Atiku Abubakar: Ẹ̀yin gómìnà, ẹ má dúró de ìjọba àpapọ́, kẹ tó wa ojútùú sáwọn ìṣòro Nàíjíríà
Oríṣun àwòrán, Atiku Abubakar Facebook
Igbakeji Aarẹ tẹlẹ ni Naijiria, Atiku Abubakar ti ke si awọn gomina lati ma duro de ijọba apapọ, ki wọn to wa ọna abayọ si oniruru iṣoro to n dojukọ Naijiria.
Bakan naa lo ni ki awọn gomina naa pe ipade apero lati jiroro lori awọn iṣoro Naijiria, ki wọn si wa ojutu si awọn iṣoro naa laarin ara wọn.
Atiku lo sọ ọrọ ọhun ninu atẹjade kan to fi lede loju opo ibadọrẹ Facebook rẹ.
Àwọn iròyin tì ẹ leè ní ìfẹ̀ síí:
- Àwọn gómìnà ẹgbẹ́ PDP wọ̀lú Ibadan fún ìpàdé
- Ẹ fi Baba Ijesha sílẹ̀ fún mi, màá ṣe onídùróó rẹ̀ - Yomi Fabiyi
- Àgbà ọ̀jẹ̀ akọrin Fuji, Amoo Igisekele, jáde láyé
- Òkùnkùn birimùbirimù ni Kaduna bi àwọn òṣisẹ ṣe gùn le ìyànṣẹ́lódì-wo bi yóò ṣe kan ìwọ naa
- Wo ìdí méje tí olólùfẹ́ rẹ fi le kọ ìbálòpọ̀ pẹ̀lú rẹ
- Digbí ni ojú irin Kaduna- Abuja wà - Ọlọ́pàá Kaduna
- Ojú mi rí màbo nígbà tí mo bímọ àkọ́bí, ẹ̀ṣẹ̀ ni ká bímọ láì rí owó tọ́jú rẹ̀ - Lizzy Anjorin
Igbakeji Aarẹ tẹlẹri naa ni, ṣe lo yẹ ki awọn ọmọ Naijiria rere wa ojutu si awọn idojukọ ti Naijiria n koju lai fi ti ẹsin tabi ẹya ṣe.
Oludije sipo Aarẹ labẹ asia ẹgbẹ PDP lọdun 2019 naa sọ siwaju si pe, igbagbọ oun ni pe Naijiria yoo bori gbogbo iṣoro to n dojukọ.
Oríṣun àwòrán, Atiku Abubakar Facebook
O ni "Iṣoro ti Naijiria n dojukọ ni pe a n pinya laarin ara wa, yatọ si pe a n pinya nipa ti ẹgbẹ oṣelu ati ẹsin."
"Mo ti maa n sọ lọpọ igba pe iyatọ to wa laarin wa kii ṣe ni ti Guusu tabi Ariwa, bi ko ṣe nipa awọn eeyan rere atawọn eeyan buburu.
Mo tun ti maa n sọ lọpọ igba pe ọmọ Naijiria pọmbele ni mi, o si yẹ ki a beere lọwọ ara wa, oun to n tumọ si lati jẹ ọmọ Naijiria."
Atiku sọ pe ojulowo ọmọ Naijiria ni ẹni to n bọwọ fun ẹtọ ẹlomiran labẹ ofin, ti ko si fi ti ẹsin tabi ẹya ṣe, to si n wa ilọsiwaju Naijiria pẹlu gbogbo ipa rẹ ni gbogbo igba.
O ni ọmọ "Naijiria rere kii da ilu laamu kii si ṣẹruba awọn alabagbe rẹ."
"Titi di nnkan bii ọdun mẹwa sẹyin, ko si ohun to n jẹ ajinigbe-powo nilẹ yii, o si jẹ ohun ti ko fẹ ẹ ṣẹlẹ ri ninu itan orilẹ-ede wa."
Agba oselu naa sọ pe, a ko le tan iṣoro wa to ba jẹ pe bi a ṣe n ronu lati atẹyinwa naa ni a si ṣe n ronu bayii gẹgẹ bii ọrọ ti onimọ ijinlẹ Albert Einstein sọ.
Atiku wa ke si awọn gomina ni Naijiria lati pe ipade apero laarin ara wọn lori ọna ati wa ojutu si ogunlọgọ iṣoro ti Naijiria n dojukọ nitori awọn iṣoro naa yoo pẹ titi ti wọn ba n duro de ijọba apapọ.
Lẹyin naa lo ke si gbogbo ọmọ Naijiri lati wa ni iṣọkan ki alaafia le jọba dipo iyapa ti awọn ẹgbẹ kan n pe fun.
