Akinyele killings: Ọwọ́ ọlọ́pàá ti tẹ Toheed Ganiyu tí wọ́n ló pa Mary Daramola ẹni ọdún 18 l'Akinyele ní ìlú Ibadan

Arabinrin miran ti wọn pe orukọ rẹ ni Mary Daramọla ni awọn oniṣẹ ibi kan tun ti pa lagbegbe Akinyẹle nilu Ibadan, lẹyin ti wọn fi ipa ba a lopọ tan.

Gẹgẹ bi iroyin ṣe sọ, ileto Alabata nitosi Mọniya ni iṣẹlẹ naa ti ṣẹlẹ.

Ọrọ igbenipa lẹyin ifipabanilopọ ti di tọrọfọnkale lagbegbe Akinyẹle ni ilu Ibadan lati osu diẹ sẹyin.

Ọpọ lo si ti woye pe asiko ati fẹdọ lori oronro ti de lẹyin ti ọwọ tẹ Sunday Shodipẹ gẹgẹ bii afurasi ọdaran to wa nidi iṣẹlẹ naa.

Ọmọ ọdun mejidinlogun ni Mary Daramọla ti wọn ṣẹṣẹ tun ṣe lọṣẹ yii.

Awọn eeyan kan n sọ pe arakunrin kan ti orukọ rẹ n jẹToheed Ganiyu lo wa nidi iṣẹlẹ naa, wọn ni ọwọ ba a nigba to n gbiyanju ati ju oku omidan naa danu sinu igbo kan ni ileto ọhun.

Ninu atẹjade to fi ṣọwọ si ileeṣẹ BBC News Yoruba, alukoro fun ileeṣẹ ọlọpaa ni ipinlẹ Ọyọ, SP Gbenga Fadeyi ṣalaye pe ni agogo mẹjọ aṣalẹ ọjọ ti iṣẹlẹ naa ṣẹlẹ, Toheeb Ganiyu tan Mary Daramọla wọ iyara rẹ nibi ti o ti rọ ọ ni ọti yo ki o to fi tipa ba a lopọ.

Oku Mary ni awọn eeyan ri lẹyin eyi pẹlu atọ ọmọ ọkunrin ni oju ara ati ẹnu rẹ.

Fadeyi fi kun un pe ọwọ ọlọpaa ti tẹ afurasi naa, iwadii si ti n lọ lọwọ lẹka iwadii ọtẹlẹmuyẹ ileeṣẹ ọlọpaa to wa ni Iyaganku nilu Ibadan.

Ninu ọrọ tirẹ, Baalẹ Alabata, Oloye Ọlakanmi Ọlaniyan ti rọ awọn ọdọ lagbegbe naa lati bu omi suuru mu ki wọn si ni igbagbọ ninu ọlọpaa ati iwadii wọn.

Oloye Ọlaniyan kọminu lori gbọnmọgbọnmọ iwa ipaniyan ati ifipabanilopọ lagbegbe naa eleyi to fi rọ ijọba atawọn agbofinro lati tete wa ojutu sii.