Тадбиркорлар сайлов кампаниясини молиялашга мажбур этилмоқдалар
Тошкентда истиқомат қиладиган, аммо ўз исми-шарифлари эълон қилиниши хавфсизлигига таҳдид солишидан хавотирда бўлган ва шу боис ҳам очиқ гапиришни истамаган тадбиркорларнинг айтишича, парламент сайловларини молиялашга мажбур бўлмоқдалар.
Би-би-си таҳририятига ушбу электрон мактуб келди:
Ассалому алайкум жамоанинг ижодий ходимлари!БАҲСГА ТАКЛИФ: САЙЛОВ-2014: ДЕПУТАТЛИККА НОМЗОДЛАРНИ ТАНИЙСИЗМИ? мавзуси билан боғлиқ яхши саволлар эълон қилинибди. Лекин бу сайловни ўтказиш билан боғлиқ харажатларнинг кўпгина қисмини тадбиркорларга қоплатиш бўйича ҳам ҳукумат янги ва янги ташаббуслар билан чиққанлигининг ўзи республика бюджетининг қай аҳволга келиб қолганлигининг белгиси дейиш мумкин. Чунки соғлом авлод ҳақида бот-бот гапирилаётган мамлакатда болалар боғчаларига маблағ топиб беролмаган давлат қандай қилиб сайловга маблағ топиб берсин?
Менга икки тадбиркор мурожаат қилди. Иккисини ҳам шахсан танийман. Уларнинг иккиси ҳам икки округни маблағ билан таъминлаш бўйича масъул этиб тайинланибди. "Нимаики харажат бўлса, ҳаммасини қилишга мажбурмиз", дейишмоқда. Унинг бошланишидан тортиб охиригача. Келим-кетим транспорт, меҳмонларни кутиш-кузатиш ишларигача. Бундан улар даҳшатга тушишмоқда. Уларнинг ҳар иккаласи ҳам Тошкентдан, фақат исми-шарифларини ошкор этмаслигимни илтимос қилишди. Шунинг учун буни сизларга ошкор этолмаяпман.
Тўғри, ўтган сайловларда ўзим бевосита иштирок этганман. Унда ҳам ўзига тўқ, бой тадбиркорлар бу сиёсий тадбирга жалб қилинган. Бириси сайлов пано-плакатлари, яна бириси чой-пойини қилиб берганлигини ва яна бириси транспорт харажатларини кўтарганларини эшитганмиз, кўрганмиз. Лекин 2014 йилдаги сайловда битта округнинг ишини битта тадбиркорга юклаб қўйилиши бу давлатнинг жудаям ночорлашиб қолганлигига жиддий ишорадир.
Бунақаси тарихда бўлмаган. Лекин Ўзбекистонда ҳар нарса бўлиши мумкин экан.
Ҳурмат билан Нарзулло Ахунжонов
Би-би-си ўзбекистонлик журналист Нарзулло Охунжонов билан боғланиб, бу ахборотни қандай олгани ҳақида сўради.
Би-би-си Ўзбек хизмати билан Whatsapp орқали боғланишни истасангиз телефонимиз:+44 7858 860002
