Путин Украинага қўшин киритишдан воз кечди

Президент Путин Россия парламентининг юқори палатаси-Федерация Кенгашидан Украина ҳудудида ҳарбий куч ишлатиш юзасидан шу йилнинг 1 март куни ўзига берилган ваколатни қайтариб олишни сўраган.

Жаноб Путин қўшин киритишдан воз кечиш қарорини Украина жануби-шарқидаги инқирозга барҳам бериш бўйича уч томонлама музокараларнинг бошлангани билан изоҳлаган.

Путиннинг воизига кўра, у сешанба куни Венага учиб кетиши олдидан бу ҳақда Федерация Кенгаши раиси Валентина Матвиенкога кўрсатма берган.

Украина Президенти Петр Порошенко Путиннинг Федерация Кенгашига мурожаатини "Украина шарқидаги инқирозни ечишга қаратилган режани қўллаб-қувватлаш йўлида қўйилган илк амалий қадам" дея олқишлаган.

Путин Украинага қўшин киритиш эҳтимолини у ердаги Россия фуқароларини ҳимоя қилиш мақсади билан тушунтирган эди.

Ғарб буни тажовуз деб атаб, Россия ҳукуматининг қарорини қоралаган.

Айни пайтда Украинадан келаётган сўнгги хабарларга кўра, Славянск шаҳрида украин ҳарбийларига тегишли вертолёт уриб туширилган.

Ҳодисада 9 нафар украин аскарлари ҳалок бўлган.

Бўлгинчилар вертолёт ҳалокати юзасидан шарҳ бермаганлар, аммо олдинроқ Президент Порошенко эълон қилган оташкесимни қўллаб-қувватлашган.

Жазо чоралари

АҚШ Президенти Барак Обама Президент Путинни Украинага қурол-яроғ оқимини тўхтатиш ва бўлгинчиларни дастаклашга чек қўйишга чақирган.

Оқ Уйнинг маълум қилишича, телефон мулоқоти чоғида жаноб Обама Москвани қўшимча жазо чораларидан огоҳлантирган.

Кремлнинг айтишича, жаноб Путин расмий Киев ҳамда бўлгинчилар орасида тўғридан-тўғри музокаралар ўтказилиши кераклигини айтган.

Россия бўлгинчиларни қуроллантираётганини рад этиб келади.

Ўтган ҳафта Вашингтон Россиянинг бир неча танк ва зирҳли машиналари Украинанинг шарқий чегарасини кесиб ўтганини айтган эди.

Россия эса биронта ҳам танки чегарадан ўтмаганини айтмоқда.

Душанба куни шунингдек, АҚШ Давлат Департаменти Россиянинг жануби-ғарбида танклар Украинага юриш учун шай тургани ҳақида маълумот олганини билдирган.

Украинадаги инқирозни юмшатишга қаратилган дипломатик саъй-ҳаракатлар давом этаркан, АҚШ вице-президенти Жо Байден душанба куни Украина Президенти Петр Порошенко билан телефонда сўзлашган.

Оқ Уйнинг айтишича, жаноб Байден Порошенкога унинг тинчлик режасини қатъиян қўллаб-қувватлашларини айтган.

Тинчлик музокаралари

Айни пайтда Украина шарқидаги бўлгинчилар Президент Порошенко эълон қилган оташкесимга риоя этишларини айтишган.

Украина Президенти илгари сурган 15 банддан иборат тинчлик режасининг бир қисми бўлган оташкесимнинг муҳлати жума куни тугайди.

Исёнчиларнинг жума кунига қадар ўт очишни тўхтатишлари ҳақида ўзини "Донецк Халқ Республикаси"нинг раҳбари деб эълон қилган Александр Бородай билдирган.

Бўлгинчилар раҳбари душанба куни Донецкдаги тинчлик музокараларида ҳам қатнашган.

Музокараларда яна бир бўлгинчи минтақа- Луганск вакиллари ҳам иштирок этган.

Шунингдек, Россиянинг Украинадаги элчиси Михаил Зурабов, Украинанинг собиқ Президенти Леонид Кучма ҳамда Оврўпода Хавфсизлик ва Ҳамкорлик ташкилотидан воситачилар ҳам музокараларга қатнашганлар.

Ўтган ҳафта Президент Путин тинчлик режасини эҳтиёткорлик билан олқишлаган эди.

Режа шарқий минтақаларга кўпроқ ваколатлар бериш, муддатидан аввал сайловлар ўтказиш ва Россия билан чегарада 10 чақиримлик буфер ҳудуди барпо этиш сингари таклифларни ўз ичига олади.

Исёнчилар украин армияси ҳудудни тарк этмагунича қуролларини ташламасликларини айтишмоқда.

Улар ҳануз Донецк ва Луганксдаги ҳукумати биноларини назорат қилишмоқда.

Украина масаласи жума куни Брюсселда ўтадиган Оврўпо Иттифоқи саммитининг ҳам марказида бўлиши кутилади.

Саммит чоғида Оврўпо раҳбарлари Россияга қарши қўшимча жазо чораларини эълон қилишлари мумкин.

Жума куни шунингдек, Украина ва ОИ ўртасидаги ҳамкорлик битими имзоланади.

Собиқ президент Виктор Януковичнинг ўтган йил ноябрида битимни имзолашдан бош тортиши унинг ҳокимиятдан ағдарилишига олиб келган сиёсий норозиликларнинг бошланишига сабаб бўлган эди.

Матнда имло хатоси бўлса, бизга билдиринг.

Би-би-си Ўзбек хизмати билан Whatsapp орқали боғланишни истасангиз, телефонимиз: +44 78-58-86-00-02