Ṣé lóòtọ́ ni pé ilé ẹjọ́ sọ pé kí Lizzy Anjorin san 9.5m fún ẹni tó pé lẹ́jọ́ nítorí ọ̀rọ̀ ọkọ rẹ̀?

Gbajugbaja agbohunsafẹfẹ lori ayelujara Facebook, Dorcas Adeyinka ti jawe olubori ninu ẹjọ kan ti gbajugbaja osẹrebinrin, Lizzy Anjorin pe e ni orilẹ-ede United Kingdom.

Oṣu kẹfa, ọdun 2021 ni Lizzy gbe Dorcas Adeyinka ati eeyan mẹta miran lọ si ile ẹjọ lorilẹ-ede UK, fun ẹsun ibanilorukọ jẹ.

Lizzy sọ pe wọn ba orukọ oun jẹ ni ọpọ igba lori ayelujara.

Ninu ikede to fi sita lori ayelujara Facebook rẹ, pẹlu abajade iwe ile ẹjọ, Adeyinka sọ pe Onidajọ Spearman QC paṣẹ pe ki Lizzy san ẹgbẹrun mẹtadinlogun Pọun fun Dorcas laarin ọjọ mẹrinla pere.

Bakan naa ni ile ẹjọ da ẹjọ naa nu, to si kọ lati paṣẹ fun Dorcas pe ko ma sọrọ nipa Lizzy Anjorin ati ọkọ rẹ, Ọgbẹni Lawal.

Kilo pilẹ ija laarin Lizzy Anjorin ati Dorcas Adeyinka?

Lati ọdun 2019 ti Lizzy Anjorin ti ṣe igbeyawo pẹlu ọkọ rẹ, Ọgbẹni Lawal, ni oriṣiriṣi awuyewuye ti n waye lori igbeyawo naa.

Ọpọ igba ni iroyin jade pe ọkọ ọlọkọ ni Lizzy gbà.

Ko si pẹ lẹyin igbeyawo naa ni obinrin kan, Fola Tinubu, jade si ori ayelujara pe oun ni obinrin ti Lizzy gba ọkọ rẹ.

O sọ ninu awọn fidio kan to fi si ori ayelujara pe ọmọ mẹrin ni Lawal fi silẹ fun oun nikan lati ma a tọju, to fi ko lọ si ile Lizzy, ti wọn si ṣe igbeyawo.

Botilẹ jẹ pe Lizzy sọrọ nigba naa pe o ti to ọdun mẹẹdogun ti oun ti mọ Lawal, o jẹ alaanu oun, ti oun ko si gba a lọwọ obinrin kankan.

Dorcas Adeyinka to ma n sọrọ nipa awọn nkan to n lọ laarin ilu, lori ayelujara Facebook, to si tun ma n pe ara rẹ ni ajafẹtọ ọmọniyan, da si ọrọ naa, to si ṣe ileri lati gbeja Fola.

Lati asiko naa si lo ti ma n gbe oriṣiriṣi iroyin ati 'asiri' nipa Lizzy ati Lawal jade.

Lẹyin asiko diẹ, Lizzy ko le gba awọn ọrọ naa mọra mọ, o si pe Dorcas ni ẹjọ si ile ẹjọ kan ni United Kingdom, nibi ti Dorcas n gbe.

Kini Lizzy sọ lori idajọ ile ẹjọ naa?

Lizzy Anjorin fi fidio kan sita lori ayelujara Instagram rẹ ni Ọjọru pe irọ ni jijawe olubori ti wọn sọ pe awọn jawe olubori. Botilẹ jẹ pe ko darukọ ẹni to n ba a wi

O ni nkan ti ile ẹjọ sọ ni pe ki oun pe wọn lẹjọ ni Naijiria, niwọn igba to jẹ pe Naijiria ni oun n gbe.

"Wọn win lori irọ... Wọn ni ki a pe wọn lẹjọ lati Naijiria, niwọn igba to jẹ pe Naijiria ni a n gbe. Oun gan-an lo pe wa ju."

Lizzy ṣalaye pe igbẹjọ gan-an ko ti i bẹrẹ lori ẹsun ti oun fi kan ẹni naa. O ni ile ẹjọ lati fi ofin de wọn lori ọrọ oun ni awọn ṣi lọ.

Bakan naa lo sọ pe oun yoo ṣi sọrọ lori idajọ ile ẹjọ naa.

Ninu ọrọ to pada sọ lori fidio to ṣe ni owurọ oni pe oun ko ni i sinmi ogun lori ọrọ naa. O ni idi ni pe awọn nkan to jẹ idunnu fun oun lo fẹ ẹ bajẹ.

O ni kii ṣe pe ile ẹjọ da ẹjọ nu. O ni ile ẹjọ sọ pe kii ṣe agbegbe oun ni ẹjọ naa ti waye.