Дунё, янгиликлар: Ғўлон-Трамп тепалиги, чироқсиз қолган Жанубий Америка ва Нетаняҳунинг рафиқаси қандай жиноят содир этди?
Бош вазир Нетаняҳу Ғўлон Тепалигидаги янги манзилгоҳга президент Трамп номини берди
Сурат манбаси, AFP
Якшанба куни баҳсли ҳудудга ташриф буюрган Исроил Бош вазири Бенямин Нетаняҳу Ғўлон Тепалигида қурилиши режалаштирилаётган янги аҳоли манзилгоҳига Трамп Тепалиги номи берилишини тантанали эълон қилган.
Ном бериш маросимида жаноб Нетаняҳу ушбу манзилгоҳ ихтилофли ҳудуд юзасидан Исроил суверенитетини тан олган АҚШ президенти Доналд Трамп номини улуғлашини таъкидлаган.
Қурилиш ишлари ҳали бошланмаган бўлсада, жаноб Трамп номи ва АҚШ-Исроил байроқлари тасвирланган тахтача ўрнатилган.
Танқидчилар жаноб Нетаняҳунинг бу амалини лўттибозлик ва қонунсизлик, деб атаган.
Исроил асли Сурия ери бўлган Ғўлон Тепалигини 1967 йилдаги урушда босиб олган. Исроил бу жойни 1981 йилда аннекция қилганидан бери унинг юзасидан Исроил суверенитетини тан олган илк давлат АҚШ бўлган.
Буткул электрсиз қолган Аргентина ва Уругвай аста оёққа турмоқда
Сурат манбаси, AFP/GETTY
Жанубий Америкада жойлашган икки давлатининг барча ҳудуди якшанба куни тонгда электр қувватидан узилиб қолган.
Бунга ҳар икки давлатга хизмат кўрсатувчи электр тармоғида юзага келган носозлик сабаб бўлган.
Оқибатда, умумий ҳисобда, 48 миллион одам электрсиз қолиб кетган.
Поездлар тўхтаб қолган, светофорлар ишламай қолгани сабабли йўлларда адоқсиз тирбандликлар юзага келган.
Аргентинада якшанба куни ўтиши режалаштирилган маҳаллий сайловлар айрим провинцияларда кечиктирилган.
Носозлик Чили ва Парагвайнинг бир қанча қисмларига ҳам таъсир қилгани хабар қилинмоқда.
Аргентина энергетика вазири Густаво Лопетег носозликнинг аниқ сабаблари ҳали маълум бўлмасада, бу киберҳужум, дея ҳисобланмаётганини билдирган.
Одамлар ижтимоий тармоқларга зулматга чўмган шаҳарлар суратларини юклаганлар.
Душанба тонгига қадар электр қуввати Аргентинада 80 фоиз, Уругвайда 88 фоизга қайта тикланган.
Гонгконг намойишларида икки миллион одам қатнашди
Сурат манбаси, Reuters
Гонгконгда экстрадиция тўғрисидаги қонунларга ўзгартиришлар киритилишига қарши ўтказилган норозилик намойишларига қарийб икки миллион одам чиққан.
Ҳудуд ҳукумати баҳсли қонуннинг кўриб чиқилишини тўхтатишига қарамай, гонгконгликлар норозилик билдиришдан тўхтамаётир.
Одамларни дарғазаб қилган қонун лойиҳасида бошқа давлатлар ҳукуматлари томонидан жиноятда айбланган шахсларнинг Гонгконгдан экстрадиция қилиниши тўғрисида гап боради.
Танқидчилар Хитой Халқ Республикаси ушбу қонундан Гонгконгда истиқомат қилаётган ўз сиёсий мухолифларига қарши таъқиб воситаси ўлароқ фойдаланиши мумкинлигини таъкидлайдилар.
Якшанба куни ўтган йирик намойишда норозилар қонун лойиҳасининг кўриб чиқилишини номаълум муддатга тўхтатилиши эмас, балки мутлақо бекор қилиниши ҳамда Гонгконг раҳбари Керри Ламнинг истеъфосини талаб қилганлар.
Кузатувчиларнинг сўзларига кўра, намойиш тинч кайфиятда ўтган, полиция одамларнинг ўз муносабатини очиқ намоён этишига халал бермаган.
1841 йилдан 1997 йилга қадар Буюк Британия мустамлакаси бўлган Гонгконг «бир мамлакат, икки тизим» тамойили асосида Хитойдан мустақил ўз қонунчилик ва иқтисодий тизими ҳамда валютасига эга. Шунингдек, Гонгконг фуқароларининг маълум ҳуқуқ ва эркинликлари, жумладан, сўз эркинлиги ва митинглар ўтказиш ҳуқуқи кафолатланган.
Бироқ сўнгги вақтларда Хитой Гонгконг устидан ўз назоратини кучайтиришга уринмоқда.
Исроил Бош вазири рафиқаси давлат маблағларини бемақсад совурганини тан олди
Сурат манбаси, video screenshot
Бош вазир Бенямин Нетаняҳунинг рафиқаси Сара Нетаняҳу ўтган йили $99,300 миқдоридаги давлат маблағларини овқатланиш учун ноқонуний сарфлашда айбланган эди.
Нетаняҳу хоним давлат пулларини нотўғри ишлатганини тан олган ва унга илгари сурилган айбловлар сезиларли камайтирилиб, Бош вазир рафиқаси $15 минг жаримага тортилган.
Жаноб Нетаняҳу ўз рафиқасини кучли ва ҳурматли аёл сифатида тасвирлаб, унинг амалларида ҳеч қандай жиноят аломатлари йўқлигини таъкидлаган.
Айни дамда, Бош вазир Нетаняҳунинг ўзи ҳам суд иши билан юзлашмоқда. Исроил бош прокурори унинг коррупция, фирибгарлик ва уч ҳолатда ишончни суиистеъмол қилишда айбланаётганини маълум қилган.
Жаноб Нетаняҳу бу иддаоларнинг ҳақиқатга тўғри келмаслиги ва ўзининг сиёсий ўйин қурбонига айланганини билдирган.
BBCUZBEK.COM билан Telegram орқали +44 7858860002 номери билан боғланинг.
Telegram каналимиз: https://t.me/bbcuzbek
