Дунё, янгиликлар - Президентлар машмашаси: Либерализм эскирдими ва қайси президент самолётида наркотик ташилган?
Сурат манбаси, AFP
Financial Times нашри билан суҳбатлашган Россия президенти Владимир Путиннинг фикрига кўра, ўн йиллар давомида Ғарб демократияси асоси бўлиб келган либерализм ғояси «ўз умрини яшаб бўлди.»
«[Либераллар] ҳеч кимга ҳеч нарсани уқтира олмайди. Либерализмнинг ўзи эса аҳолининг катта қисми манфаатлари билан тўқнашади,» таъкидлаган жаноб Путин ва бу сўзлари билан кўп сонли қочқинларнинг Германияда ўрнашишига йўл очиб берган канцлер Ангела Меркелни назарда тутган.
"Либерализм ғояси инсонга қарши бирор чора кўриб бўлмасликни назарда тутади. Яъни муҳожир сифатида ҳуқуқлари ҳимоя қилинганидан бу қочқинлар ўлдириши, талон-тарож қилиши ва зўрлаши мумкин."
Алоқадор мавзулар:
Президент Путин ҳар ким эркин бўлишга ҳақли экани, аммо бу эркинлик аҳолининг асосий қисмини ташкил этувчи миллионлаб одамларнинг маданияти, анъаналари ва оилавий қадриятларидан устун бўлмаслиги шартлигини таъкидлаган.
Европа Иттифоқи президенти Дональд Туск жаноб Путиннинг ушбу сўзларини кескин қоралаб чиққан.
«Ким либерал демократия эскириб кетди, дея иддао қилса, эркинликлар, қонун устуворлиги ва инсон ҳуқуқлари ҳам эскириб бўлди, деган бўлади,» таъкидлаган жаноб Туск.
«Менинг назаримда, эскирган нарсалар - бу авторитарлик, шахсга сиғиниш ва олигархлар бошқарувидир,» қўшимча қилган Евроиттифоқ президенти.
Алмазбек Атамбоев бир умрга қамалиши мумкин
Қирғизистон Парламенти мамлакат собиқ президенти Алмазбек Атамбоевни дахлсизлик ҳуқуқидан маҳрум этди. Эндиликда, унга қарши коррупция айбловлари бўйича жиноий иш очилиши кутилмоқда.
Бир ҳафта аввал Парламент депутатлари Қирғизистон Бош прокуратурасига жаноб Атамбоевга нисбатан илгари сурилган қатор айбловлар рўйхатини юборган эди. Агар тергов депутатлар тилга олган айбловларга собиқ президентнинг алоқадорлигини исботласа ва суд уни айбдор, дея топса, у ҳолда, жаноб Атамбоев бир умрга озодликдан маҳрум этилиши мумкин.
2011-2017 йиллар давомида Қирғизистонни бошқарган Алмазбек Атамбоев 2017 йилдаги президентлик сайловида мамлакатнинг ҳозирги раҳбари Сооронбай Жээнбеков номзодини қўллаб-қувватлаган эди. Бироқ 2018 йил баҳорига келиб, уларнинг ўртасида жиддий ихтилоф юзага келгани маълум бўлган.
Президент Жээнбеков май ойида собиқ давлат раҳбарларини маълум ҳолларда дахлсизлик ҳуқуқидан маҳрум этишни кўзда тутувчи қонунни имзолаган.
Таҳлилчилар жаноб Атамбоев билан юз бераётган ҳолатни коррупцияга қарши кураш баҳонасида ўз рақибларини йўқ қилишга уриниш, дея атамоқда.
Самолётда наркотик
Бразилия президентини кузатиб келаётган самолётдан 39 кг кокаин топилди.
Бразилия президенти Жаир Болсонару лайнерини «Катта Йигирматалик» саммитига кузатиб кетаётган ҳарбий самолётларнинг биридан 39 килограмм кокаин моддаси топилди.
Бразилия мудофаа вазирлиги баёнотида айтилишича, наркотик модда Японияга учаётган самолёт Испаниянинг Севилье шаҳрида транзит қўнишни амалга оширган вақтда топилган.
Президент ҳаво кортежи имкониятларидан фойдаланиб, яширин равишда кокаин ташишда гумонланиб, 38 яшар сержант Мануэл Силва Родригес ҳибсга олинган.
Президент Болсонару бўлиб ўтган воқеани «чидаб бўлмас» дея атаб, қўлга олинган сержантнинг энг қаттиққўл қонунлар билан жазоланишини талаб этган.
iPhone дизайнери Apple'ни тарк этмоқчи
Ўтган йигирма йилдан ошиқроқ вақт давомида Apple'нинг дунёдаги энг қиммат компанияга айланишига ёрдам бериб келган iPhone смартфонлари дизайнери Жони Айв ўз бизнесини яратиш учун компанияни тарк этишга қарор қилганини маълум этди.
iMac, iPod ва iPhone каби маҳсулотларни дизайнини яратган британиялик сер Жонатан Айв жорий йилнинг охирроғида LoveFrom номли креатив компания ташкил этиш режасида эканини маълум қилган.
Apple раҳбари Тим Кук сер Жонатаннинг «компания қайта оёққа туришидаги роли мислсиз» эканини таъкидлаган.
Жони Айв 1996 йилда Apple дизайн студиясининг раҳбарига айланган. Ўша вақтлар молиявий қийинчиликларга юз тутган компания сер Жонатан дизайнини яратган iMac ва iPod сотувлари ортидан оёққа тура олган эди.
Ўз меҳнат фаолиятини ҳожатхоналар ва тиш чўткаларини дизайнлаш билан бошлаган Жони Айвни Apple асосчиси, марҳум Стив Жобс бир неча бор ўзининг ўнг қўли сифатида тасвирлаган эди.
BBCUZBEK.COM билан Telegram орқали +44 7858860002 номери билан боғланинг.
Telegram каналимиз: https://t.me/bbcuzbek
