Дайжест. Россия, мигрантлар: Муҳожирлар жанжали Кремлгача етиб борди. Путин нима деди? Мигрантлар меҳмондами? Самолёт қиммат, мигрантларни поездда келтирайлик! Rossiya yangiliklar
Сурат манбаси, АВТМ
- Оммавий муштлашув Путиннинг эътиборини тортдими?
- Дума спикерига кўра, мигрантлар Россияда меҳмондами?
- Қурилиш учун поезларнинг чартер рейси таклифи
Россияда миллатлараро низолар йўқ
Кремль мигрантларнинг оммавий тўқнашуви билан боғлиқ вазиятга эътибор қаратди.
Россия Президентининг матбуот котиби Дмитрий Песковнинг таъкидлашича, Россияда миллатлараро низолар йўқ.
Бу изоҳ 12 июль куни кечқурун Кузминки ҳудудида бўлиб ўтган Марказий осиёлик мигрантлар ўртасидаги оммавий муштлашувдан сўнг билдирилди.
- Кремль Россияда айнан миллатлараро муаммолар бор, деб ҳисобламайди. Ҳозирча мамлакатда фақат маиший можаролар намоён бўлмоқда, - дейди Россия президенти матбуот котиби Дмитрий Песков.
Москвадаги оммавий муштлашув Россия президентининг эътиборини тортганми ёки йўқми, деган саволга эса "Ернинг исталган нуқтасида мавжуд бўлган оддий, кундалик муаммолардан ташқари, бу соҳада муаммоларга диққат чекмаймиз", деб жавоб берди.
Песковнинг таъкидлашича, Москванинг Кузминки ҳудудида содир бўлган воқеага "ҳуқуқни муҳофаза қилиш идораларига муносабат билдириши ва жавоб бериши керак, улар ўз ишларини қиляпти".
"Меҳмондалигингизни унутманг!"
Сурат манбаси, .
13 июль кунги Кузминки ҳудудидаги мигрантлар тўқнашуви ортидан юзлаб Марказий осиёлик мигрантлар полиция маҳкамаларига элтилган.
Айни пайтда 13 июль кунги оммавий жанжалда қўлга олинганлар иши судда кўрилмоқда. ИИВ қўлга олинганларга жарима ва Россиядан депортация қилиниши қўлланилишини маълум қилган.
Ҳуқуқ ҳимоячилари муҳожирларнинг ҳақ-ҳуқуқлари бузилаётгани тўғрисида кунига юзлаб шикоятлар тушаётганини таъкидлашмоқда.
Россия расмийлари эса бу низога кескин муносабат билдирди. Жумладан, Давлат Думаси вице-спикери Петр Толстой юқоридаги вазиятга изоҳ билдираркан, Россияга келган ишчи мигрантлар мамлакат қонунларини ёдда тутишлари ва унга амал қилишлари, улар "меҳмонда" эканликларини унутмасликларини эслатди.
Чартер поезд самолётдан арзонроқ
Сурат манбаси, BBCUZBEK.COM
Россиянинг қурилиш майдонларида муҳожирлар етишмаслиги муаммосига ҳар хил томондан ёндашиб кўрилди: маҳбусларни ва ҳатто нафақахўрларни жалб қилиш таклиф қилинди. Ҳозирча бу таклифлар мигрантлар ўрнини босадиган даражада тўла ижобий натижа берганича йўқ.
Ишчиларга энг кўп эҳтиёж сезаётган тармоқ Қурилиш вазирлиги мигрантларни Россияга чартер поездларида олиб келишни таклиф қилди.
Қурилиш ва уй-жой коммунал хўжалиги вазирининг ўринбосари Никита Стасишиннинг сўзларига кўра, ушбу усул самолётга қараганда арзонроқ бўлади ва битта рейсда 1000 муҳожирни етказиб беришни таъминлайди.
"Бугунги кунда Россия темир йўлларининг низомлари шаклланмоқда. Меҳнат муҳожирларининг бутун таркиби бирданига келтирилиши мумкин, аммо бу бирлаштирилган дастур бўлиши керак. Биз "Россия темир йўллари" га ўз ваколат даражамиздан мурожаат қилишимиз мумкин. Бу рейслар, албатта, самолёт чартерларига буюртма беришдан кўра арзонроқ бўлади ва бир вақтнинг ўзида тахминан 1000 кишини олиб келишимиз мумкин", - деди Стасишин.
BBCUZBEK.COM билан Telegram орқали +44 7858860002 номери билан боғланинг.
Telegram каналимиз: https://t.me/bbcuzbek
