Байден Исломий Давлат раҳбари Қурайший ўлдирилганини эълон қилди Suriya IShID
Сурат манбаси, EPA
АҚШ Президенти Жо Байден айтишича, Сурия шимоли-ғарбида Америка махсус кучлари ўтказган рейдда ўзини "Исломий Давлат" деб атайдиган жиходчи гуруҳ раҳбари Абу Иброҳим ал-Ҳошимий ал-Қурайший ўлдирилган.
"Бизнинг қуролли кучларимизнинг малакаси ва жасурлиги билан биз жанг майдонидан Абу Иброҳим ал-Ҳошимий ал-Қурайший чиқардик", дейилади тарқатилган баёнотда.
Президент Байден айтишича, махсус амалиётда иштирок этган махсус кучлар ҳарбийларининг ҳаммаси бешикаст ортга қайтган.
Бундан олдин Сурия Сурия шимоли-ғарбидаги Атме шаҳрида махсус амалиёт ўтказилгани, оқибатда 13 инсон ҳалок бўлгани ҳақидаги хабарлар тарқалди.
Ўлдирилганлар орасида тўрт бола, уч аёл борлиги хабар қилинган.
2 февралдан 3 февралга ўтар кечаси бир неча вертолёт қўнган, Араб тилида аёллар ва болаларнинг бинодан чиқиб кетишлари талаб қилинган.
Сўнг ўртада қақшатқич жанг бошланган, у икки соатча давом этган.
Америкаликларга қарши гранотомёт ва йирик калибрли пулемётлардан ўт очилган.
Отишма овозлари тўхтаганидан кейин АҚШ ҳарбий вертолётлари учиб кетган.
Эрталаб отишма рўй берган бинога одамлар киришган.
Бино томининг бир қисми қулаб тушган, гувоҳлар кўп инсон жасадлари ва қон кўрганларини айтганлар.
Бу - АҚШ ҳарбийларининг 2019 йилдан буён Сурия ҳудудида ўтказган энг жиддий ҳарбий операцияси бўлган.
Сурат манбаси, EPA
ИШИД раҳбари Ал-Қурайший ўлдирилгани айтилаётган Атме шаҳридан 16 километр узоқликда 2019 йил октябрида Қурайшийдан олдинги гуруҳ раҳбари Абу Бакр ал-Бағдодий ўлдирилган эди.
Ўзини "Исломий Давлат" ёки ИШИД деб эълон қилган гуруҳ 2014 йили Сурия ва Ироқда ўзининг давлатини эълон қилди, у дунёдаги "энг қудратли" жангари гуруҳ сифатида эътироф этилган.
2017-2018 йилларда гуруҳ мавҳ этилди, исломий халифати ҳам тугатилди.
Аммо Ироқ ва Сурияда ҳали-ҳануз минглаб жангариси қочиб юргани, очиқда экани ишонилади.
Уларнинг онда-сонда ҳужум уюштириб туришга қодир эканликлари ҳам кузатилади.
Охирги вақтда ИШИД Афғонистон ва Мозамбикда фаоллашиб бораётгани кузатилади.
ИШИДнинг Хуросон қаноти Толибон назоратидаги Афғонистонда уюштирилган қатор қонли ҳужумларга масъулиятни ўз зиммасига олиб чиқди.
ИШИД сафларида ўз вақтида юзлаб ўзбекистонлик жангарилар ҳам жанг қилганлар.
Расмий Тошкент сўнгги йилларда уларнинг қочқинлар жамлоқларида қолаётган оила аъзоларини ортга ва нормал ҳаётга қайтариш саъй-ҳаракатида экани кўрилади.
ИШИД Афғонистон ва Покистонда бошпана топган "Ўзбекистон Исломий ҳаракати" тўлиғича байъат келтирганини эълон қилган жангари гуруҳ бўлади.
BBCUZBEK.COM билан Telegram орқали +44 7858860002 номери билан боғланинг.
Telegram каналимиз: https://t.me/bbcuzbek
