Намойишчилар Россия билан ҳеч қандай ҳужжат имзоламасликка чақирганлар
15 декабр якшанба куни пойтахт Киевдаги аксилҳукумат намойишида 200 мингча киши иштирок этгани хабар қилинмоқда.
Намойишчилар Президент Виктор Янукович истеъфосини талаб қилганлар.
Киевдаги Мустақиллик хиёбонида икки АҚШ сенатори - Крис Мёрфи ва Жон Маккейн намойишчилар олдида чиқиш қилганлар.
"Эркин дунё сиз билан, Америка сиз билан ва мен сиз билан биргаман", деб айтган сенатор Маккейн.
Шу куни Оврўпо Иттифоқининг кенгайиш масалалари бўйича комиссари Штефан Фюле ўзининг Твиттердаги саҳифасида Оврўпо Иттифоқи Украина ҳукумати билан музокараларини тўхтатиши ҳақида эълон қилган.
"Украина: Президент ва ҳукуматнинг бирлашиш келишувига доир сўзлари билан ишлари борган сари бир-биридан узоқлашиб бораяпти", деб ёзган жаноб Фюле.
Бунга жавобан Украина Бош вазири матбуот хизмати баёнот эълон қилган, бу баёнотда Украина ҳукуматининг Оврўпо Иттифоқи билан музокараларни давом эттириш истаги борлиги айтилган.
17 декбар куни Украина Президенти Виктор Януковичнинг Москвада Россия Президенти Владимир Путин билан музокаралари мўлжаллангани хабар қилинган.
Киевдаги Мустақиллик майдонида йиғилган намойишчилар Президент Януковичнинг Россия билан бирор бир келишувни имзоламаслиги талаб қилинган резолюция қабул қилганлар.
Бу резолюцияда Украинанинг Божхона Иттифоқига кириши мумкин эмаслиги айтилган, сиёсий тутқунлар, хусусан собиқ бош вазир Юлия Тимошенкони озод қилиш талаби илгари сурилган.
Шу куни Киевда Президент Янукович тарафдорлари ҳам бир неча минг кишилик намойиш ташкил этганлар.
Бу намойишчилар орасида Қримдан борганлар ҳам бор.
