Украина: "Миллионлар юриши"да президент Янукович истеъфоси талаб қилинмоқда
Мухолифатнинг Киев марказида ўтаётган "Миллионлар юриши"да 100 мингдан дан ортиқ киши иштирок этаётгани хабар қилинади.
Мустақиллик Майдонида мухолифат раҳбарлари ва фаоллар Президент Виктор Януковичдан истеъфо беришни талаб қилишган.
Кўча юришлари тинч ўтаётгани, милиция аралашмаётгани айтилсада, кўчаларга хавфсизлик кучлари жойлаштирилган. Ҳукумат биносига борадиган йўллар автобуслар билан тўсиб олинган.
Юлия Тимошенконинг қизи Евгения Тимошенко онасининг мурожаат мактубини ўқиб эшиттирган. Қамоқдаги собиқ бош вазир Тимошенко хоним Януковични "тинч ва қонуний" истеъфога чиқариш кераклигини ёзган.
Мухофатдаги "УДАР" партияси етакчиси Виталий Кличко намойишларнинг асосий мақсади муддатдан олдин сайловлар ўтказилишига эришишдир, деган Би-би-сига.
"Баткившина" раҳбари Яценюк ҳам намойишлар кўлами кенгайиб боришини маълум қилди.
Айни пайтда намойишчилар президент маъмурияти томон юра бошлаганлар.
Украина мухолифати Януковичдан Азаров ҳукуматини тарқатиш учун 48 соат вақт берган. Шунингдек сиёсий маҳкумларни озод қилиш ва Ички Ишлар вазири Виталий Захарченкони ҳибсга олиш талаби илгари сурилган. Акс ҳолда Межигоредаги президент қароргоҳи тўсиб қўйилишини билдирганлар.
Намойишчилар Бессарабской майдонидаги 1946 йил ўрнатилган Лекин ҳайкалини ағдариб ташлашган. Милиция мазкур иш ҳаракат бўйича ҳозирча ҳеч кимни ҳибсга олмаган.
Путин ва Янукович учрашуви вазиятни ўзгартирмади
Жума куни Украина ва Россия Президентлари учрашуви бўлиб ўтган, унда Оврўпо Иттифоқи билан келишув ва Божхона Иттифоқига кириш муҳокама қилингани айтилганди.
Бироқ кейинроқ, Россия ва Украина Президентлари Сочида Киевнинг Божхона Иттифоқига қўшилишини муҳокама этмадилар, деб айтган Владимир Путиннинг матбуот сўзчиси Дмитрий Песков.
"Учрашувда Россия-Украина давлатлараро комиссиясининг Москвада ўтадиган йиғилишига тайёргарлик ва икки томонлама ҳамкорлик истиқболлари, молия-кредит масалалари муҳокама қилинди. Асосий эътибор энергетика соҳасидаги ҳамкорликка қаратилди. Бироқ бу борада якуний қарорга келингани йўқ", деб маълум қилади Песков.
Олдинроқ Британиянинг Economist журнали редактори Эдвард Лукас Твиттерда ўз манбаларига таяниб Владимир Путин ва Виктор Янукович Украинанинг Божхона Иттифоқига қўшилиши тўғрисида келишувга келганини хабар қилган эди.
"Эшитишимча, Янукович Сочида Россия билан стратегик келишувни, газ нархини 200 доллардан сотиб олишни ва Божхона иттифоқига қўшилишни имзолаган", - деб ёзади жаноб Лукас Твиттерда.
Яна унинг айтишича, Янукович Путиндан Украина учун 15 миллиард доллар ёрдам олиши ваъда қилинган. Янукович Путинга 2015 йилгача Божхона иттифоқига қўшилишга ваъда берган.
Москва Украинани Россия, Белоруссия ва Қозоғистон ўртасидаги Божхона иттифоқига қўшилишни таклиф қилиб келади.
Жаноб Янукович Оврўпо Иттифоқи билан яхши алоқалар ўрнатиш истагида эканини айтсада, унинг сиёсати Москва билан янада кўпроқ яқинлашиш экани аён бўлаётгани айтилади.
Россия ва Украина ўртасида пайдо бўлган газ тортишуви натижасида Украинадан ўтган газ қувурлари боис Оврўпо давлатлари ҳам газ тақчиллиги билан рўбарў келиши хавфи пайдо бўлганди.
Газ таъминоти масаласи икки мамлакат ўртасидаги музокараларда асосий мавзу ҳисобланган.
Лукаснинг сўзларига кўра, Сочидаги келишув тартиблари Москванинг хоҳишлари асосида тузилган, "Ғарб давлатлари эса бундан шокдалар".
Бундан олдин "Баткившина" депутати Николай Томенко Януковичдан Россия билан "стратегик келишув" тафсилотларини ошкор қилишни сўраган эди.
Айни пайтда Украинанинг Киев ва бошқа шаҳарларида ҳукуматнинг Оврўпо Иттифоқи билан келишувни имзоламаганига қарши 21 ноябрда бошланган норозилик ҳаракатлари давом этмоқда.
Мухолифат муддатидан олдин парламент ва президентлик сайловларини ўтказиш, жорий парламентни тарқатиш ва президент истеъфосини талаб қилиб чиқди.
Бош вазир Николай Азаров эса хориж журналистларига берган интервьюсида намойишчилар талаби конституцияга зид эканини билдирган.
Ўтган шанба Киев марказидаги кўп минг кишилик норозилик намойишлари куч билан тарқатилди. Ўнлаб кишилар жароҳатлангани ва ҳибсга олингани хабар қилинди.
Мухолиф партиялар тинч намойишчиларга қарши куч қўллаганликни текшириб, айбдорлар жазоланишини талаб қилган.
Якшанба куни Киевда ҳукуматнинг Оврўпо Иттифоқи билан келишувни тўхтатганига қарши "Миллионлар юриши" ўтказилмоқда.
