Дунё, янгиликлар: Путин Россияси тақдири нима бўлади?

Россияни катта саккизликка қайтариш масаласи кўрилмоқда

Францияда учрашган G7 (катта еттилик) давлатлари раҳбарлари Россияни қудратли мамлакатлар гуруҳига қайтариш масаласини муҳокама қилмоқда.

АҚШ президенти Доналд Трамп Россияни ортга қайтариб, катта саккизлик гуруҳини қайта тиклаш ғоясига қарши эмаслигини билдирган.

Бироқ бошқа G7 гуруҳи аъзолари ҳозирча бунга тайёр эмасликларини таъкидламоқдалар.

Дунё, янгиликлар: Google Қозоғистон ҳукуматини нимада айбламоқда?

Дунё, янгиликлар: Ливандаги шаҳарчадан нега мусулмонлар ҳайдаб чиқарилмоқда?

Дунё, янгиликлар: Суриядаги уруш ниҳоясига етдими? Покистон Кашмирни халқаро судга олиб чиқмоқчи

Дунё, янгиликлар: Исроил нега АҚШ муслима конгрессвуменларини ўз ҳудудига киритмади?

Россия Қримни аннекция қилганидан сўнг уни қудратли давлатлар учрашувларига таклиф қилмай қўйган эдилар.

Франс-пресс агентлигининг хабар беришича, саммит давомида G7 гуруҳининг АҚШдан бошқа аъзолари Россияни қайтаришга ҳали эрта эканини маълум қилганлар.

Ўз навбатида жаноб Трамп Россия президенти Владимир Путинни 2020 йилда АҚШда ўтажак катта еттилик саммитига меҳмон сифатида таклиф қилишини айтган.

У Россиянинг гуруҳга қайтарилишини мақсадга мувофиқ қарор ўлароқ баҳолаган.

Инсоният фазода илк жиноятга қўл урган бўлиши мумкин

АҚШ Миллий фазо агентлиги (NASA) инсоният тарихида коинотдан туриб қўл урилган илк жиноят эҳтимолини ўрганмоқда.

Америкалик астронавт Энн Макклейн Халқаро Фазо Станциясидан туриб, ажрим учун ариза берган ўзининг бир жинсли турмуш ўртоғининг банк ҳисоб рақамига бузиб кирганини тан олган.

Бироқ у қилган ишини ҳуқуқбузарлик сифатида тан олмаслигини ҳам билдирган.

Шу йилнинг июнь ойида Ерга қайтган Макклейн хоним шунчаки оилавий бюджетнинг жойида экани ва ўғлининг таълими учун пул етарлилигига ишонч ҳосил қилиш учун турмуш ўртоғининг банк ҳисобини текшириб кўрганини таъкидлаган.

Халқаро Фазо Станцияни биргаликда бошқарувчи давлатлар - АҚШ, Россия, Япония, Канада ва Европа фазо станцияси - келишувига кўра, коинотда жиноятга қўл урган фазогирлар ўз давлатининг қонунлари бўйича жазога тортилади.

NASA шу вақтга қадар коинотда содир этилган жиноят ҳолатлари қайд этилмаганини маълум қилган.

АҚШ-Хитой савдо уруши Осиёни қийин аҳволга солмоқда

АҚШ ва Хитой ўртасида давом этаётган савдо урушининг кучайиши оқибатида Осиё биржа бозорлари душанба куни сезиларли пастга қулаган.

Гонгконгнинг Hang Seng индекси 3.2 фоизга пастга тушиб кетган бўлса, Shanghai Composite индексида қулаш 1.3 фоизни ташкил қилган.

Япониянинг Nikkei 225 индексида ҳам қулаш кузатилиб, бу рақам 2.3 фоизга етган.

Хитой пул бирлиги юаннинг АҚШ долларига нисбатан қадри эса охирги 11 йил ичида энг қуйи даражага етган.

Дунёнинг икки йирик иқтисодиёти ўтган бир йил давомида бир-бири билан мислсиз савдо уруши олиб бормоқда. АҚШ ва Хитой бир-бирининг товарларига нисбатан миллиардлаб долларга тенг тариф божлари жорий этган.

Президент Доналд Трамп Хитойни ғирром савдо олиб боришда айблайди. Хитой эса АҚШ ўзининг иқтисодий ўсишини кўра олмаётганини айтади.

Роҳинга инқирозига икки йил тўлди

2017 йилнинг августида Мянманинг Рахине штатида бошланган зўравонлик оқибатида 750 мингга яқин Роҳингя элатига мансуб одамлар мамлакатдан қочиб, асосан, қўшни Бангладешга чиқиб кетган эдилар.

2017 йилнинг 25 август куни Роҳинга жангарилари ўнлаб полиция маҳкамаларига ҳужум қилиб, бир қанча зобитни ўлдирган, бунга жавобан Мянма ҳукумати Роҳинга одамларига тегишли қишлоқларга ўт қўйган, тинч фуқароларни нишонга олган ва кўплаб аёлларни зўрлаган эди.

Мазкур хунрезликларда маҳаллий буддийлар ҳам иштирок этгани қайд этилган.

Якшанба куни Бангладешнинг қочқинлар жамлоқларида ўн минглаб Роҳинга одамлар қочқинликнинг икки йиллигини оммавий намойишлар билан хотирладилар.

Мусулмон озчилик бўлган Роҳинга элати вакиллари асрлар давомида ҳудудда яшаб келсада, Мянма ҳукумати уларни ўз фуқаролари ўлароқ тан олмайди.

Бунинг ўрнига Мянма уларни Бангладешдан келган ноқонуний муҳожирлар, дея ҳисоблайди.

Исроил Сурияда Эрон дронларини йўқ қилди

Сурияда ўтказган ҳарбий амалиётларини камдан-кам тан олувчи Исроил 24 август куни Сурия ҳудудида Исроилга ҳужум уюштиришга тайёрланаётган Эрон дронларини йўқ қилганини маълум қилмоқда.

Мамлакат Бош вазири Бенямин Нетаняҳу ушбу амалиёт учун ҳарбийларни олқишлаб чиққан.

Исроил 2011 йилдан бери фуқаролар уруши давом этаётган Сурияда юзлаб ҳужумларни амалга оширганига ишонилади.

Исроилнинг асосий мақсади Эроннинг Сурияга нисбатан таъсири кенгайиб кетишининг олдини олишдир.

BBCUZBEK.COM билан Telegram орқали +44 7858860002 номери билан боғланинг.

Telegram каналимиз: @bbcuzbek