kan kalẹ̀ si ori ayelujara.

Ninu akọle ti ile ijọsin naa fi si oju opo Facebook rẹ lo ti kede pe "ko si igbeyawo ni ọrun'' lẹyin ọjọ diẹ ti oju opo naa bọ si ori ayelujara.

Bakan naa ni wọn kọ si oju opo naa pe awọn woye pe awọn eniyan yoo pade egungun iha wọn ni oju opo naa.

Àwọn iròyin tì ẹ leè ní ìfẹ̀ síí:

Abẹwo si oju opo naa fihan pe o wa fun awọn ọdọlangba to n wa afẹsọna, ti wọn si n fi oju sọna fun igbeyawo.

Awọn ti o ba si fẹ darapọ mọ oju opo naa gbọdọ fi orukọ wọn silẹ, ti wọn yoo si ṣayẹwo wọn ki wọn to gba wọn wọle.

Amọ wọn fi ikilọ si oju opo naa pe ẹnikẹni ko ni san owo kankan lati darapọ mọ oju opo ọhun.

Ninu atẹjade to wa ni oju ọpọ naa ni wọn ti parọwa si awọn ti wọn fẹ darapọ mọ oju opo naa lati farabalẹ ṣe iwadii ẹnikẹni to ba kọ ẹnu ifẹ si wọn.

''Ijọ Christian Church of God (RCCG), the City of David ko fi ẹnikẹni ṣe oniduro ẹnikẹni to ba sọ ọrọ ifẹ si ọ, ti wọn ba si lu ọ ni jibiti ko si ọwọ ijọ naa nibẹ nitori o darapọ mọ oju opo naa.''

Bakan naa ninu fidio ti pasitọ ijọ naa, Idowu Iluyomade fi sita, ni o ti sọrọ nipa oju opo naa ati iru awọn eniyan to wa nibẹ.

''Oriṣirisi eniyan lo wa ni oju opo naa, lati ẹni ogun ọdun, de ọ̀dun marundinlọgbọn to fi de ẹni ọdun marundinlaadọrin.''

Bakan naa ni wọn fikun un pe oju opo naa ti n gbe igbesẹ lati bẹrẹ eto idanilẹkọ fun awọn to ba darapọ mọ oju opo naa, lọna ati kọ wọn nipa awọn ohun ti eniyan le ṣe lati ni igbeyawo to wuyi ni awujọ.