Украина газ нархи бўйича Россия таклифига кўнмоқчи эмас

"Газпром" ва "Нафтогаз" ўртасидаги музокаралар натижасида Россия Украинага газ нархини аввал таклиф қилинганидан 100 долларга арзонлаштиришни айтган.

Бироқ Украина учун бу таклиф маъқул кўрилмаяпти.

Украина Бош вазири Арсений Аценюкка кўра, газ нархини туширилганини эмас, балки икки томонлама шартномани қайта кўриб чиқиш лозим.

"Биз аввалги фикримизда қоламиз, газга бозор нархини белгилаб олиб, сўнгра шартномани имзолаймиз. Дарёни икки марта кечиб ўтмайдилар", деб айтган жаноб Яценюк ҳукумат йиғилишида.

"Мен расман маълум қилмоқчиман, биз Россиянинг қопқонини яхши биламиз: нарх Россия ҳукумати томонидан белгиланади ва керак бўлганда олиб ташланади", деб айтган шунингдек Яценюк. Унинг сўзларига кўра, ҳозирги шароитда Киевда Россия ҳукуматига ишонишга ҳеч бир асос йўқ. Шунинг учун Украина томони шартномани кўриб чиқишни талаб қилмоқда.

Украина талаб қилаётган бозор нархи минг кубометр газга 268,5 доллар бўлиб, ағдарилган президент Янукович ва Россия президенти Путин ўртасидаги музокараларда келишилган эди.

Айни пайтда "Газпром" Украина 10 июнгача 2013 йилнинг ноябр-декабр ойидаги ишлатилган газ учун 1,454 миллиард доллар тўлаши кераклигини эслатмоқда. Бундан ташқари шу йилнинг апрел-май ойларидаги ёқилғи учун 500 миллион доллар қарзи борлигини айтмоқда.

Россия ва Украина Оврўпо Иттифоқи воситачилигида бугун, 11 июнда музокараларни давом эттириши кутилади. Россия Украинанинг газ қарзларини тўлаш муддатини 16 июнгача кечиктирган.

Россия апрел ойида Украина учун газ нархини 268 доллардан Оврўпода энг юқори 485 долларга кўтарган. Буни Украина тўлов шартларини бажармагани ва қарзларни узмагани билан изоҳлаган.

Бунга жавобан Киев Москвани иқтисодий тажовуз ва сиёсий босим ўтказаётганликда айблаган.

BBCUzbek.com нинг ижтимоий медиадаги янги лойиҳасига марҳамат!.

Би-би-си Ўзбек хизмати билан Whatsapp орқали боғланишни истасангиз, телефонимиз: +44 7858 860002